ເຫຼົ້າໄຫຫອມ ບ້ານປາກປາງ-ກ.ສ.ນ ອາດຈະໄດ້ເປັນສິນຄ້າ ODOP

ໃນຕອນເຊົ້າວັນທີ 6 ສິງຫາ 2021 ຢູ່ທີ່ຫ້ອງການອຸດສາຫະກຳ ແລະ ການຄ້າ ເມືອງປາກກະດິງ ແຂວງບໍລິຄຳໄຊ ຄະນະກຳມະການຄັດເລືອກສິນຄ້າການບໍລິການ ເອກະລັກໜຶ່ງເມືອງ-ໜຶ່ງຜະລິດຕະພັນ ຂັ້ນເມືອງປາກກະດິງ ໄດ້ປະຊຸມຮ່ວມກັນ ເພື່ອຄົ້ນຄ້ວາປຶກສາຫາລືຄວາມເປັນໄປໄດ້ໃນການສະເໜີ ເອົາເຫຼົ້າໄຫຫອມ ບ້ານປາກປາງ-ກ.ສ.ນ ເມືອງປາກກະດິງ ເປັນສິນຄ້າ ODOP ເອກະລັກໜຶ່ງເມືອງ-ໜຶ່ງຜະລິດຕະພັນ ຂອງເມືອງປາກກະດິງ. ພາຍໃຕ້ການເປັນປະທານຂອງທ່ານ ກອງແກ້ວ ຫຼວງລາດບັນດິດ ຫົວໜ້າຫ້ອງການອຸດສາຫະກຳ ແລະ ການຄ້າ ເມືອງປາກກະດິງ, ມີຫ້ອງການທີ່ກ່ຽວຂ້ອງ ແລະ ກຸ່ມຜະລິດເຫຼົ້າໄຫ ເຂົ້າຮ່ວມ.

ໃນກອງປະຊຸມ ໄດ້ລາຍງານຂະບວນການລົງຊຸກຍູ້ການຜະລິດເຫຼົ້າໄຫ ຂອງຫ້ອງການອຸດສາຫະກຳ ແລະ ການຄ້າ ເມືອງປາກກະດິງ ແລະ ລາຍງານການຜະລິດເຫຼົ້າໄຫ ຂອງກຸ່ມຜະລິດເຫຼົ້າໄຫຫອມ ບ້ານປາກປາງ-ກ.ສ.ນ, ພ້ອມທັງຜ່ານມາດຖານ-ເງື່ອນໄຂ ການປະເມີນສິນຄ້າ (ODOP) ການບໍລິການ ເອກະລັກໜຶ່ງເມືອງ-ໜຶ່ງຜະລິດຕະພັນ ເຊິ່ງບັນດາທ່ານຄະນະກຳມະການທີ່ເຂົ້າຮ່ວມກອງປະຊຸມ ໄດ້ພ້ອມກັນຄົ້ນຄ້ວາພິຈາລະນາດ້ວຍເຫດ ແລະ ຜົນ ເຫັນວ່າ: ຜະລິດຕະພັນເຫຼົ້າໄຫຫອມ ບ້ານປາກປາງ-ກ.ສ.ນ ແມ່ນໄດ້ດຳເນີນການຜະລິດທີ່ຖືກຕ້ອງຕາມເງື່ອນໄຂ ແລະ ມາດຖານ ຂອງສິນຄ້າໜຶ່ງເມືອງ-ໜຶ່ງຜະລິດຕະພັນ ຈຶ່ງໄດ້ເປັນເອກະພາບກັນໃຫ້ຫ້ອງການ ອຸດສາຫະກຳ ແລະ ການຄ້ານຳສະເໜີຕໍ່ຂັ້ນເທີງຕາມຂັ້ນຕອນຕໍ່ໄປ.

• Facebook
• Twitter
• Line