ຕອນບ່າຍ ວັນທີ 03 ພະຈິກ 2021 ກອງບັນຊາການ ປກສ ແຂວງບໍລິຄໍາໄຊ ສປປ ລາວ ແລະ ກອງບັນຊາການຕໍາຫຼວດແຂວງ ຮ່າງຕິ່ງ ສສ ຫວຽດນາມ ໄດ້ເປີດກອງປະຊຸມປືກສາຫາລື ແລະ ເປັນເອກະພາບກັນ ກ່ຽວກັບໂຄງການກໍ່ສ້າງຫ້ອງການໃຫ້ ກໍາລັງ ປກສ ບ້ານ ທົ່ວເມືອງຄໍາເກີດ ແຂວງບໍລິຄໍາໄຊ, ເຊີ່ງຝ່າຍກອງບັນຊາການ ປກສ ແຂວງບໍລິຄໍາໄຊ ນໍາໂດຍ ທ່ານ ພັນເອກ ກົງຈັນ ໄຊປັນຍາ ຫົວໜ້າກອງບັນຊາການ ປກສ ແຂວງ ພ້ອມດ້ວຍຄະນະ ແລະ ຝ່າຍ ສສ ຫວຽດນາມ ນໍາໂດຍ ທ່ານ ພັນເອກ ຟ້າມ ແທງເຟືອງ ຮອງຫົວໜ້າກອງບັນຊາການຕໍາຫຼວດແຂວງ ຮ່າຕິ່ງ ພ້ອມດ້ວຍຄະນະ.
ກອງປະຊຸມ ທັງ 02 ຝ່າຍໄດ້ລາຍງານສະພາບການຫຍໍ້ ກ່ຽວກັບການເຮັດວຽກງານປ້ອງກັນຄວາມສະຫງົບຂອບເຂດຊາຍແດນ, ສະພາບການແຜ່ລະບາດຂອງພະຍາດໂຄວິດ 19 ໃຫ້ກັນຮັບຊາບ, ພ້ອມທັງປຶກສາຫາລືກ່ຽວກັບໂຄງການກໍ່ສ້າງ ຫ້ອງການສະຖານທີ່ເຮັດວຽກໃຫ້ກໍາລັງ ປກສ ບ້ານ, ໂດຍໄດ້ຮັບທຶນຊ່ວຍເຫຼືອລ້າ ຈາກລັດຖະບານຫວຽດນາມ.
ໂອກາດດຽວກັນ ທ່ານ ພັນເອກ ກົງຈັນ ໄຊປັນຍາ ຫົວໜ້າກອງບັນຊາການ ປກສ ແຂວງ ໄດ້ກ່າວວ່າ: ພາຍຫຼັງທີ່ໄດ້ຮັບທິດຊີ້ນໍາຈາກຄະນະພັກ-ຄະນະກະຊວງປ້ອງກັນຄວາມສະຫງົບ, ກໍ່ໄດ້ລົງຕິດຕາມກວດກາ, ອະທິບາຍຊີ້ແຈ້ງໃຫ້ອໍານາດການປົກຄອງທ້ອງຖິ່ນ, ພໍ່ແມ່ປະຊາຊົນ ໄດ້ຮັບຮູ້ເຂົ້າໃຈ ແລະ ເຫັນດີເຫັນພ້ອມຕໍ່ກັບໂຄງການດັ່ງກ່າວ ແລະ ຈະອໍານວຍຄວາມສະດວກທາງດ້ານເນື້ອທີ່ດີນບ່ອນຈະກໍ່ສ້າງ, ອໍານວຍຄວາມສະດວກດ້ານເອກະສານ, ນິຕິກໍາ ແລະ ກົດໝາຍ, ອໍານວຍຄວາມສະດວກໃຫ້ແກ່ ຕໍາຫຼວດ ແຂວງຮ່າຕິ່ງ ແລະ ຜູ້ຮັບເໝົາໂຄງການ, ໃນເວລາດໍາເນີນການກໍ່ສ້າງ, ພ້ອມທັງຮັບປະກັນຄວາມສະຫງົບຄວາມເປັນລະບຽບຮຽບຮ້ອຍໃນຂອບເຂດບໍລິເວນກໍ່ສ້າງ.
