ຂົງເຂດວັດທະນະທຳ-ສັງຄົມ ເຊື່ອມຊືມເອກະສານກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ

        ກອງປະຊຸມ ເຜີຍແຜ່ເອກະສານ ກ່ຽວກັບການຈັດຕັ້ງປະຕິບັດ ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ ( 2021-2023 ) ໄດ້ຈັດຂື້ນໃນຕອນເຊົ້າຂອງວັນທີ 22 ພະຈິກ 2021 ຢູ່ທີ່ສະໂມສອນໃຫຍ່ຂອງແຂວງ ໃຫ້ກຽດເຜີຍແຜ່ໂດຍ ທ່ານ ປອ ສຸວັນນີ ໄຊຊະນະ ຮອງເລຂາພັກແຂວງ ປະທານສະພາປະຊາຊົນແຂວງບໍລິຄຳໄຊ, ມີບັນດາການນຳຂອງແຂວງ, ຫົວໜ້າພະແນກການ, ພ້ອມດ້ວຍພະນັກງານພາຍໃນຂົງເຂດວັດທະນະທຳ-ສັງຄົມ ເຂົ້າຮ່ວມ.

        ໃນກອງປະຊຸມ ໄດ້ຮັບຟັງການເຜີຍແຜ່ ຄຳສັ່ງທ່ານເຈົ້າແຂວງບໍລິຄຳໄຊ  ວ່າດ້ວຍການຈັດຕັ້ງຜັນຂະຫຍາຍວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ສະບັບເລກທີ 22/ຂບຊ ແລະ ຜ່ານຂໍ້ຕົກລົງວ່າດ້ວຍ ການແບ່ງຄວາມຮັບຜິດຊອບ ໃນການຈັດຕັ້ງຜັນຂະຫຍາຍວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຢູ່ແຂວງບໍລິຄຳໄຊ ( 2021-2023 ) ສະບັບເລກທີ 660/ຂບຊ.

      ໃນຊຸມປີຜ່ານມາ ເສດຖະກິດຂອງແຂວງ ໄດ້ປະເຊີນກັບສິ່ງທ້າທາຍຫຼາຍດ້ານ ເຊິ່ງໄດ້ຮັບຜົນກະທົບຈາກປັດໄຈພາຍນອກ ແລະ ພາຍໃນ, ນອກນັ້ນ ຍັງມີບັນຫາໄພທຳມະຊາດ ແລະ ການລະບາດຂອງເຊື້ອພະຍາດໂຄວິດ 19 ນັບແຕ່ປີ 2020 ເປັນຕົ້ນມາ ຍິ່ງເພີ່ມທະວີສ້າງຜົນກະທົບຕໍ່ເສດຖະກິດພາຍໃນຂອງແຂວງ ເຮັດໃຫ້ອັດຕາການຂະຫຍາຍຕົວເສດຖະກິດມີທ່າອ່ຽງຫຼຸດລົງ ໃນໄລຍະ 05 ປີ ຜ່ານມາ ຈາກລະດັບ 8,01% ໃນປີ 2016 ມາເປັນ 2,88% ໃນປີ 2020, ການຄຸ້ມຄອງເສດຖະກິດມະຫາພາກ ມີຄວາມຫຍຸ້ງຍາກ ເນື່ອງຈາກຂາດສະພາບຄ່ອງດ້ານແຫຼ່ງທຶນ, ການປະຕິບັດແຜນລາຍຮັບ-ລາຍຈ່າຍງົບປະມານຍັງມີຄວາມແຕກໂຕນກັນໃນລະດັບທີ່ສູງສົມຄວນ, ລາຍຮັບພູດທ້ອງຖິ່ນໃນ 05 ປີ ( 2016-2020 ) ປະຕິບັດໄດ້ 964.67 ຕື້ກີບ ເທົ່າກັບ 3.61%, ຂອງລວມຍອດຜະລິດຕະພັນພາຍໃນແຂວງ ( GPP ), ກົງກັນຂ້າມ ໃນ 05 ປີ, ມີຍອດລາຍຈ່າຍທັງໝົດ 2,346.09 ຕື້ກີບ ກວມເອົາ 8.79% ຂອງລວມຍອດພະລິດຕະພັນພາຍໃນແຂວງ ( GPP ).

     ແຂວງບໍລິຄຳໄຊ ມີຍອດໜີ້ສິນຕິດພັນກັບງົບປະມານ, ຕາມຜົນສໍາເລັດຂອງໜ້າວຽກທັງໝົດ 1,335.06 ຕື້ກີບ ກວມເອົາ 20.54% ຂອງຍອດຜະລິດຕະພັນພາຍໃນແຂວງ ( GPP ), ແຕ່ໜີ້ສິນທີ່ຕິດພັນກັບງົບປະມານຕາມສັນຍາການກໍ່ສ້າງມີເຖິງ 4,594.16 ຕື້ກີບ, ຄາດວ່າຈະກວມເອົາ 70.68%, ຂອງລວມຍອດຜະລິດຕະພັນພາຍໃນແຂວງ ( GPP ) ໃນປີ 2021 ລາຍຮັບງົບປະມານພູດທ້ອງຖິ່ນບໍ່ສາມາດກຸ້ມ ຫຼື ດຸ່ນດ່ຽງກັບແຜນລາຍຈ່າຍໄດ້, ຫຼາຍໂຄງການລົງທຶນຂອງລັດມີມູນຄ່າສູງ, ແຕ່ປະສິດທິຜົນຕໍ່າ ທຶນສໍາລະໃນແຕ່ລະປີມີທ່າອ່ຽງຫຼຸດລົງ.

             ເພື່ອເຮັດໃຫ້ການຈັດຕັ້ງປະຕິບັດ ບັ້ນຮົບເສດຖະກິດ ກໍ່ຄືແຜນຜັນຂະຫຍາຍວາລະແຫ່ງຊາດສະບັບນີ້ມີຜົນສຳເລັດ ຈະຕ້ອງຮັບປະກັນໃຫ້ໄດ້ 3 ຫຼັກການ ຄື: ຮັບປະກັນຄວາມເຂັ້ມງວດ, ຮັບປະກັນຄວາມໂປ່ງໃສ ແລະ ຮັບປະກັນຫຼັກດ້ານວິທະຍາສາດ-ວິຊາການ.

 

• Facebook
• Twitter
• Line