ໃນວັນທີ 12 ທັນວາ 2021 ທີ່ຫ້ອງປະຊຸມຫ້ອງການບ້ານນ້ຳອ້ອນ ເມືອງໄຊຈຳພອນ ແຂວງບໍລິຄຳໄຊ ໄດ້ຈັດກອງປະຊຸມ ຜັນຂະຫຍາຍວາລະແຫ່ງຊາດ ວ່າດ້ວຍການສະກັດກັ້ນ ແລະ ແກ້ໄຂບັນຫາຢາເສບຕິດ ຢູ່ເມືອງໄຊຈຳພອນ, ເປັນປະທານໂດຍ ທ່ານ ໂກ່ ໄຊສົມບັດ ເຈົ້າເມືອງໄຊຈຳພອນ, ມີບັນດາການນຳເມືອງ, ນາຍບ້ານກຸ່ມບ້ານນ້ຳອ້ອນ, ກຸ່ມບ້ານໂພນສີ, ຄະນະຮັບຊອບ ກອງເລຂາ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ໃນກອງປະຊຸມ ໄດ້ຜ່ານຂໍ້ຕົກລົງ ຂອງທ່ານເຈົ້າເມືອງໄຊຈຳພອນ ວ່າດ້ວຍການແຕ່ງຕັ້ງຄະນະນໍາພາ-ຊີ້ນໍາ ແລະ ຄະນະຮັບຜິດຊອບລົງເລິກການຈັດຕັ້ງປະຕິບັດຜັນຂະຫຍາຍວາລະແຫ່ງຊາດ ກ່ຽວກັບມາດຕະການສະກັດກັ້ນ ແລະ ແກ້ໄຂບັນຫາຢາເສບຕິດຂອງເມືອງ, ຜ່ານຮ່າງເນື້ອໃນຜັນຂະຫຍາຍວາລະແຫ່ງຊາດກ່ຽວ ວ່າດ້ວຍການສະກັດກັ້ນ ແລະ ແກ້ໄຂບັນຫາຢາເສບຕິດຂອງເມືອງ ໂດຍໃຫ້ຮູ້ວ່າ: ໄລຍະຜ່ານມາອົງການຈັດຕັ້ງພັກ-ລັດ ກໍ່ຄືການນຳຂັ້ນແຂວງ, ຂັ້ນເມືອງ ແລະ ຂັ້ນບ້ານ ໄດ້ເອົາໃຈໃສ່ຖືເອົາການແກ້ໄຂບັນຫາຢາເສບຕິດ ເປັນວຽກທີ່ສຳຄັນ ໂດຍອິງໃສ່ບັນດາມະຕິ, ຄຳສັ່ງຕ່າງໆຂອງຂັ້ນເທິງ ແລະ ເຄື່ອນໄຫວຈັດຕັ້ງປະຕິບັດດ້ວຍຮູບການຕ່າງໆ ເປັນຕົ້ນແມ່ນປະຕິບັດຕາມຄຳສັ່ງຂອງທ່ານນາຍົກລັດຖະມົນຕີ ເລກທີ 30/ນຍ ລົງວັນທີ 12 ສິງຫາ 2011, ຈັດຕັ້ງຜັນຂະຫຍາຍວຽກ 4 ເຖື່ອນ 9 ຫົວຂໍ້ສໍາມະນາວິທະຍາສາດ ເຂົ້າໃນໂຄງການຕ້ານ, ສະກັດກັ້ນ ແລະ ແກ້ໄຂການແຜ່ລະບາດຂອງຢາເສບຕິດ ໂດຍແຂວງໄດ້ນຳພາເຮັດທົດລອງ ແລະ ມອບໃຫ້ບັນດາເມືອງສຶບຕໍ່ປະຕິບັດ, ນຳເອົາໂຄງການດັ່ງກ່າວ ເຂົ້າໃນຫຼັກສູດການຮຽນ-ການສອນ, ຈັດຕັ້ງວິຊາສະເພາະລົງແກ້ໄຂປະກົດການຫຍໍ້ທໍ້ ເຜີຍແຜ່ນິຕິກຳຜົນຮ້າຍ ແລະ ໄພອັນຕະລາຍຂອງຢາເສບຕິດ, ພ້ອມນັ້ນ ຜູ້ເຂົ້າຮ່ວມກອງປະຊຸມ ແລະ ຄະນະຮັບຜິດຊອບ ກໍ່ໄດ້ປະກອບຄໍາຄິດຄໍາເຫັນ ເຂົ້າໃນຮ່າງຜັນຂະຫຍາຍວາລະແຫ່ງຊາດ ເພື່ອໃຫ້ມີເນື້ອໃນເປັນອັນລະອຽດ.
ຕອນທ້າຍກອງປະຊຸມ ທ່ານ ໂກ່ ໄຊສົມບັດ ໄດ້ໂອ້ລົມ ໂດຍທ່ານໄດ້ເນັ້ນໜັກໃນການໂຄສະນາເຜີຍແຜ່ລະບຽບກົດໝາຍ, ຜົນຮ້າຍ, ໄພອັນຕະລາຍຂອງຢາເສບຕິດຕໍ່ເດັກນ້ອຍ ແລະ ຜູ້ທີ່ຢູ່ໃນເຂດຊົນນະບົດໃຫ້ຮັບຮູ້ ແລະ ພ້ອມກັນສະກັດກັ້ນແກ້ບັນຫາຢາເສບຕິດພາຍໃນເມືອງໄຊຈຳພອນໃຫ້ໝົດໄປ.
Users Today : 649
Users Yesterday : 494
This Month : 8490
This Year : 128527
Total Users : 514751
Who's Online : 40