ທ່ານ ພັນເອກ ຟ້າມ ແທງເຟືອງ ຮອງຫົວໜ້າກອງບັນຊາການຕໍາຫຼວດແຂວງ ຮ່າຕິ່ງ ໄດ້ກ່າວວ່າ: ໂດຍປະຕິບັດຕາມແນວທາງຂອງ ກະຊວງຕໍາຫຼວດຫວຽດນາມ ກ່ຽວກັບການຊ່ວຍເຫຼືອປະເທດລາວ ກໍ່ສ້າງຫ້ອງການບ່ອນປະຈໍາການຢູ່ບັນດາບ້ານ ທີ່ມີຊາຍແດນຕິດຈອດກັບ ສສ ຫວຽດນາມ, ຈື່ງໄດ້ປະສານສົມທົບກັບ ກອງບັນຊາການ ປກສ ແຂວງບໍລິຄໍາໄຊ ເພື່ອດໍາເນີນການສໍາຫຼວດພື້ນທີ່ບ່ອນຈະກໍ່ສ້າງ.
ຜ່ານການລົງສໍາຫຼວດກວດກາ, ປຶກສາຫາລື ແລະ ເປັນເອກະພາບກັນ ຈື່ງໄດ້ສ້າງບົດບັນທຶກ ກ່ຽວກັບການສໍາຫຼວດ, ສະຖານທີ່ຈະເຮັດຫ້ອງການ ໃຫ້ແກ່ ປກສ ບ້ານ ທີ່ມີຊາຍແດນຕິດກັບ ແຂວງຮ່າຕິ່ງ ແລະ ແຂວງບໍລິຄໍາໄຊ ເຊີ່ງເນື້ອໃນ ໄດ້ກໍານົດເອົາ 05 ບ້ານທີ່ຈະລົງມືກໍ່ສ້າງ, ໃນນັ້ນ ມີ ບ້ານ ທົ່ງແປ, ບ້ານ ນາແປ, ບ້ານ ນາທ່ອນ, ບ້ານ ນາເມືອງ ແລະ ບ້ານ ນາຫາດ.
ສໍາລັບການກໍ່ສ້າງແມ່ນ ກະຊວງຕໍາຫຼວດຫວຽດນາມ ເປັນຜູ້ລົງທືນດ້ານງົບປະມານທັງໝົດ, ເປັນຜູ້ດໍາເນີນການກໍ່ສ້າງຈົນກວ່າຈະສໍາເລັດ ແລ້ວຈື່ງມອບໃຫ້ ກະຊວງປ້ອງກັນຄວາມສະຫງົບ ສປປ ລາວ ນໍາໃຊ້, ສໍາລັບແບບອາຄານຫ້ອງການດັ່ງກ່າວ ແມ່ນກໍານົດເອົາຕາມແບບກະຊວງຕໍາຫຼວດຫວຽດນາມ ກໍານົດໃຫ້, ເຊີ່ງໄດ້ກວມເອົາ ເນື້ອທີ່ກໍ່ສ້າງ 67 ຕາແມັດ, ເນື້ອທີ່ການຮັບໃຊ້ແມ່ນ 46 ຕາແມັດ, ອາຄານມີຂະໜາດ 4,80 ແມັດ ຄູນ 9,20 ແມັດ, ໃນນັ້ນຈະມີຫ້ອງເຮັດວຽກ, ຫໍພັກ, ເຮືອນຄົວ ແລະ ຫ້ອງນໍ້າ, ຕິດຕັ້ງໄຟຟ້າ, ນໍ້າປະປາ ຄົບຊຸດ.
ໂຄງການດັ່ງກ່າວ ຈະລົງມືກໍ່ສ້າງເລີ່ມແຕ່ກາງເດືອນ ພະຈິກ 2021 ເປັນຕົ້ນໄປ, ພາຍຫຼັງສອງຝ່າຍໄດ້ສ້າງບົດບັນທືກຮ່ວມກັນແລ້ວ ຍັງຈະສືບຕໍ່ປະສານສົບທົບຊ່ວຍເຫຼືອກັນ ແລະ ລົງຕິດຕາມກວດກາຄວາມຄືບໜ້າໂຄງການຮ່ວມກັນເປັນແຕ່ລະໄລຍະ ຈົນກວ່າຈະກໍ່ສ້າງສໍາເລັດ ແລະ ມອບໃຫ້ຝ່າຍລາວນໍາໃຊ້ຢ່າງເປັນທາງການ.
Users Today : 573
Users Yesterday : 494
This Month : 8414
This Year : 128451
Total Users : 514675
Who's Online : 38