ທ່າພະບາດ ຝຶກອົບຮົມ ກຽມພ້ອມບໍລິການຕະຫຼາດທ່ອງທ່ຽວຈີນ

ເພື່ອເພີ່ມຄວາມຮູ້ ແລະ ຄວາມເຂົ້າໃຈໃຫ້ແກ່ ຜູ້ບໍລິຫານເຈົ້າຂອງກິດຈະການ ໃນຂະແໜງການທ່ອງທ່ຽວ ກ່ຽວກັບຕະຫຼາດທ່ອງທ່ຽວຈີນ ແນ່ໃສ່ໃຫ້ສາມາດສະໜອງການບໍລິການທີ່ປະທັບໃຈແກ່ນັກທ່ອງທ່ຽວ, ຍາດແຍ່ງເອົາຜົນປະໂຫຍດມາໃຫ້ນັກທຸລະກິດ ແລະ ປະເທດຊາດ.

ໃນວັນທີ 10-12 ສິງຫາ 2021 ຢູ່ຫ້ອງປະຊຸມຫ້ອງວ່າການ ເມືອງທ່າພະບາດ ແຂວງບໍລິຄຳໄຊ ໄດ້ເປີດຝຶກອົບຮົມ ກຽມຄວາມພ້ອມສໍາລັບບໍລິການຕະຫຼາດທ່ອງທ່ຽວຈີນ, ໃຫ້ກຽດເຂົ້າຮ່ວມເປີດໂດຍ ທ່ານ ສົນທອງ ວີບຸນກ້ວາງ ຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ, ທ່ານ ຄໍາປຸ່ນ ສີຫາລາດ ຮອງເຈົ້າເມືອງທ່າພະບາດ,  ມີທີມງານຄູຝຶກຈາກກະຊວງ ຖວທ ແລະ ພະແນກ ຖວທ ແຂວງ ພ້ອມດ້ວຍ ສໍາມະນາກອນ 25 ທ່ານ, ຍິງ 15 ທ່ານ ເຂົ້າຮ່ວມ.

ຊຸດຝຶກອົບຮົມໃນຄັ້ງນີ້ ຜູ້ເຂົ້າຮ່ວມຈະໄດ້ຮຽນຮູ້ກ່ຽວກັບປະເທດຈີນ ແລະ ການແບ່ງສ່ວນຕະຫຼາດ, ແຮງຈູງໃຈ ຄວາມຄາດຫວັງ ແລະ ພຶດຕິກໍາຂອງນັກທ່ອງທ່ຽວຈີນ, ການປັບປຸງຜະລິດຕະພັນ ເພື່ອໃຫ້ສະອາດສອດຄ່ອງກັບກຸ່ມຕະຫຼາດເປົ້າໝາຍ, ຊ່ອງທາງການຈັດຈໍາໜ່າຍຜະລິດຕະພັນ ຜ່ານຊ່ອງທາງຕ່າງໆ, ເຊີ່ງການຝຶກອົບຮົມ ດໍາເນີນໃນຮູບແບບການມີສ່ວນຮ່ວມຂອງຜູ້ເຂົ້າຝຶກ ໃນນັ້ນ ມີການເຮັດວຽກເປັນກຸ່ມ, ການຖາມ-ຕອບ, ການນໍາສະເໜີບົດ ແລະ ກິດຈະກໍາອື່ນໆ ທີ່ຕິດພັນກັບເນື້ອໃນບົດຮຽນ ຊຶ່ງລວມແລ້ວແມ່ນມີບັນຍາກາດອັນຟົດຟື້ນມ່ວນຊື່ນ ແລະ ໄດ້ບົດຮຽນ.

ຫຼັງຈາກສໍາເລັດຝຶກອົບຮົມແລ້ວ ກໍ່ໄດ້ມີພິທີມອບໃບຢັ້ງຢືນ ໃຫ້ສໍາມະນາກອນ, ພ້ອມກັນນັ້ນ ຄະນະປະທານ ກໍ່ໄດ້ໃຫ້ທັດສະນະຊີ້ນໍາໂອ້ລົມ ວ່າ ຫຼັງຈາກສໍາເລັດຝຶກອົບຮົມໄປແລ້ວ ຂໍໃຫ້ທຸກໆທ່ານ ຈົ່ງຊ່ວຍນໍາເອົາຄວາມຮູ້ ທີ່ໄດ້ຝຶກອົບຮົມໃນຄັ້ງນີ້ ໄປນໍາໃຊ້ປັບປຸງ ເຂົ້າໃນທຸລະກິດພວກທ່ານໃຫ້ເກີດດອກອອກຜົນ.

• Facebook
• Twitter
• Line