ພົ້ນໂທດ ແຕ່ບໍ່ເຂັດຫລາບ ຖືກຈັບດໍາເນີນຄະດີອີກຄັ້ງ

ວັນທີ 26 ກໍລະກົດ 2021 ເຈົ້າໜ້າທີ່ ໜ່ວຍງານຄະດີອາຍາ ໄດ້ຮັບການລາຍງານຈາກພົນລະເມືອງດີ ວ່າ: ມີ ທ້າວ ເມັ່ງວ່າງ , ອາຍຸ 25ປີ, ປະຊາຊົນ ບ້ານ ສີສະຫວາດ ເມືອງບໍລິຄັນ ແຂວງບໍລິຄຳໄຊ, ກຳລັງ ມ້າງຊີ້ນສ່ວນລົດຈັກຢູ່ທີ່ເຮືອນຂອງພວກກ່ຽວ ໂດຍບໍ່ຮູ້ທີ່ມາຂອງລົດ, ເຈົ້າໜ້າທີ່ວິຊາສະເພາະ ຈື່ງລົງກວດກາສະຖານທີ່ເກີດເຫດ, ເຫັນວ່າ ມີມູນຄວາມຈິງ ຈຶ່ງກັກຕົວ ທ້າວ ເມັ່ງວ່າງ ມາທຳການສຶບສວນ-ສວນສວນຫາສາເຫດ.

ຜ່ານການສຶບສວນ-ສອບສວນຂອງເຈົ້າໜ້າທີ່ວິຊາສະເພາະ ທ້າວ ເມັ່ງວ່າງ ໄດ້ຮັບສາລະພາບຕໍ່ເຈົ້າໜ້າທີ່ ວ່າ: ໃນໄລຍະປີ 2016 ຜູ້ກ່ຽວແມ່ນໄດ້ຖືກຄະດີມາແລ້ວ 01 ຄັ້ງ ໃນຂໍ້ຫາລັກຊັບພົນລະເມືອງ ( ລັກລົດຈັກ ) ຖຶກສານຕັດສີນຕັດອິດສະຫລະພາບ ຈຳຄຸກ 03 ປີ, ຕົກມາຮອດປີ 2019 ຜູ້ກ່ຽວຈື່ງໄດ້ພົ້ນໂທດອອກມາຢູ່ນຳພໍ່-ແມ່ທີ່ບ້ານ ສີສະຫວາດ ເມືອງບໍລິຄັນ ແຂວງບໍລິຄຳໄຊ.

ວັນທີ 23 ກໍລະກົດ 2021 ເວລາປະມານ 23ໂມງ ທ້າວ ຂ ( ນາມສົມມຸດ ) ໄດ້ໂທລະສັບມາຫາທ້າວຕົນ ບອກໃຫ້ອອກໄປຫາຢູ່ໜ້າຕະຫຼາດເມືອງບໍລິຄັນ ແລະ ໄດ້ຊວນຕົນໄປຊອກລັກລົດຈັກ, ພໍມາຮອດໜ້າຫ້ອງການກະສິກຳ ປ່າໄມ້ ເມືອງ ທັງສອງໄດ້ແວ່ເຂົ້າທາງຮ່ອມກໍ້າຊ້າຍມືທາງໄປນ້ຳຊັນ, ຍ່າງໄປໄດ້ໄລຍະໜື່ງ ຈື່ງເຫັນເຮືອນຫຼັງໜື່ງຢູ່ກ້ຳຊ້າຍມືຕິດແຄມທາງ, ມີລົດຈັກ ໂຄລາວ ສີແດງ ຈອດໄວ້ໜ້າເຮືອນ, ທ້າວ ເມັ່ງວາງ ຈື່ງໄດ້ຢ່າງເຂົ້າໄປຈູງເອົາລົດຈັກຄັນດັ່ງກ່າວ ອອກມາຮອດຫົນທາງ ຈື່ງໄດ້ຕິດຈັກລົດແລ້ວ ຂີ່ຊ້ອນກັນອອກມາຈອດຢູ່ໜ້າຕະຫຼາດ.

