ວັນທີ 6 ສິງຫາ 2021 ຢູ່ທີ່ຫ້ອງປະຊຸມຊັ້ນ 3 ຫ້ອງວ່າການເມຶອງຄຳເກີດ ແຂວງບໍລິຄຳໄຊ ໄດ້ຈັດກອງປະຊຸມສະຫຼຸບວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ ແລະ ວຽກງານ 3 ສ້າງ, ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາປະຈຳ 6 ເດືອນ ຕົ້ນປີ ແລະ ທິດທາງແຜນການປະຈຳ 6 ເດືອນທ້າຍປີ 2021 ຂຶ້ນ ພາຍໃຕ້ການເປັນປະທານໂດຍທ່ານ ກີ ຊົງລາຫວ່າງ ຮອງເລຂາພັກເມືອງຄຳເກີດ, ຜູ້ຊີ້ນຳວຽກງານຮາກຖານການເມືອງ.
ກອງປະຊຸມ ໄດ້ຜ່ານຮ່າງບົດສະຫຼຸບ ຕີລາຄາການຈັດຕັ້ງປະຕິບັດວຽກງານກໍ່ສ້າງຮາກຖານການເມຶອງ 6 ເດືອນຜ່ານມາ ວ່າ ຄະນະພັກ ແລະ ພະນັກງານກໍ່ສ້າງຮາກຖານການເມືອງທຸກຂັ້ນ ໄດ້ເອົາໃຈໃສ່ສຶກສາອົບຮົມພໍ່ແມ່ປະຊາຊົນ ແລະ ໃກ້ຊິດຕິດແທດຊີ້ນຳ-ນຳພາພໍ່ແມ່ປະຊາຊົນ, ໄດ້ເຮັດໃຫ້ແຕ່ລະບ້ານມີຄວາມສະຫງົບໂດຍພື້ນຖານ ປະຊາຊົນມີຄວາມເຊື່ອໝັ້ນຕໍ່ການນຳພາຂອງພັກ-ລັດ, ມີຄວາມອຸ່ນອຽນທຸ່ນທ່ຽງ ແລະ ພ້ອມກັນສຸມໃສ່ການພັດທະນາເສດຖະກິດຄອບຄົວຂອງຕົນ ເປັນຕົ້ນແມ່ນ ການປູກພືດລະດູແລ້ງ, ລະດູຝົນເປັນສີນຄ້າ, ການເກັບກ່ຽວເຂົ້ານາແຊງ ແລະ ປັກດຳເຂົ້ານາປີ ສຳເລັດທັນລະດູການ.
ຄຽງຄູ່ກັບການລະບາດ ພະຍາດ COVID-19 ທີ່ກຳລັງເປັນໄພຄຸກຄາມຢູ່ບັນດາປະເທດໃນພາກພື້ນ ແລະ ໃນໂລກ ເວົ້າລວມ, ເວົ້າສະເພາະ ລວມທັງ ສປປ ລາວ ເຊິ່ງ ເມືອງຄໍາເກີດ ເຖິງວ່າບໍ່ມີການແຜ່ລະບາດຂອງພະຍາດດັ່ງກ່າວກໍ່ຕາມ ແຕ່ກໍ່ໄດ້ເອົາໃຈໃສ່ມາດຕະການປ້ອງກັນ ເພື່ອບໍ່ໃຫ້ພະຍາດດັ່ງກ່າວແຜ່ລະບາດເຂົ້າມາໄດ້.
ຄະນະພັກ-ອົງການປົກຄອງທຸກຂັ້ນ, ພະນັກງານກໍ່ສ້າງຮາກຖານການເມືອງ, ສະມາຊິກພັກ-ພະນັກງານ ຕະຫຼອດຮອດປະຊາຊົນບັນດາເຜົ່າ ໃນແຕ່ລະບ້ານໄດ້ມີຄວາມສາມັກຄີເປັນເອກະພາບສູງ ຕໍ່ແນວທາງນະໂຍບາຍ ແລະ ການນໍາພາຂອງພັກ, ສາມາດແກ້ໄຂບັນດາປະກົດການຫຍໍ້ທໍ້ໄດ້ໂດຍພື້ນຖານ ແລະ ຮັກສາໄດ້ສະຖຽນລະພາບ ທາງດ້ານການເມືອງ, ສັງຄົມມີຄວາມສະຫງົບ, ການຈັດຕັ້ງແຕ່ລະຂັ້ນໄດ້ຮັບການປັບປຸງໃຫ້ເຂັ້ມແຂງ ແລະ ຫນັກແຫນ້ນຂຶ້ນເລື້ອຍໆ.
ຈາກນັ້ນ ຕາງໜ້າແຕ່ລະກຸ່ມບ້ານ ແລະ ຜູ້ເຂົ້າຮ່ວມກອງປະຊຸມກໍ່ໄດ້ສະເໜີລາຍງານ ແລະ ປະກອບຄຳຄິດເຫັນບາງໜ້າວຽກທີ່ສຳຄັນໃສ່ຮ່າງບົດສະຫຼຸບ ແລະ ວາງທິດທາງແຜນການປະຈຳ 6 ເດືອນທ້າຍປີ 2021, ພ້ອມດຽວກັນນັ້ນ ປະທານກອງປະຊຸມກໍ່ໄດ້ແກ້ໄຂຂໍ້ຂ້ອງໃຈ, ມີຄຳເຫັນຊີ້ນຳ ເພື່ອເຮັດໃຫ້ວຽກງານການກໍ່ສ້າງຮາກຖານການເມືອງມີຄວາມເຂັ້ມແຂງຂຶ້ນ.
ທ່ານ ສາຍຄຳ ວົງຄຳທອງ ຮອງຫົວໜ້າຫ້ອງວ່າການແຂວງ ຜູ້ຊີ້ນຳກອງເລຂາວຽກງານຮາກຖານການເມຶອງຂັ້ນແຂວງ ເນື່ືອງໃນໂອກາດທີ່ເຂົ້າຮ່ວມກອງປະຊຸມດັ່ັງກ່າວ ກໍ່ໄດ້ຍ້ອງຍໍຊົມເຊີຍຕໍ່ກັບຜົນງານທີ່ຄະນະພັກຍາດມາໄດ້ ແລະ ເນັ້ນໃຫ້ສຶບຕໍ່ສຶກສາອົບຮົມວຽກງານການເມືອງແນວຄິດໃຫ້ແກ່ພໍ່ແມ່ປະຊາຊົນ ນຳເອົາມະຕິ ແລະ ແນວທາງຂອງພັກໄປເຜີຍແຜ່ເຊື່ອມຊືມເປັນໄລຍະ, ສຶບຕໍ່ປັບປຸງກຳລັງ ປກຊ-ປກສ ໃຫ້ເຂັ້ມແຂງ, ນຳເອົາບົດແນະນຳຂອງຄະນະສູນກາງພັກໄປເຜີຍແຜ່ໃຫ້ປະຊາຊົນໄດ້ຮັບຮູ້ ແລະ ສຶບຕໍ່ແກ້ໄຂບັນດາໜ້າວຽກທີ່ຍັງຄ້າງຄາໃຫ້ສຳເລັດ.
Users Today : 774
Users Yesterday : 494
This Month : 8615
This Year : 128652
Total Users : 514876
Who's Online : 46