ບໍລິຄຳໄຊ ເຜີຍແຜ່ນິຕິກຳຂອງຂະແໜງສຶກສາທິການ ແລະ ກິລາ

ກອງປະຊຸມ ເຜີຍແຜ່ນິຕິກຳຂອງຂະແໜງສຶກສາທິການ ແລະ ກິລາ ໄດ້ຈັດຂຶ້ນໃນຕອນເຊົ້າຂອງວັນທີ 30 ສິງຫາ 2021 ຢູ່ສະໂມສອນໃຫຍ່ຂອງແຂວງ ໃຫ້ກຽດເຜີຍແຜ່ ໂດຍທ່ານ ຄຳແຫວນ ປັນຍານຸວົງ ຮອງເຈົ້າແຂວງບໍລິຄຳໄຊ, ມີຄະນະພະແນກ, ອຳນວຍການໂຮງຮຽນ, ຄູອາຈານ ພ້ອມດ້ວຍພະນັກງານພາຍໃນພະແນກສຶກສາທິການ ແລະ ກິລາແຂວງ ເຂົ້າຮ່ວມ.

ທ່ານ ຄຳແຫວນ ປັນຍານຸວົງ ໄດ້ຍົກໃຫ້ເຫັນບາງເນື້ອໃນທີ່ສຳຄັນຂອງເອກະສານການຝຶກຝົນຫຼໍຫຼອມຄຸນທາດການເມືອງ ຄຸນສົມບັດສິນທຳປະຕິວັດ ແລະ ແບບແຜນວິທີເຮັດວຽກ: ຄຸນທາດການເມືອງ ແມ່ນອົງປະກອບອັນໜຶ່ງທີ່ສຳຄັນ ຢູ່ໃນຄຸນນະພາບຂອງສະມາຊິກພັກແຕ່ລະສະຫາຍ, ແມ່ນມາດຕະຖານແຖວໜ້າ, ແມ່ນຄວາມຮຽກຮ້ອງຕ້ອງການທີ່ຂາດບໍ່ໄດ້ ທັງເປັນພື້ນຖານໃຫ້ແກ່ການຝຶກຝົນຫຼໍ່ຫຼອມຄຸນສົມບັດສິນທຳປະຕິວັດ ແລະ ການເຄື່ອນໄຫວໜ້າທີ່ວຽກງານປະຈຳວັນຂອງພະນັກງານ-ສະມາຊິກພັກ, ມີຄວາມເຊື່ອໝັ້ນຕໍ່ອຸດົມການສັງຄົມນິຍົມ, ມີຫຼັກໝັ້ນມິດ-ສັດຕູອັນຈະແຈ້ງ, ມີຄວາມຮູ້ກ່ຽວກັບລັດທິມາກ-ເລນິນ ແລະ ແນວທາງນະໂຍບາຍຂອງພັກຢ່າງເລິກເຊິ່ງ, ມີຄວາມຮັບຜິດຊອບຕໍ່ໜ້າທີ່ວຽກງານທີ່ໄດ້ຮັບມອບໝາຍສູງ, ເຊື່ອໝັ້ນຕໍ່ກຳລັງແຮງ ແລະ ສະຕິປັນຍາຂອງມະຫາຊົນຢ່າງໜັກແໜ້ນ ເຄົາລົບ ແລະ ປະຕິບັດກົດລະບຽບຂອງພັກ, ກົດໝາຍຂອງລັດຢ່າງເຂັ້ມງວດ, ມີນ້ຳໃຈເສຍສະຫຼະເພື່ອຊາດ ເພື່ອປະຊາຊົນ ແລະ ມີຄວາມດຸໝັ່ນ, ພາກພຽນ ຊື່ສັດ ປະຢັດ ແລະ ປອດໃສ, ມີຄວາມສຸພາບຮຽບຮ້ອຍ ແລະ ເຮັດແທ້ທຳຈິງ ບຸກບືນຮຽນຮູ້ ແລະ ພັດທະນາຕົນເອງ.

ພ້ອມນີ້ ຕ້ອງອອກແຮງຄົ້ນຄວ້າຮ່ຳຮຽນລັດທິມາກ-ເລນິນເປັນປະຈຳ, ເຂົ້າຮ່ວມດຳເນີນຊີວິດ ສຳຫຼວດກວດກາເປັນປົກກະຕິ, ເອົາໃຈໃສ່ປັບປຸງທັດສະນະໃຫ້ໜັກແໜ້ນດ້ວຍການຕັ້ງໜ້າເຂົ້າຮ່ວມຂະບວນການຂອງມະຫາຊົນ, ເອົາໃຈໃສ່ປັບປຸງທັດສະນະຫຼັກໝັ້ນຊົນຊັ້ນໃຫ້ໜັກແໜ້ນ, ເອົາໃຈໃສ່ກໍ່ສ້າງ ແລະ ປັບປຸງພັກປອດໃສ, ເຂັ້ມແຂງ, ໜັກແໜ້ນຮອບດ້ານ ແລະ ສະມາຊິກພັກທຸກສະຫາຍ ຕ້ອງມີຄວາມຕັດສິນໃຈສູງໃນການຝຶກຝົນຫຼໍ່ຫຼອມຕົນເອງ ໂດຍເລີ່ມຈາກການຍົກສູງຄວາມຮັບຜິດຊອບຕໍ່ໜ້າທີ່ວຽກງານ, ກ້າຫານປ່ຽນແປງຕົນເອງ, ຮັບເອົາຄຳຕິຊົມຈາກຄົນອຶ່ນດ້ວຍຄວາມຈິງໃຈ ແລະ ຕ້ານລັດທິເອກະຊົນ ແນວຄິດຂີ້ຄ້ານມັກງ່າຍ, ຄັບແຄບ ອວດອົ່ງທະນົງຕົວ.

ກອງປະຊຸມ ຈະໄດ້ຮັບຟັງການເຜີຍແຜ່ກົດໝາຍວ່າດ້ວຍການສຶກສາ ສະບັບປັບປຸງ ກົມຈັດຕັ້ງ ແລະ ພະນັກງານ, ດຳລັດວ່າດ້ວຍຈັນຍາບັນພະນັກງານ-ລັດຖະກອນ, ຫຼັກການຄຸ້ມຄອງໂຮງຮຽນ, ຄວາມເປັນຜູ້ນຳ ການນຳພາ ແລະ ການຄຸ້ມຄອງ, 3 ລັກສະນະ 5 ຫຼັກມູນ 3 ຂໍ້ແຂ່ງຂັນ, ແຜນພັດທະນາຂະແໜງສຶກສາ ແລະ ກິລາ 2021-2025 ຂອງສູນກາງ ແລະ ແຂວງ, ຜົນສຳເລັດຂອງການຈັດຕັ້ງປະຕິບັດ 15 ຄາດໝາຍຂອງແຂວງ-ເມືອງ, ຄຸນສົມບັດ ແລະ ຈັນຍາບັນຄູ. ກອງປະຊຸມຈະໄດ້ດຳເນີນໄປເປັນເວລາ 2 ວັນຈຶ່ງຈະສຳເລັດ.

• Facebook
• Twitter
• Line