ບໍລິຄຳໄຊ-ວຽງຈັນ ຖອດຖອນບົດຮຽນວຽກງານກໍ່ສ້າງຮາກຖານການເມືອງ

ກອງປະຊຸມພົບປະແລກປຽ່ນຖອດຖອນບົດຮຽນ ຄະນະກໍ່ສ້າງຮາກຖານການເມືອງພັດທະນາຊົນນະບົດ ແລະ ວຽກງານ 3 ສ້າງ ລະຫວ່າງແຂວງບໍລິຄຳໄຊ ກັບ ແຂວງວຽງຈັນ ໄດ້ຈັດຂຶ້ນໃນວັນທີ 10 ສິງຫາ 2021 ຢູ່ຫ້ອງປະຊຸມຫ້ອງວ່າການແຂວບໍລິຄໍາໄຊ, ຝ່າຍແຂວງບໍລິຄຳໄຊ ນຳໂດຍທ່ານ ວັນວິໄລ ແດນພູຫຼວງ ຮອງເລຂາພັກແຂວງ ຜູ້ຊີ້ນໍາວຽກງານການເມືອງ-ແນວຄິດ, ວຽກງານພັກ-ພະນັກງານ ແລະ ວຽກງານກໍ່ສ້າງຮາກຖານການເມືອງ, ພັດທະນາຊົນະບົດຮອບດ້ານ ແລະ ວຽກງານ 3 ສ້າງ, ຝ່າຍແຂວງວຽງຈັນ ນຳໂດຍທ່ານ ທອງສະຫວັນ ວົງສໍາພັນ ຮອງເລຂາພັກແຂວງ ຜູ້ຊີ້ນໍາວຽກງານການເມືອງ-ແນວຄິດ, ວຽກງານພັກ-ພະນັກງານ ແລະ ວຽກງານກໍ່ສ້າງຮາກຖານການເມືອງ, ພັດທະນາຊົນະບົດຮອບດ້ານ ແລະ ວຽກງານ 3 ສ້າງ ໂດຍມີຄະນະປະຕິບັດງານທັງສອງຝ່າຍ ເຂົ້າຮ່ວມ.

ໃນກອງປະຊຸ ມຝ່າຍແຂວງບໍລິຄໍາໄຊ ໄດ້ສະຫຼຸບຕີລາຄາການຈັດຕັ້ງປະຕິບັດ ວຽກງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດຮອບດ້ານ ແລະ ວຽກງານ 3 ສ້າງ ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ ປະຈໍາ 6 ເດືອນຕົ້ນປີ 2021 ເຫັນວ່າໄດ້ສຸມໃສ່ຈັດຕັ້ງປະຕິບັດຫຼາຍວຽກງານສໍາຄັນ ເປັນຕົ້ນແມ່ນ ວຽກງານສຶກສາອົບຮົມການເມືອງ-ແນວຄິດ, ວຽກງານປັບປຸງລະບົບການເມືອງຢູ່ຂັ້ນຮາກຖານ, ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານພັດທະນາພື້ນຖານໂຄງລ່າງ, ວຽກງານພັດທະນາຈຸດສຸມ, ວຽກແກ້ໄຂຄວາມທຸກຍາກ ແລະ ການພັດທະນາ ແລະ ວຽກງານອື່ນໆ.

ຜ່ານການຈັດຕັ້ງນໍາພາການແກ້ໄຂຄວາມທຸກຍາກ ແລະ ການສ້າງບ້ານພັດທະນາ ຕາມມາດຕະຖານດໍາລັດ 348/ລບ ທົ່ວແຂວງ ມີຄອບຄົວພົ້ນທຸກ 52.544 ຄອບຄົວ ກວມເອົາ 94,31%, ບ້ານພົ້ນທຸກ 294 ບ້ານ ກວມເອົາ 87,68%, ບ້ານທຸກຍາກ 35 ບ້ານ ກວມ 12,32%, ເມືອງພົ້ນທຸກ 5 ເມືອງ, ເມືອງທຸກຍາກ ຍັງ 2 ເມືອງ, ຄອບຄົວພັດທະນາ 47.990 ຄອບຄົວ ກວມ 86,13%, ບ້ານພັດທະນາ 216 ບ້ານ 76,06%.

ພ້ອມກັນນັ້ນ ບັນດາຜູ້ແທນທັງສອງຝ່າຍ ຍັງໄດ້ຮ່ວມກັນປຶກສາຫາລືວຽກງານຮ່ວມກັນໃນຫຼາຍວຽກງານສໍາຄັນ ເປັນຕົ້ນແມ່ນການຜັນຂະຫຍາຍນິຕິກຳ, ການສ່ອງແສງລາຍງານ, ການປັບປຸງດ້ານບຸກຄາລາກອນ, ການຍົກລະດັບຊີວີດການເປັນຢູ່ຂອງປະຊາຊົນ, ການຈັດຕັ້ງຂັ້ນທ້ອງຖິ່ນ, ການລົງຕິດຕາມ, ກວດກາຢູ່ຮາກຖານ ແລະ ບັນຫາອື່ນໆ.

ກອງປະຊຸມຄັ້ງນີ້ ກໍ່ເພື່ອເປັນການແລກປ່ຽນຖອດຖອນບົດຮຽນຮ່ວມກັນຂອງ 2 ແຂວງ ເພື່ອນໍາເອົາວຽກທີ່ພົ້ນເດັ່ນໄປຈັດຕັ້ງ ປັບປຸງ ພັດທະນາຢູ່ທ້ອງຖີ່ນຂອງຕົນ, ພ້ອມນີ້ ກໍ່ຫາຊ່ອງທາງແກ້ໄຂຈຸດອ່ອນ ຂໍ້ຄົງຄ້າງ ເພື່ອຍົກລະດັບບັນດາວຽກງານໃຫ້ໄດຮັບຜົນສຳເລັດຕາມແຜນການທີ່ວາງໄວ້.

• Facebook
• Twitter
• Line