ປະທານສູນກາງກຳມະບານລາວ ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງບໍລິຄຳໄຊ

ໃນຕອນເຊົ້າຂອງວັນທີ 20 ທັນວາ 2021 ຢູ່ຫ້ອງຮັບຮອງຂອງແຂວງບໍລິຄຳໄຊ ທ່ານ ວັນວິໄລ ແດນພູຫຼວງ ຮອງເລຂາພັກແຂວງ ພ້ອມດ້ວຍຄະນະ ໄດ້ເປັນກຽດຕ້ອນຮັບທ່ານນາງ ອາລີ ວົງໜໍ່ບຸນທຳ ກຳມະການສູນກາງພັກ ປະທານຄະນະບໍລິຫານງານສູນກາງສະຫະພັນກຳມະບານລາວ ພ້ອມດ້ວຍຄະນະ ເນື່ອງໃນໂອກາດທີ່ມາຢ້ຽມຢາມ ແລະ ເຮັດວຽກຢູ່ແຂວງບໍລິຄຳໄຊ.

ໂອກາດນີ້ ທ່ານ ວັນວິໄລ ແດນພູຫຼວງ ໄດ້ລາຍງານຫຍໍ້ກ່ຽວກັບບັນຫາຢາເສບຕິດ, ການແຜ່ລະບາດຂອງພະຍາດໂຄວິດ 19 ຢູ່ພາຍໃນແຂວງ, ບັນຫາພະນັກງານ ແລະ ວຽກງານພະນັກງານ ທີ່ເຫັນວ່າ ມີຄວາມຈຳເປັນຕ້ອງໄດ້ສ້າງການຫັນປ່ຽນ ຢ່າງແຂງແຮງ ແລະ ເລິກເຊິ່ງ.

ເນື່ອງໃນໂອກາດທີ່ມາຢ້ຽມຢາມໃນຄັ້ງນີ້ ປະທານຄະນະບໍລິຫານງານສູນກາງສະຫະພັນກຳມະບານລາວ ຍັງໄດ້ມອບເງິນສົດຈຳນວນ 5 ລ້ານກີບ ແລະ ຄອມພິວເຕີໂນດບຸກ 1 ເຄື່ອງ ໃຫ້ແກ່ສະຫະພັນກຳມະບານແຂວງ ເພື່ອນຳໃຊ້ເຂົ້າໃນວຽກງານ.

ໃນຕອນບ່າຍຂອງວັນດຽວກັນ ຢູ່ຫ້ອງປະຊຸມຫ້ອງວ່າການແຂວງ ໄດ້ຈັດພິທີພົບປະໂອ້ລົມຂອງທ່ານນາງ ອາລີ ວົງໜໍ່ບຸນທຳ ກຳມະການສູນກາງພັກ ປະທານຄະນະບໍລິຫານງານສູນກາງສະຫະພັນກຳມະບານລາວ ມີຄະນະບໍລິຫານງານສະຫະພັນກໍາມະບານແຂວງ, ກຳມະບານຮາກຖານອ້ອມຂ້າງແຂວງ ແລະ ພະນັກງານກໍາມະບານແຂວງ ເຂົ້າຮ່ວມ.

ທ່ານ ດຳລົງ ທັບລາດ ປະທານສະຫະພັນກຳມະບານແຂວງ ໄດ້ລາຍງານການເຄື່ອນໄຫວວຽກງານໄລຍະ 3 ເດືອນທ້າຍປີ ( 10, 11, 12 ) ໂດຍຫຍໍ້ ວ່າ: ຄະນະປະທານ ແລະ ສະມາຊິກແຕ່ລະຂັ້ນ ໄດ້ເອົາໃຈໃສ່ເຄື່ອນໄຫວໂຄສະນາເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ມະຕິ, ຄຳສັ່ງຕ່າງໆຂອງຂັ້ນເທິງໄດ້ 14 ຄັ້ງ, ປະກາດການສ້າງຕັ້ງການຈັດຕັ້ງກຳມະບານຮາກຖານດ່ານສາກົນໄດ້ 2 ດ່ານ ຄືດ່ານປາກຊັນ ແລະ ດ່ານນ້ຳພາວ, ໄດ້ລົງເກັບກຳຂໍ້ມູນຄ່າແຮງງານຂັ້ນຕ່ຳ ແລະ ການນຳໃຊ້ແຮງງານຢູ່ບັນດາຫົວໜ່ວຍແຮງງານ, ສຳເລັດການປະເມີນຂໍ້ແຂ່ງຂັນ 5 ເປັນເຈົ້າ ທົ່ວແຂວງປະຈຳປີ 2021, ຊ່ວຍເຫຼືອປຸກສ້າງເຮືອນຈຳນວນ 1 ຫຼັງ ໃຫ້ຄອບຄົວທຸກຍາກອານາຖາຢູ່ບ້ານຊະນະໄຊ ເມືອງປາກຊັນ ເປັນເງິນຈຳນວນ 30.977.000 ກີບ, ປະກອບສ່ວນເຄື່ອງບໍລິໂພກ ແລະ ອຸປະໂພກ ໃຫ້ແກ່ສູນປິ່ນປົວໂຄວິດ ລວມມູນຄ່າ 7.350.000 ກີບ, ຈັດລາຍການວິທະຍຸຂອງແຂວງໄດ້ 12 ຄັ້ງ ແລະ ຂຽນຂ່າວລົງສື່ອອນລາຍຂອງກຳມະບານແຂວງໄດ້ 31 ຂ່າວ.

