ສຳເລັດ ກອງປະຊຸມສະໄໝສາມັນເທື່ອທີ 2 ສະພາປະຊາຊົນແຂວງບໍລິຄຳໄຊ ຊຸດທີ II

ກອງປະຊຸມສະໄໝສາມັນເທື່ອທີ 2 ສະພາປະຊາຊົນແຂວງບໍລິຄຳໄຊ ຊຸດທີ II ໄດ້ໄຂຂຶ້ນຢ່າງເປັນທາງການ ໃນວັນທີ 5 ມັງກອນ 2022 ແລະ ໄດ້ອັດລົງຢ່າງເປັນທາງການໃນວັນທີ 7 ມັງກອນ 2022 ທີ່ຫ້ອງປະຊຸມສະພາປະຊາຊົນແຂວງ ພາຍໃຕ້ການເປັນປະທານຂອງ ທ່ານ ປອ ສຸວັນນີ ໄຊຊະນະ ປະທານສະພາປະຊາຊົນແຂວງບໍລິຄຳໄຊ ເປັນກຽດເຂົ້າຮ່ວມໂດຍ ທ່ານ ນາງ ປີ່ງຄຳ ລາຊະສີມາ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 11 ແຂວງບໍລິຄຳໄຊ, ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີບັນດາທ່ານຄະນະປະຈໍາສະພາປະຊາຊົນແຂວງ, ຄະນະປະຈຳພັກແຂວງ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ຫົວໜ້າພະແນກການ, ພະນັກງານອາວຸໂສບຳນານ ແລະ ແຂກທີ່ຖືກເຊີນ ເຂົ້າຮ່ວມ.

ກອງປະຊຸມສະໄໝສາມັນເທື່ອທີ 2 ສະພາປະຊາຊົນແຂວງບໍລິຄຳໄຊ ຊຸດທີ II ໄດ້ດໍາເນີນມາເປັນເວລາ 2 ວັນເຄີ່ງ, ບັນດາທ່ານຜູ້ເຂົ້າຮ່ວມ ໄດ້ເຊີດຊູຄວາມຮັບຜິດຊອບສູງ ໃນການຄົ້ນຄວ້າ, ປະກອບຄໍາຄິດເຫັນຢ່າງມີເຫດຜົນ, ມີຈຸດສຸມ, ເລິກເຊີ່ງ ແລະ ກວ້າງຂວາງ ພ້ອມທັງມີຄວາມເປັນເອກະພາບສູງ ໃນການພິຈາລະນາຮັບຮອງເອົາບັນຫາສໍາຄັນຕ່າງໆ ຄື: ຮັບຮອງເອົາການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ, ແຜນງົບປະມານປະຈໍາປີ 2021 ແລະທິດທາງແຜນການ ປະຈໍາປີ 2022, ຮັບຮອງເອົາການເຄື່ອນໄຫວວຽກງານ ປະຈໍາປີ 2021 ແລະ ທິດທາງແຜນການ ປະຈໍາປີ 2022, ບົດລາຍງານຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານປະຈໍາປີ 2020 ຂອງອົງການກວດສອບພາກກາງ ແລະ ການຈັດຕັ້ງປະຕິບັດວຽກງານປະຈໍາປີ 2021, ທິດທາງແຜນການປະຈໍາປີ 2022 ແລະ ການແກ້ໄຂຜົນການກວດສອບໃນປີຜ່ານມາຂອງອົງການກວດກາລັດແຂວງ, ຮັບຮອງເອົາບົດລາຍງານການເຄື່ອນໄຫວວຽກງານ ປະຈໍາປີ 2021 ແລະ ທິດທາງແຜນການ ປະຈໍາປີ 2022 ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ, ຮັບຮອງເອົາບົດລາຍງານການເຄື່ອນໄຫວວຽກງານ ປະຈຳປີ 2021 ແລະ ທິດທາງແຜນການ ປະຈຳປີ 2022 ຂອງສະພາປະຊາຊົນແຂວງ, ຮັບຮອງເອົານິຕິກຳໃຕ້ກົດໝາຍ ຈຳນວນ 2 ສະບັບ.

ໄດ້ສະເໜີໃຫ້ອົງການປົກຄອງແຂວງຊີ້ນຳ, ຊຸກຍູ້ຄະນະຮັບຜິດຊອບສ້າງຮ່າງນິຕິກຳ, ພະແນກການທີ່ກ່ຽວຂ້ອງ ສືບຕໍ່ປັບປຸງແກ້ໄຂບັນດານິຕິກຳ ຕາມການປະກອບຄຳເຫັນຂອງສະມາຊິກສະພາປະຊາຊົນແຂວງ.

ກອງປະຊຸມ ຍັງຈະໄດ້ຮັບຟັງການລາຍງານ, ຊີ້ແຈງຈາກການນໍາຂອງແຂວງ ແລະ ບັນດາພະແນກການຈຳນວນໜຶ່ງ ຕາມຄຳສະເໜີຂອງປະຊາຊົນ ແລະ ຄຳຖາມເຈາະຈິ້ມຂອງສະມາຊິກສະພາປະຊາຊົນແຂວງ.

ກອງປະຊຸມໃນຄັ້ງນີ້ ໄດ້ດຳເນີນຮູບແບບປົກກະຕິ ແລະ ຮູບແບບທາງໄກ ໂດຍປະຕິບັດມາດຕະການປ້ອງກັນພະຍາດໂຄວິດ 19 ຢ່າງເຂັ້ມງວດ ແລະ ໄດ້ອອກອາກາດ ຖ່າຍທອດສົດບາງເນື້ອໃນທີ່ສຳຄັນ ຜ່ານທາງສະຖານີວິທະຍຸແຂວງບໍລິຄຳໄຊ ລະບົບ FM 101.3 Mh ພ້ອມທັງເປີດກວ້າງການປະກອບຄຳຄິດຄຳເຫັນ, ຄຳສະເໜີຂອງພໍ່ແມ່ປະຊາຊົນບັນດາເຜົ່າ ມາສູ່ກອງປະຊຸມ ໂດຍຜ່ານໂທລະສັບສາຍດ່ວນໝາຍເລກ 054 156 ທີ່ບໍ່ເສຍຄ່າໂທລະສັບ, ຜ່ານການສັງລວມ ມີຄຳສະເໜີມາຍັງກອງປະຊຸມ ທັງໝົດ 11 ສາຍ 14 ບັນຫາ.

• Facebook
• Twitter
• Line