ບໍລິຄໍາໄຊ ຫວນຄືນມູນເຊື້ອ ວັນລັດຖະທຳມະນູນ ຄົບຮອບ 30 ປີ

ພິທີປາຖະກະຖາວັນສ້າງຕັ້ງລັດຖະທຳມະນູນ ໄດ້ຈັດຂຶ້ນໃນວັນທີ 12 ສິງຫາ 2021 ຢູ່ສະໂມສອນໃຫຍ່ຂອງແຂວງ, ຫວນຄືນມູນເຊື້ອໂດຍ ທ່ານ ປອ ສຸວັນນີ ໄຊຊະນະ ປະທານສະພາປະຊາຊົນແຂວງ, ໃຫ້ກຽດເຂົ້າຮ່ວມໂດຍ ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີການນຳຂອງແຂວງ, ນາຍ ແລະ ພົນທະຫານ-ນາຍ ແລະ ພົນຕຳຫຼວດ ແລະ ພະນັກງານລັດຖະກອນ ຈາກພະແນກການອ້ອມຂ້າງແຂວງ ເຂົ້າຮ່ວມ.

ພາຍຫຼັງທີ່ປະເທດຊາດໄດ້ຮັບການປົດປ່ອຍຢ່າງສົມບູນ ໄລຍະທຳອິດ ເປັນໄລຍະຮຳບາດແຜຈາກສົງຄາມ, ເຕົ້າໂຮມສາມັກຄີອັນເປັນປຶກແຜ່ນ ແລະ ວຽກງານປອງດອງຊາດ.

ຮອດປີ 1986 ພັກໄດ້ວາງແນວທາງປ່ຽນແປງໃໝ່ຮອບດ້ານ ໂດຍໄດ້ຫັນການຄຸ້ມຄອງລັດ, ຄຸ້ມຄອງເສດຖະກິດສັງຄົມ ໄປສູ່ລັດຖະທຳມະນູນ ແລະ ກົດໝາຍຢ່າງເປັນເອກະພາບໃນຂອບເຂດທົົ່ວປະເທດ.

ສະພາປະຊາຊົນສູງສຸດ ຊຸດທີ II ຈຶ່ງໄດ້ພິຈາລະນາ, ຮັບຮອງເອົາລັດຖະທຳມະນູນ ສະບັບທຳອິດ ຢູ່ໃນກອງປະຊຸມສະໄໝສາມັນ ເທື່ອທີ 6 ໃນຄັັ້ງວັນທີ 14 ສິງຫາ ປີ 1991 ແລະ ປະທານປະເທດໄດ້ອອກລັດຖະດຳລັດປະກາດໃຊ້ ໃນວັນທີ 15 ສິງຫາ ປີ 1991, ປະກອບມີ 10 ໝວດ, 80 ມາດຕາ.

ເພື່ອຈັດຕັັ້ງຜັນຂະຫຍາຍ ແນວທາງປ່ຽນແປງໃໝ່ຂອງພັກ ສະພາແຫ່ງຊາດ ຊຸດທີ V ໄດ້ພິຈາລະນາ ແລະ ຮັບຮອງເອົາ ລັດຖະທຳມະນູນສະບັບປັບປຸງ ແລະ ຖືກປະກາດໃຊ້ ໃນວັນທີ 28 ພຶດສະພາ 2003, ປະກອບມີ 11 ໝວດ 98 ມາດຕາ ແລະ ເພື່ອຜັນຂະຫຍາຍມະຕິກອງປະຊຸມ ໃຫຍ່ຄັ້ງທີ IX ຂອງພັກ ໃຫ້ເຂົ້າສູ່ວຽກງານຕົວຈິງ ເປັນຕົ້ນການປັບປຸງລະບົບອຳນາດແຫ່ງລັດ ແຕ່ສູນກາງລົງຮອດທ້ອງຖິ່ນ ໃຫ້ມີປະສິດທິພາບສູງ, ມີຄວາມເໝາະສົມກັບສະພາບການຂະຫຍາຍຕົວທາງດ້ານເສດຖະກິດ-ສັງຄົມ, ສ້າງບາດລ້ຽວໃໝ່ໃຫ້ແກ່ການປົກປັກຮັກສາ, ສ້າງສາປະເທດຊາດ, ເຊື່ອມໂຍງກັບພາກພື້ນ ແລະ ສາກົນ ໃນໄລຍະໃໝ່ ສະພາແຫ່ງຊາດໄດ້ພິຈາລະນາ ແລະ ຮັບຮອງເອົາ ລັດຖະທຳມະນູນສະບັບປັບປຸງ ປີ 2015 ທີ່ປະກອບມີ 14 ໝວດ 119 ມາດຕາ.

ເນື່ອງໃນໂອກາດ ສະເຫຼີມສະຫຼອງວັນສໍາຄັນຂອງຊາດໃນຄັ້ງນີ້ ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ ຍັງໄດ້ມອບກະຕ່າຂອງຂວັນ ແລະ ກະຕ່າດອກໄມ້ ໃຫ້ສະພາປະຊາຊົນແຂວງ, ແນວລາວສ້າງຊາດແຂວງ, ສານປະຊາຊົນແຂວງ ແລະ ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ ເພື່ອເປັນການສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ຍາດມາໄດ້ໃນໄລຍະຜ່ານມາ.

ໃນພິທີ ຍັງໄດ້ມີກິດຈະກຳບໍລິຈາກເລືອດຊ່ວຍເຫຼືອສັງຄົມ ໂດຍມີຜູ້ສະໝັກໃຈບໍລິຈາກເລືອດ ທັງໝົດ 9 ຄົນ, ຍິງ 4 ຄົນ. ສໍາລັບຜູ້ທີ່ສະໝັກໃຈບໍລິຈາກເລືອດໃນຄັ້ງນີ້ ຍັງໄດ້ຮັບໃບຍ້ອງຍໍຂອງອົງການການແດງແຂວງບໍລິຄໍາໄຊ.

• Facebook
• Twitter
• Line