ຕອນເຊົ້າຂອງວັນທີ 9 ທັນວາ 2021 ຢູ່ຫ້ອງປະຊຸມຫ້ອງວ່າການເມືອງວຽງທອງ, ແຂວງບໍລິຄໍາໄຊ ໄດ້ຈັດພິທີ ມອບກອງທຶນລ້ຽງງົວ ໂຄງການຮ່ວມມືພັດທະນາຊາຍແດນລາວ-ຫວຽດນາມ ກຸ່ມບ້ານທອງມີໄຊ, ເມືອງວຽງທອງ ໂດຍເປັນກຽດເຂົ້າຮ່ວມຂອງ ທ່ານ ວັນວິໄລ ແດນພູຫຼວງ ຮອງເລຂາພັກແຂວງ, ຜູ້ຊີ້ນໍາວຽກງານພັກ-ພະນັກງານຂັ້ນແຂວງ, ມີຄະນະປະຈໍາພັກເມືອງວຽງທອງ, ພະແນກການທີ່ກ່ຽວຂ້ອງຂັ້ນແຂວງ-ຂັ້ນເມືອງ ເຂົ້າຮ່ວມ.
ກອງທຶນລ້ຽງງົວຢູ່ກຸ່ມບ້ານທອງມີໄຊ ແມ່ນກິດຈະກໍາໜຶ່ງຂອງໂຄງການຮ່ວມມື ພັດທະນາຊາຍແດນ ລາວ – ຫວຽດນາມ ຊຶ່ງແມ່ນນະໂຍບາຍຂອງ 2 ພັກ 2 ລັດຖະບານ ສປປ ລາວ ແລະ ສສ ຫວຽດນາມ ຕາມການຕົກລົງຮ່ວມມືຂອງຜູ້ຕາງໜ້າ 2 ກົມການເມືອງສູນກາງພັກ ຄັ້ງວັນທີ 29 ມີນາ 2005.
ຈຸດປະສົງ ແມ່ນເພື່ອສ້າງໃຫ້ເສັ້ນຊາຍແດນລາວ – ຫວຽດນາມ ເປັນເສັ້ນຊາຍແດນແຫ່ງ ສັນຕິພາບ, ສະຖຽນລະພາບ, ມິດຕະພາບ, ຄວາມສາມັກຄີ ແລະ ໄດ້ຮັບການພັດທະນາຢ່າງຮອບດ້ານ ຕາມ 4 ເນື້ອໃນ 4 ຄາດໝາຍ ແລະ 3 ມາດຕະການ ແຂວງບໍລິຄຳໄຊ ເຊີ່ງໄດ້ຮັບການຈັດຕັ້ງປະຕິບັດໂຄງການຮ່ວມມືພັດທະນາຊາຍແດນ ລາວ – ຫວຽດນາມ ຢູ່ກຸ່ມບ້ານທອງມີໄຊ ແຕ່ປີ 2005 ຮອດ ປີ 2010 ແມ່ນໄດ້ສິ້ນສຸດໂຄງການ ແລະ ໄດ້ຈັດຕັ້ງພິທີເຊັນມອບ-ຮັບໂຄງການຢ່າງເປັນທາງການ ໃນເດືອນ ພຶດສະພາ ປີ 2011.
ການຄຸ້ມຄອງໂຄງການ ແມ່ນຄະນະຄຸ້ມຄອງໂຄງການຂັ້ນແຂວງ ເປັນເຈົ້າຂອງໂຄງການ ແລະ ກອງບັນຊາການທະຫານເຂດ 4 ແຫ່ງ ສສ ຫວຽດນາມ (ບໍລິສັດພັດທະນາເສດຖະກິດ ເປັນຜູ້ຮັບເໝົາ) ແລະ ຈັດຕັ້ງປະຕິບັດໂຄງການ ດ້ວຍແຫຼ່ງທຶນສົມທົບ ຂອງລັດຖະບານລາວ ແລະ ລັດຖະບານຫວຽດນາມ, ມູນຄ່າລວມທັງໝົດ 68,598 ຕື້ກວ່າກີບ, ໃນນັ້ນ ທຶນລັດຖະບານລາວ 60% ເປັນມູນຄ່າ 41,158 ຕື້ກວ່າກີບ ແລະ ທຶນລັດຖະບານ ສສ ຫວຽດນາມ 40% ມູນຄ່າ 27.439 ຕື້ກ່ວາກີບ.
ຮອດປະຈຸບັນ ນີ້ມີງົວກອງທຶນທັງໝົດ 245 ໂຕ, ໃນນັ້ນ ບ້ານ ທອງມີໄຊ 34 ໂຕ, ບ້ານ ໂຮມຈະເລີນ 23 ໂຕ, ບ້ານ ສີວິໄລ 91 ໂຕ, ບ້ານ ນາເພີນ 96 ໂຕ ແລະ ຄຸ້ມທາດພູວຽງ 1 ໂຕ (ຍ້າຍມາຈາກບ້ານນໍ້າຕາກ).
ໃນພິທີ ໄດ້ມີການເຊັນມອບ ໃຫ້ເມືອງວຽງທອງເປັນຜູ້ຕິດຕາມ ຄຸ້ມຄອງຕໍ່ໄປ ເຊີ່ງເປັນກຽດເຊັນມອບໂດຍ ທ່ານ ຊາຍຄໍາ ກຸນນາວົງ ຮອງຫົວໜ້າພະແນກກະສິກໍາ ແລະ ປ່າໄມ້ ແຂວງ ແລະ ເຊັນຮັບໂດຍທ່ານ ອາລຸນສັກ ປະທໍາມະວົງ ຮອງເຈົ້າເມືອງວຽງທອງ ໂດຍຊ້ອງໜ້າທ່ານ ວັນວິໄລ ແດນພູຫຼວງ ຮອງເລຂາພັກແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.
Users Today : 781
Users Yesterday : 494
This Month : 8622
This Year : 128659
Total Users : 514883
Who's Online : 45