ເຜີຍແຜ່ເນື້ອໃນປື້ມຄູ່ມືສື່ມວນຊົນ ກັບ ສິດທິເດັກ ໃຫ້ 5 ແຂວງ

ກອງປະຊຸມ ເຜີຍແຜ່ເນື້ອໃນປື້ມຄູ່ມືສື່ມວນຊົນ ກັບ ສິດທິເດັກ ໄດ້ຈັດຂຶ້ນໃນວັນທີ 25 ສິງຫາ 2021 ຢູ່ຫ້ອງປະຊຸມໂຮງແຮມແສງຮຸ່ງເຮືອງ ເມືອງປາກຊັນ ແຂວງບໍລິຄຳໄຊ, ໃຫ້ກຽດເຂົ້າຮ່ວມຂອງທ່ານ ສະຫວັນຄອນ ຣາຊະມຸນຕີ ປະທານສະມາຄົມນັກຂ່າວ ແຫ່ງ ສປປ ລາວ, ທ່ານ ສົນທອງ ວີບຸນກວ້າງ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງບໍລິຄຳໄຊ ແລະ ທ່ານ ຕະບອງເພັດ ພຸດທະວົງ ຜູ້ຊ່ຽວຊານດ້ານສື່ມວນຊົນ ອົງການຢູນີເຊັບປະຈຳລາວ, ມີຄະນະຮັບຜິດຊອບຈາກກະຊວງ ຖວທ, ບັນດາທ່ານສື່ມວນຊົນຈາກແຂວງບໍລິຄຳໄຊ, ສະຫວັນນະເຂດ, ໄຊສົມບູນ, ຄຳມ່ວນ ແລະ ແຂວງຈຳປາສັກ ເຂົ້າຮ່ວມ.

ຊຸດອົບຮົມ ຈະໄດ້ເຊື່ອມຊືມ ປື້ມຄູ່ມືກ່ຽວກັບສິດທິເດັກ ທີ່ໄດ້ກຳນັດລະບຽບການ, ຫຼັກການໃນການປົກປ້ອງ, ສົ່ງເສີມສິດທິເດັກ ແລະ ຊ່ວຍໃຫ້ເດັກໄດ້ມີບົດບາດໃນສື່ມວນຊົນ, ເຊິ່ງປື້ມສື່ມວນຊົນ ກັບ ສິດທິເດັກ ໄດ້ສັງລວມເອົາບັນຫາສຳຄັນ ແລະ ນິຕິກຳຕ່າງໆ ມາຜັນຂະຫຍາຍແນະນຳ ເປັນຕົ້ນແມ່ນ ການດຳລົງຊີວິດປອດໄພ ແລະ ໄດ້ຮັບການພັດທະນາທາງດ້ານຮ່າງກາຍ, ໄດ້ຮັບການເບິ່ງແຍງດູແລສຸຂະພາບ, ການສຶກສາເພື່ອໃຫ້ມີຄຸນສົມບັດ, ຄວາມຮູ້ຄວາມສາມາດ, ພອນສະຫວັນ ການກໍ່ສ້າງວິຊາຊີບ ມີວຽກເຮັດງານທຳ, ພ້ອມທັງໄດ້ຮັບການປົກປ້ອງຈາກຂໍ້ມູນຂ່າວສານ ທີ່ເປັນອັນຕະລາຍຕໍ່ເດັກ ແລະ ໄດ້ຮັບສິດທິອື່ນໆ ຕາມທີ່ໄດ້ກຳນົດໄວ້ໃນກົດໝາຍ.

         ພ້ອມນີ້ ຜູ້ເຂົ້າຮ່ວມຈະໄດ້ຮັບຮູ້ເຖິງຄວາມເປັນມາປື້ມຄູ່ມື ສື່ມວນຊົນ ກັບ ສິດທິເດັກ, ນິຕິກຳທີ່ກ່ຽວຂ້ອງ, ຄຳແນະນຳການລາຍງານຂ່າວກ່ຽວກັບເດັກ, ການຮັກສາຂໍ້ມູນກ່ຽວກັບເອກະລັກຂອງເດັກ, ຄວາມຄິດເຫັນຂອງເດັກ ແລະ ສິດທິພົນລະເມືອງ, ການມີສ່ວນຮ່ວມຂອງເດັກກັບສື່ມວນຊົນ.

ນອກນັ້ນ ຍັງຈະໄດ້ມີການຖາມ-ຕອບ, ແບ່ງກຸ່ມຂຽນຂ່າວ ພ້ອມຂຶ້ນສະເໜີແຕ່ລະກຸ່ມ. ຊຸດອົບຮົມດັ່ງກ່າວນີ້ ຈະໄດ້ດຳເນີນໄປເປັນເວລາ 3 ວັນຈຶ່ງຈະສຳເລັດ.

• Facebook
• Twitter
• Line