ຈາກນັ້ນ ທ່ານ ນາງ ອາລີ ວົງໜໍ່ບຸນທຳ ໄດ້ໂອ້ລົມ ແລະ ໃຫ້ທິດຊີ້ນຳຫຼາຍວຽກທີ່ສຳຄັນ ເປັນຕົ້ນ ເພີ່ມທະວີວຽກງານສຶກສາອົບຮົມການເມືອງ-ແນວຄິດ ໃຫ້ສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານລາວໃນທົ່ວປະເທດ, ຫັນເອົາວາລະແຫ່ງຊາດມາຜັນຂະຫຍາຍເຂົ້າໃນວຽກງານກຳມະບານ, ເອົາໃຈໃສ່ວຽກງານສ້າງ ແລະ ປັບປຸງການຈັດຕັ້ງກຳມະບານແຕ່ລະຂັ້ນ ໃຫ້ເຂັ້ມແຂງສາມາດເຄື່ອນໄຫວຖືກຕ້ອງຕາມພາລະບົດບາດຂອງຕົນຢ່າງແຂງແຮງ ໂດຍຕ້ອງມີການແບ່ງຂັ້ນຄຸ້ມຄອງໃຫ້ຈະແຈ້ງ, ຕັ້ງໜ້າເຄື່ອນໄຫວປົກປ້ອງສິດ ແລະ ຜົນປະໂຫຍດອັນຊອບທຳຂອງກຳມະກອນ ແລະ ຊາວຜູ້ອອກແຮງງານ, ເອົາໃຈໃສ່ຊຸກຍູ້ຂະບວນການແຂ່ງຂັນ 5 ເປັນເຈົ້າ ຂອງສະຫະພັນກຳມະບານລາວ ຕິດພັນກັບວຽກງານວິຊາສະເພາະ ແລະ ຂໍ້ແຂ່ງຂັນຮັກຊາດ ແລະ ພັດທະນາ ໃນສາຂາອາຊີບຕ່າງໆ, ຊຸກຍູ້ ຕິດຕາມ ແລະ ໃຫ້ຄວາມຊ່ວຍເຫຼືອ ສະມາຊິກກຳມະບານ, ກຳມະກອນ ແລະ ຜູ້ອອກແຮງງານ ທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດ ໂຄວິດ 19, ສືບຕໍ່ພົວພັນຮ່ວມມືກັບຕ່າງປະເທດ ທີ່ເປັນສະມາຊິກ, ພາຄີ ແລະ ກັບປະເທດເພື່ອນມິດຍຸດທະສາດ ເພື່ອຮຽນຮູ້, ແລກປ່ຽນບົດຮຽນດ້ານວຽກງານກຳມະບານ, ເອົາໃຈໃສ່ວຽກງານກວດກາຂອງກຳມະບານໃຫ້ເຂັ້ມແຂງກວ່າເກົ່າ ໂດຍສະເພາະແມ່ນຕິດຕາມ ການປະຕິບັດມະຕິກອງປະຊຸມໃຫຍ່ ຜູ້ແທນກຳມະບານລາວທົ່ວປະເທດ ຄັ້ງທີ 8, ການປະຕິບັດກົດໝາຍ ແລະ ກົດລະບຽບຂອງກຳມະບານ ວ່າໄດ້ເຄື່ອນໄຫວຖືກຕ້ອງຕາມພາລະບົດບາດ ແລະ ສິດໜ້າທີ່ຂອງສະຫະພັນກຳມະບານແຕ່ລະຂັ້ນ ລວມທັງການປະພຶດ ຂອງສະມາຊິກກຳມະບານແຕ່ລະສະຫາຍ.

• Facebook
• Twitter
• Line