ໃນຕອນເຊົ້າຂອງວັນທີ 22 ທັນວາ 2021 ທີ່ຫ້ອງປະຊຸມຫ້ອງວ່າການ ເມືອງຄໍາເກີດ ແຂວງບໍລິຄຳໄຊ ໄດ້ຈັດກອງປະຊຸມ ຄົບຄະນະບໍລິຫານງານພັກເມືອງ ຄັ້ງທີ່ 7 ສະໄຫມທີ່ 9 ພາຍໃຕ້ການເປັນປະທານຂອງ ສະຫາຍ ເພັດສະໃໝ ໄຊຍະທິຈັກ ເລຂາພັກເມືອງ ເຈົ້າເມືອງຄໍາເກີດ, ມີຄະນະປະຈໍາ-ກຳມະການພັກເມືອງ ບັນດາຫົວຫນ້າຫ້ອງການອ້ອມຂ້າງເມືອງ ແລະ ລັດວິສາຫະກິດ ພາຍໃນເມືອງ ເຂົ້າຮ່ວມ.
ໃນກອງປະຊຸມ ສະຫາຍ ແສງແກ້ວ ໃສມະນີ ຮອງເຈົ້າເມືອງຄໍາເກີດ ຜູ້ຊີ້ນໍາວຽກງານເສດຖະກິດຂອງເມືອງ ໄດ້ຂຶ້ນຜ່ານຮ່າງບົດສະຫຼຸບການຈັດຕັ້ງປະຕິບັດວຽກງານຮອບດ້ານປະຈໍາ 9 ເດືອນ ປີ 2021 ແລະ ທິດທາງແຜນການ 3 ເດືອນທ້າຍປີ 2021 ຂອງເມືອງ ທ່ານໃຫ້ຮູ້ວ່າ: ໃນ 9 ເດືອນຜ່ານມາ ເປັນໄລຍະການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກເມືອງ ຄຽງຄູ່ກັບການຈັດຕັ້ງຜັນຂະຫຍາຍ 2 ວາລະແຫ່ງຊາດ ດ້ວຍການຍົກລະດັບການແກ້ໄຂບັນຫາຄວາມຫຍຸ້ງຍາກດ້ານເສດຖະກິດ – ການເງິນ ແລະ ການແກ້ໄຂບັນຫາຢາເສບຕິດ ພ້ອມກັນສຸມໃສ່ປ້ອງກັນ, ຄວບຄຸມ ແລະ ສະກັດກັ້ນ ການແຜ່ລະບາດຂອງພະຍາດໂຄວິດ-19 ຢ່າງຕັ້ງຫນ້າ ເພື່ອຮັບປະກັນຊີວິດ ແລະ ສຸຂະພາບຂອງປະຊາຊົນ.
ແຕ່ເຖິງຢ່າງໃດກໍ່ຕາມ ພວກອິດທິກໍາລັງປໍລະປັກ, ກຸ່ມຄົນບໍ່ດີຍັງບໍ່ລົດລະໃນການປະຕິບັດກົນອຸບາຍຫັນປ່ຽນໂດຍສັນຕິ ແລະ ບັນຫາການການລະບາດຂອງພະຍາດ COVID-19 ກໍ່ເກີດມີກໍລະນີຕິດເຊື້ອຢູ່ພາຍໃນເມືອງ.
ຜ່ານມາ ເມືອງຄຳເກີດ ໄດ້ເອົາໃຈໃສ່ຈັດຕັ້ງປະຕິບັດມາດຕະການຕ່າງໆ ທີ່ລັດຖະບານ, ແຂວງ ແລະ ເມືອງວາງອອກ ເຮັດໃຫ້ເມືອງສາມາດ ປ້ອງກັນບໍ່ໃຫ້ການລະບາດຂອງພະຍາດໂຄວິດ-19 ຕັດວົງຈອນບໍ່ໃຫ້ຂະຫຍາຍເປັນວົງກວ້າງ, ຍ້ອນອົງການປົກຄອງ ທຸກຂັ້ນ, ສະມາຊິກພັກ, ພະນັກງານ-ລັດຖະກອນ ຕະຫຼອດຮອດປະຊາຊົນບັນດາເຜົ່າ ໄດ້ມີຄວາມສາມັກຄີເປັນເອກະພາບສູງຕໍ່ແນວທາງ ແລະ ການນໍາພາຂອງພັກ ປະຕິບັດເຂັ້ມງວດຕາມຄໍາແນະນໍາຂອງຄະນະສະເພາະກິດແຕ່ລະຂັ້ນວາງອອກ ສາມາດແກ້ໄຂ, ຄວບຄູມ, ສະກັດກັ້ນໄດ້ທັນກັບສະພາບການໂດຍພື້ນຖານ ແລະ ຮັກສາສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບເປັນລະບຽບຮຽບຮ້ອຍ, ການຈັດຕັ້ງແຕ່ລະຂັ້ນໄດ້ຮັບການປັບປຸງດີຂຶ້ນ ປະຊາຊົນບັນດາເຜົ່າອຸ່ນອຽນທຸ່ນທ່ຽງ, ຕັ້ງຫນ້າຟື້ນຟູ ແລະ ພັດທະນາເສດຖະກິດຄອບຄົວຂອງຕົນ.
ພ້ອມນັ້ນ ຜູ້ເຂົ້າຮ່ວມກອງປະຊຸມກໍ່ໄດ້ປະກອບຄໍາຄິດຄໍາເຫັນໃສ່ຮ່າງບົດລາຍງານໃນຂະແໜງການຂອງຕົນເພື່ອໃຫ້ໄດ້ເນື້ອໃນທີ່ຄົບຖ້ວນສົມບູນ. ກອງປະຊຸມ ຈະໄດ້ດໍາເນີນເວລາສອງວັນ ແຕ່ວັນທີ 22-23 ທັນວາ 2021 ຈິ່ງສໍາເລັດ.
Users Today : 588
Users Yesterday : 494
This Month : 8429
This Year : 128466
Total Users : 514690
Who's Online : 45