ສຳເລັດຝຶກອົບຮົມການບໍລິການໂຮງແຮມ, ເຮືອນພັກ ແລະ ຮ້ານອາຫານ

ເພື່ອຍົກລະດັບຄວາມຮູ້, ທັກສະ ຂອງບັນດາຜູ້ປະກອບການໂຮງແຮມ, ເຮືອນພັກ, ຮ້ານອາຫານ, ຮ້ານບັນເທິງ ແລະ ກິດຈະການດ້ານການທ່ອງທ່ຽວອື່ນໆ ແນ່ໃສ່ໃຫ້ສາມາດບໍລິຫານຈັດການ ແລະ ນໍາພາທຸລະກິດຂອງຕົນ ປະສົບຜົນສຳເລັດ ທາງດ້ານປະລິມານ ແລະ ຄຸນນະພາບໄປຄວບຄູ່ກັນ ສາມາດຕອບສະໜອງຄວາມເພິ່ງພໍໃຈຂອງແຂກ ທີ່ມາໃຊ້ບໍລິການ.

ວັນທີ 13 ສິງຫາ 2021 ຢູ່ທີ່ຫ້ອງປະຊຸມ ໂຮງຮຽນ ມສ ນະຄອນໄຊ ເມືອງຄຳເກີດ ແຂວງບໍລິຄຳໄຊ ໄດ້ຈັດພິທີປິດຝຶກອົບຮົມການບໍລິການໂຮງແຮມ, ເຮືອນພັກ ແລະ ຮ້ານອາຫານ ທີ່ໄດ້ເປີດ ແລະດຳເນີນມາແຕ່ວັນທີ 12 ສິງຫາ 2021, ເປັນປະທານໂດຍ ທ່ານ ນາງ ບຸດສະບາ ຈັນສົມພູ ຫົວຫນ້າພະແນກຝືກອົບຮົມ ກະຊວງຖະແຫຼງຂ່າວ-ວັດທະນະທຳ ແລະ ທ່ອງທ່ຽວ, ເປັນກຽດເຂົ້າຮ່ວມໂດຍທ່ານ ສົມບັດ ສິງຫາລາດ ຮອງຫົວໜ້າຫ້ອງການຖະແຫຼງຂ່າວ-ວັດທະນະທຳ ແລະ ທ່ອງທ່ຽວ ເມືອງຄຳເກີດ, ຄູຝືກທີ່ມາຈາກສະຖາບັນສື່ມວນຊົນ, ຈາກພະແນກ ຖວທ ແຂວງບໍໍລິຄຳໄຊ, ພະນັກງານຫ້ອງການ ຖວທ ຕະຫຼອດຮອດນັກສຳມະນາກອນທີ່ມາຈາກບັນດາໂຮງແຮມ, ເຮືອນພັກ ແລະ ຮ້ານອາຫານ ເຂົ້າຮ່ວມ.

ໃນການຝຶກອົບຮົມຄັ້ງນີ້ ນັກສໍາມະນາກອນໄດ້ຮຽນຮູ້ທາງດ້ານທິດສະດີ ແລະ ການປະຕິບັດຕົວຈີງໄປພ້ອມໆກັນ ຄື: ການບໍລິການແມ່ເຮືອນ, ການບໍລິການອາຫານ ແລະ ເຄື່ອງດື່ມ, ການບໍລິການພາກສ່ວນໜ້າ  (ການເປັນພະນັກງານຕ້ອນຮັບສ່ວນໜ້າທີ່ດີ) ເຮັດໃຫ້ຮູ້ການບໍລິການແຂກຂອງໂຮງແຮມ, ເຮືອນພັກ ແລະ ຮ້ານອາຫານ ຖືກຕ້ອງຕາມລະບຽບຫຼັກການ ມີຄວາມຊຳນານງານໃນການບໍລິການແຂກຕ່າງໆ ທີ່ເຂົ້າມາທ່ອງທ່ຽວ, ເພື່ອປະກອບເປັນວິຊາອາຊີບໃຫ້ຕົນເອງໃນການເຮັດທຸລະກິດ, ການຄຸ້ມຄອງ, ການບໍລິການໃຫ້ສົມຄູ່ກັບການພັດທະນາເສດຖະກິດ ຕາມກົນໄກຕະຫຼາດ ແລະ ເຊື່ອມໂຍງກັບເສດຖະກິດສາກົນ, ນຳໄປໜູນໃຊ້ເຂົ້າໃນວຽກງານທຸລະກິດຂອງຕົນໃຫ້ມີການເຕີບໃຫຍ່ ແລະ ມີຄຸນນະພາບຂຶ້ນກ່ວາເກົ່າ.

ຕອນທ້າຍ ຍັງໄດ້ມອບໃບຢັ້ງຢືນ ຈຳນວນ 28 ໃບ ແລະ ໃບຍ້ອງຍໍໃຫ້ບັນດານັກສຳມະນາກອນ ແລະ ຄູຝຶກ, ໃຫ້ກຽດມອບໂດຍທ່ານ ສົມບັດ ສີງຫາລາດ ຮອງຫົວໜ້າຫ້ອງການ ຖວທ ເມືອງຄຳເກີດ.

• Facebook
• Twitter
• Line