ໃນຕອນບ່າຍຂອງວັນທີ 24 ທັນວາ 2021 ນີ້ ຢູ່ທີ່ຫ້ອງປະຊຸມຂອງພະແນກ ຖວທ ໄດ້ຈັດພິທີມອບ-ຮັບໃບຢັ້ງຢືນ 4 ບຸກ ຂື້ນ ພາຍໃຕ້ການເປັນປະທານຂອງ ສະຫາຍ ລັງສີ ໂພຄະສົມບັດ ເລຂາຊາວໜຸ່ມຮາກຖານ ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ, ເປັນກຽດເຂົ້າຮ່ວມພິທີໃນຄັ້ງນີ້ໂດຍ ສະຫາຍ ທອງມະນີ ໂຄປັນຍາ ກຳມະການພັກແຂວງ ເລຂາຄະນະບໍລິຫານງານຊາວໜຸ່ມແຂວງ, ສະຫາຍ ບົວສອນ ບຸດຊາວດອນ ຄະນະພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ມີຊາວໜຸ່ມແຮກສ່ຽວອ້ອມຂ້າງ ພ້ອມດ້ວຍສະມາຊິກຊາວໜຸ່ມພາຍໃນພະແນກ ເຂົ້າຮ່ວມ
ໃນພິທີ ສະຫາຍ ແສງອາລຸນ ຈິດຕະວົງ ຮອງເລຂາຊາວໜຸ່ມຮາກຖານ ໄດ້ຂື້ນຜ່ານຜົນສຳເລັດການຈັດຕັ້ງປະຕິບັດຂໍ້ແຂ່ງຂັນ 4 ບຸກ ຂອງໜ່ວຍຊາວໜຸ່ມຮາກຖານພະແນກ ຖວທ ແຂວງ ພ້ອມທັງວາງທິດທາງແຜນການໃນຕໍ່ໜ້າ.
ໜ່ວຍຊາວໜຸ່ມຮາກຖານພະແນກ ຖວທ ແຂວງ ປະກອບມີ 5 ໜ່ວຍ, ມີສະມາຊິກຊາວໜຸ່ມທັງໝົດ 59 ສະຫາຍ, ຍິງ 27 ສະຫາຍ, ສະມາຊິກຊາວໜຸ່ມພາຍໃນຮາກຖານພະແນກ ຖ ວ ທ ແຂວງ ມີແນວຄິດເຊື່ອໜັ້ນຕໍ່ການນຳພາຂອງພັກ ແລະ ອົງການຈັດຕັ້ງຊາວໜຸ່ມ, ມີຄວາມຫ້າວຫັນຕື່ນຕົວປະຕິບັດວຽກງານຊາວໜຸ່ມ, ວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແລະ ວຽກຂະບວນການຕ່າງໆໄດ້ດີ, ພ້ອມນັ້ນ ຄະນະຊາວໜຸ່ມຮາກຖານພວກເຮົາ ກໍ່ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດແກ່ສະມາຊິກຊາວໜຸ່ມດ້ວຍຫລາຍຮູບການ ເຊັ່ນ: ນຳພາເຊື່ອມຊືມມະຕິ, ຄຳສັ່ງ, ແຈ້ງການແນະນຳ, ຮັບຟັງການໂອ້ລົມຂອງຂັ້ນເທີງ, ຮັບຟັງປາຖະກະຖາວັນສຳຄັນຂອງພັກ, ຂອງຊາດ ໄດ້ 38 ຄັ້ງ ລວມມີ 177 ເທື່ອຄົນ ແລະ ສາມາດຈັດຕັ້ງປະຕິບັດ ດ້ານແນວຄິດປະຕິບັດໄດ້ 90.23%, ດ້ານຝຶກຝົນຫລໍ່ຫລອມຮໍ່າຮຽນ 90.01%, ດ້ານການຈັດຕັ້ງ 90.10%, ດ້ານສ້າງວຽກເຮັດງານທໍາ 90.34%.
ເພື່ອເປັນການຢັ້ງຢືນເຖິງຜົນງານນັ້ນ ຄະນະບໍລິຫານງານຊາວໜຸ່ມແຂວງບໍລິຄຳໄຊ ຈຶ່ງໄດ້ມອບນາມມະຍົດ ຊາວໜຸ່ມ 4 ບຸກ ແລະ ໃບຍ້ອງຍໍໃຫ້ຊາວໜຸ່ມໜ່ວຍຮາກຖານ ເປັນກຽດມອບໂດຍ ສະຫາຍ ທອງມະນີ ໂຄປັນຍາ ແລະ ມີຄໍາເຫັນໂອ້ລົມ ເຊິ່ງກ່ອນອື່ນ ສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນໄລຍະຜ່ານມາ ແລະ ເນັ້ນໜັກໃຫ້ສະມາຊິກຊາວໜຸ່ມ ຈົ່ງເອົາໃຈໃສ່ຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກ ເປັນເຈົ້າການເຕົ້າໂຮມຄວາມສາມັກຄີ, ເພີ່ມທະວີການສ້າງຂະບວນການໃຫ້ຟົດຟື້ນ – ຕໍ່ເນື່ອງ ໂດຍຕິດພັນກັບໜ້າທີ່ວິຊາສະເພາະ ເປັນເສນາທິການທີ່ຫ້າວຫັນເຂັ້ມແຂງໃຫ້ແກ່ຄະນະພັກ ແລະ ຮັກສາມູນເຊື້ອນາມມະຍົດຊາວໜຸ່ມ 4 ບຸກໄວ້ໃຫ້ໝັ້ນຄົງຕະຫລອດໄປ.
Users Today : 730
Users Yesterday : 494
This Month : 8571
This Year : 128608
Total Users : 514832
Who's Online : 47