ເປີດຝືກອົບຮົມ ວຽກງານກໍ່ສ້າງຮາກຖານການເມືອງ ຕິດພັນກັບວຽກງານປ້ອງກັນຄວາມສະຫງົບ

ພິທີເປີດຝຶກອົບຮົມ ວຽກງານກໍ່ສ້າງຮາກຖານການເມືອງ ຕິດພັນກັບວຽກງານປ້ອງກັນຄວາມສະຫງົບຮອບດ້ານ ໃຫ້ແກ່ 2 ກຸ່ມບ້ານ ຄື: ກຸ່ມປາກທອນ ແລະ ກຸ່ມປາກກະດິງ ເມືອງປາກກະດິງ ແຂວງບໍລິຄຳໄຊ ໄດ້ຈັດຂື້ນໃນວັນທີ 26 ສິງຫາ 2021 ໂດຍການເປັນກຽດເຂົ້າຮ່ວມເປັນປະທານຂອງ ທ່ານ ພົຕ ປອ ທອງເຫຼັກ ມັງໜໍ່ເມກ ຮອງລັດຖະມົນຕີກະຊວງ ປກສ ແລະ ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ.

ທ່ານ ພັອ ກົງຈັນ ໄຊປັນຍາ ຫົວໜ້າກອງບັນຊາການ ປກສ ເເຂວງ ບໍລິຄຳໄຊ ກ່າວວ່າ: ການຝຶກອົບຮົມໃນຄັ້ງນີ້ ເພື່ອປະຕິບັດຕາມຄຳສັ່ງຂອງທ່ານເຈົ້າແຂວງບໍລິຄຳໄຊ, ແຜນແມ່ບົດຂອງກະຊວງປ້ອງກັນຄວາມສະຫງົບ, ແຜນການ ແລະ ຂໍ້ຕົກລົງ ວ່າດ້ວຍການຫັນເອົາກໍາລັງລົງກໍ່ສ້າງຮາກຖານການເມືອງ ໃນການຈັດຕັ້ງປະຕິບັດແນວທາງປ້ອງກັນຊາດ – ປ້ອງກັນຄວາມສະຫງົບ ໄລຍະໃໝ່, ເພື່ອຍົກສູງລະດັບວຽກງານວິຊາສະເພາະ ໃຫ້ແກ່ພະນັກງານກໍ່ສ້າງຮາກຖານ ກໍາໄດ້ລະບຽບ, ຫຼັກການ ທາງດ້ານວິຊາສະເພາະ, ແນວທາງນະໂຍບາຍຂອງພັກ-ກົດໝາຍຂອງລັດ, ຮູ້ໝຸນໃຊ້ບົດຮຽນ, ພຶດຕິກໍາຕົວຈິງ ແລະ ຮັບຮູ້ເຂົ້າໃຈກ່ຽວກັບບາດກ້າວ, ຂັ້ນຕອນການຫັນກໍາລັງລົງກໍ່ສ້າງຮາກຖານການເມືອງ, ເຮັດໃຫ້ພະນັກງານກໍ່ສາ້ງຮາກຖານ ນຳໄປຈັດຕັ້ງປະຕິບັດຢູ່ຮາກຖານໃຫ້ປະກົດຜົນເປັນຈິງ.

ຝຶກອົບຮົມຄັ້ງນີ້ ພະນັກງານກໍ່ສ້າງຮາກຖານ ຍັງໄດ້ຮັບຟັງການເຜີຍແຜ່ບັນດາຂໍ້ຕົກລົງ, ຄຳສັ່ງ, ແຜນແມ່ບົດ ແລະ ສຶກສາຄົ້ນຄວ້າບັນດາເອກະສານຕ່າງໆ ເຊັ່ນ: ຂໍ້ກຳນົດກົດລະບຽບຂອງພະນັກງານກໍ່ສ້າງຮາກຖານ, ວຽກງານ 03 ສ້າງ, ມະຕິ 8 ວ່າດ້ວຍການປັບປຸງອຳນາດການປົກຄອງຂັ້ນບ້ານ, ວຽກງານຈົດທະບຽນສຳມະໂນຄົວລາວ-ຊາວຕ່າງດ້າວ, ວຽກງານຄຸ້ມຄອງອາຊີບ-ພາຫະນະພິເສດ, ການຈັດຕັ້ງການເຄື່ອນໄຫວຂອງກຳລັງ ປກສ ກຸ່ມ, ປກສ ບ້ານ, ວຽກງານຄຸ້ມຄອງຄົນຕ່າງປະເທດ ແລະ ວຽກງານຕ້ານ-ສະກັດກັ້ນ ອາຊະຍາກຳອື່ນໆ ທີ່ຕິດພັນກັບວຽກງານວິຊາສະເພາະ ເພື່ອໃຫ້ພະນັກງານກໍ່ສ້າງຮາກຖານກຳໄດ້ ແລະ ນຳໄປຈັດຕັ້ງຜັນຂະຫຍາຍ ຢູ່ບັນດາຈຸດຕ່າງໆ ທີ່ຈະລົງປະຕິບັດຕົວຈິງ, ການຝືກອົບຮົມວຽກງານກໍ່ສ້າງຮາກຖານການເມືອງໃນຄັ້ງນີ້ ແມ່ນຈະໄດ້ດຳເນີນໄປເປັນເວລາ 6 ວັນ ເລີ່ມແຕ່ວັນທີ 26 ສິງຫາ 2021 ຫາ ວັນທີ 31 ສິງຫາ 2021 ຈິ່ງຈະສຳເລັດ.

ໂອກາດດຽວກັນ ຄະນະປະທານກໍ່ໄດ້ໂອ້ລົມຕໍ່ພະນັກງານລົງກໍ່ສ້າງຮາກຖານການເມືອງໃນຄັ້ງນີ້ວ່າ: ໃຫ້ຄະນະບັນຊາທຸກຂັ້ນ ພ້ອມດ້ວຍພະນັກງານວິຊາສະເພາະຈົ່ງເອົາໃຈໃສ່ປະສານສົມທົບກັນຢ່າງກົມກຽວໃນທຸກບາດກ້າວຂອງການປະຕິບັດໜ້າທີ່ວຽກງານ ເພື່ອຮັບປະກັນໄດ້ເຖິງຜົນສໍາເລັດຕາມລະດັບຄາດໝາຍທີ່ວາງໄວ້ ແລະ ສາມາດຮັບປະກັນເຮັດໃຫ້ບັນດາພະນັກງານວິຊາສະເພາະຂອງແຂວງ, ເມືອງ, ເຂົ້າໃຈແຈ້ງ, ລົງໃກ້ຊິດຕິດແທດ, ສຶກສາອົບຮົມພໍ່ແມ່ປະຊາຊົນ, ນໍາເອົາບັນດາເອກະສານທີ່ສໍາຄັນ ລົງໄປເຜີຍແຜ່ເຊື່ອມຊຶມຮັບຮູ້ເຂົ້າໃຈ, ປະຕິບັດຕາມລະບຽບກົດໝາຍ ແລະ ພ້ອມກັນຈັດຕັ້ງປະຕິບັດໃຫ້ຖືກວິທີຕາມແຜນການທີ່ໄດ້ກຳນົດໄວ້, ແກ້ໄຂຕໍ່ກັບບັນດາເປົ້າໝາຍທີ່ຈະກໍ່ຄວາມບໍ່ສະຫງົບ ແລະ ຄວາມບໍ່ເປັນລະບຽບຮຽບຮ້ອຍທາງດ້ານສັງຄົມໃຫ້ໝົດໄປ.

 

• Facebook
• Twitter
• Line