ທ້າວ ຂ ໄດ້ຖາມ ຕົນວ່າ: ມີຄົນຊື້ລົດຈັກບໍ່, ຕົນໄດ້ຕອບວ່າ ບໍ່ມີ, ຈາກນັ້ນ ທ້າວ ຂ ຈື່ງບອກໃຫ້ ຕົນເກັບຮັກສາລົດຄັນດັ່ງກ່າວໄວ້, ຖ້າມີຄົນຊື້ແມ່ນໃຫ້ຂາຍ ແລ້ວ ເອົາເງີນມາແບ່ງປັນກັນຕາມລາຄາຕົວຈີງ, ຖ້າບໍ່ມີຄົນຊື້ແມ່ນໃຫ້ຕົນນຳໃຊ້ເລີຍ, ຈາກນັ້ນ ຕົນຈື່ງໄດ້ຂີ່ລົດຈັກກັບມາເຮືອນ, ສ່ວນທ້າວ ຂ ແມ່ນລົງຕໍ່ໜ້າຕະຫຼາດ ແລ້ວບໍ່ຮູ້ວ່າຜູ້ກ່ຽວໄປໃສຕໍ່.

ຮອດວັນທີ 25 ກໍລະກົດ 2021 ຜູ້ກ່ຽວຈື່ງໄດ້ນຳເອົາລົດຈັກຄັນດັ່ງກ່າວອອກມາຈາກບ່ອນທີ່ຊຸກເຊື່ອງໄວ້ ແລ້ວນຳມາມ້າງຊີ້ນສ່ວນ ແລະ ເອົາເຫຼັກສຳໃບມາຖູເລກຈັກ, ເລກຖັງ ເພື່ອບໍ່ໃຫ້ເຈົ້າຂອງຊັບເດີມຈື່ໄດ້, ຕົກມາຮອດວັນທີ 26 ກໍລະກົດ 2021 ຈື່ງຖຶກເຈົ້າໜ້າທີ່ ປກສ ເມືອງບໍລິຄັນກັກຕົວມາ ສືບສວນ-ສອບສວນ.

ຜ່ານການສຶບສວນ-ສອບສວນຂອງເຈົ້າໜ້າທີ່ວິຊາສະເພາະ: ຈື່ງຮູ້ໄດ້ວ່າ ລົດຈັກຄັນດັ່ງກ່າວ ເປັນລົດຂອງທ້າວ ຄຳສອນ ບ້ານ ສີສະຫວາດ ເມືອງບໍລິຄັນ ແຂວງບໍລິຄຳໄຊ, ຕໍ່ກັບການກະທຳຂອງ ທ້າວ ເມັ່ງວ່າງ ແມ່ນມີເຈດຕະນາ ລັກຊັບພົນລະເມືອງຢ່າງແທ້ຈິງ, ການກະທຳດັ່ງກ່າວແມ່ນຜິດຕໍ່ກົດໝາຍອາຍາ ມາດຕາ 231, ວັກ 03 ຂອງປະມວນກົດໝາຍອາຍາ, ສະບັບປັບປຸງ 2017 ແຫ່ງ ສປປ ລາວ, ຕໍ່ກັບຜູ້ຮ່ວມຂະບວນການ ທີ່ກຳລັງເອົາຕົວຫຼົບໜີ ເຈົ້າໜ້າທີ່ວິຊາສະເພາະກຳລັງຕິດຕາມພວກກ່ຽວມາທຳການສຶບສວນສອບສວນ.

ຜ່ານການກວດກາຄວາມຖືກຕ້ອງແລ້ວ ວັນທີ່ 16 ສິງຫາ 2021 ເຈົ້າໜ້າທີ່ວິຊາສະເພາະຈື່ງໄດ້ມອບລົດຈັກ ໂຄລາວ ສີແດງ ເລກ ຈັກ sp85827, ເລກ ຖັງ ysp85827, ບໍ່ມີປ້າຍ ທີ່ຖືກຄົນຮ້າຍລັກໄປ ມາມອບຄືນໃຫ້ເຈົ້າຂອງເດີມ, ກ່າວມອບໂດຍ ຮ້ອຍຕີ ຄຳພຸກ ໄຊຍະວົງ, ກ່າວຮັບ ໂດຍ ທ້າວ ຄຳສອນ ປະຊາຊົນບ້ານ ສີສະຫວາດ ເມືອງບໍລິຄັນ ແຂວງບໍລິຄຳໄຊ.

• Facebook
• Twitter
• Line