ຫົວໜ້າສະເພາະກິດຂັ້ນແຂວງ ເຄື່ອນໄຫວວຽກງານຢູ່ເມືອງປາກກະດິງ

ໃນວັນທີ 26 ຕຸລາ 2021 ທ່ານ ຄຳແຫວນ ປັນຍານຸວົງ ຮອງເຈົ້າແຂວງບໍລິຄຳໄຊ ຫົວໜ້າສະເພາະກິດຂັ້ນແຂວງ ພ້ອມຄະນະ ໄດ້ລົງຊີ້ນຳວຽກງານປ້ອງກັນ, ຄວບຄູມ ແລະ ການແກ້ໄຂ ການລະບາດພະຍາດໂຄວິດ-19 ຢູ່ເມືອງປາກກະດິງ ໂດຍມີທ່ານ ສົມພອນ ຈັນທະນາສຸກ ເຈົ້າເມືອງ ປາກກະດິງ ແລະ ຄະນະສະເພາະກິດຂັ້ນເມືອງ ຮ່ວມພາທາງ.

ທ່ານ ສົມພອນ ຈັນທະນາສຸກ ໄດ້ລາຍງານໃຫ້ຮູ້ວ່າ: ຄະນະສະເພາະກິດຂັ້ນເມືອງ ໄດ້ສືບຕໍ່ຈັດຕັ້ງຜັນຂະຫຍາຍບັນດານິຕິກຳ, ເອກະສານຕ່າງໆ ຂອງຂັ້ນເທີງ ມາເປັນຂອງເມືອງ, ມີພະນັກງານປະຈໍາການສູນກັກກັນຂອງເມືອງ 3 ພາກສ່ວນ ຄື: ກອງກໍາລັງ ປກຊ-ປກສ ແລະ ພະນັກງານແພດປະຈໍາ ເປັນປົກກະຕິ.

ເມືອງປາກກະດິງ ມີສູນກັກກັນຂອງເມືອງ 7 ແຫ່ງ ແລະ ມີສູນກັກກັນຢູ່ຂັ້ນບ້ານຈໍານວນ 5 ແຫ່ງ, ສໍາລັບແຮງງານລາວທີ່ມາຈາກພື້ນທີ່ ທີ່ມີການແຜ່ລະບາດແມ່ນໄດ້ບັນທຶກປະຫວັດການເຄື່ອນໄຫວ, ສຳລັບບຸກຄົນທີ່ເດີນທາງມາຈາກພື້ນທີ່ສ່ຽງ ພາຍໃນປະເທດທີ່ມີການລະບາດ ແຕ່ບໍ່ມີການສຳພັດ ຫຼື ຄວາມສ່ຽງຕໍ່ພະຍາດ ໂຄວິດ-19 ກຳນົດເອົາເຮືອນເປົ່າຫວ່າງ 37 ແຫ່ງ (ສຳລັບ 30 ບ້ານ) ແລະ ສະໂມສອນບ້ານ 10 ບ້ານເປັນສູນກັກກັນ.

ທົ່ວເມືອງມີຜູ້ເຂົ້າສູນກັກກັນພ້ອມທັງເກັບຕົວຢ່າງ 1.773 ຄົນ, ພົບກໍລະນີຕິດເຊື້ອ 265 ຄົນ, ປິ່ນປົວຫາຍດີ 80 ຄົນ, ກຳລັງປີ່ນປົວ 185 ຄົນ ແລະ ເຂື່ອນໄຟຟ້ານໍ້າຕົກນໍ້າເທີນ 1 ພົບກໍລະນີຕິດເຊື້ອ 84 ປິ່ນປົວຫາຍດີ ແລ້ວ 84 ຄົນ, ສຳລັບການຮັບແຮງງານພາຍໃນເມືອງທີ່ກັບຈາກຕ່າງປະເທດ ທີ່ມີຈຸດປະສົງເດີນທາງກັບຄືນພູມລໍາເນົາ ກໍ່ຄືເຂົ້າສູນກັກກັນໃນແຕ່ລະວັນ ແມ່ນໄດ້ຮັບຄວາມຊ່ວຍເຫຼືອຈາກກູ້ໄພເຈົ້າໂຕ້ງກູ້ຊິບ.

ປະຈຸບັນ ເຫັນວ່າຄະນະສະເພາະກິດປ້ອງກັນ, ຄວບຄູມ ແລະ ການແກ້ໄຂ ການລະບາດພະຍາດໂຄວິດ-19 ເມືອງ ປາກກະດິງ ຍັງມີສີ່ງທ້າທາຍຫຼາຍດ້ານ ຍ້ອນວ່າການແຜ່ລະບາດຂອງເຊື້ອພະຍາດພາຍໃນ ຍັງເກີດລະບາດຕໍ່ເນືອງ.

ໂອກາດນີ້ ທ່ານ ຄຳແຫວນ ປັນຍານຸວົງ ຍັງໄດ້ເນັ້ນໃຫ້ຄະນະສະເພາະກິດຂັ້ນເມືອງ ຈົ່ງໄດ້ເພີ່ມທະວີອົາໃຈໃສ່ຢ່າງເຂັ້ມງວດ ໃນການຜັນຂະຫຍາຍບັນດາຄຳສັ່ງຂອງຂັ້ນເທີງ, ລົງຕິດຕາມໃກ້ຊິດກັບອຳນາດການປົກຄອງຂັ້ນບ້ານ ໃນການຕິດຕາມ, ກວດກາ ບັນດາກູ່ມຄົນທີ່ມີຄວາມສຽ່ງ, ໂດຍສະເພາະແມ່ນບັນດາສູນກັກກັນ ຕ້ອງຮັບປະກັນດ້ານສຸຂະອະນາໄມ ທັງພະນັກງານ ແລະ ຈຳນວນພົນລະເຮືອນ ທີ່ຢູ່ໃນກູ່ມສ່ຽງຕິດຕາມອາການ, ສືບຕໍ່ໂຄສະນາປະຊາສຳພັນໃຫ້ເປັນວົງກວ້າງ ຕໍ່ເນື່ອງ ຜົນຮ້າຍຂອງພະຍາດໂຄວິດ-19 ໃຫ້ປະຊາຊົນໄດ້ຮັບຮູ້ ແລະ ເຂົ້າໃຈ, ຈຸດປະສົງ ກໍ່ເພື່ອເຮັດໃຫ້ການແຜ່ລະບາດພາຍໃນຫຼຸດນ້ອຍຖອຍລົງເທື່ອລະກ້າວ.

ໂອກາດທີ່ທ່ານຮອງເຈົ້າແຂວງ ລົງເຄື່ອນໄຫວວຽກງານຢູ່ເມືອງປາກກະດິງ ໃນຄັ້ງນີ້ ຍັງໄດ້ນຳເອົາເຄື່ອງ ອຸປະໂພກ-ບໍລິໂພກຈຳນວນໜື່ງ ມາມອບໃຫ້ຄະນະສະເພາະກິດເມືອງ ເພື່ອນຳໃຊ້ເຂົ້າໃນວຽກງານປະວັນ.

• Facebook
• Twitter
• Line