ຫົວໜ້າ ຄະນະສະເພາະກິດຂັ້ນສູນກາງ ພ້ອມດ້ວຍຄະນະ ລົງເຄື່ອນໄຫວ ຊຸກຍູ້ວຽກງານຢູ່ແຂວງບໍລິຄໍາໄຊ

ເພື່ອເປັນການຕິດຕາມ, ຊຸກຍູ້, ໃຫ້ກຳລັງໃຈ ແລະ ຊີ້ນຳ ການຈັດຕັ້ງປະຕິບັດ ບັນດາມາດຕະການ ກ່ຽວກັບການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂ ການແຜ່ລະບາດ ຂອງພະຍາດໂຄວິດ-19 ຢູ່ບັນດາແຂວງ ໃນຂອບເຂດທົ່ວປະເທດ ໃນຕອນເຊົ້າວັນທີ 3 ສິງຫາ 2021 ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດໂຄວິດ-19 ພ້ອມດ້ວຍຄະນະ ໄດ້ລົງເຄື່ອນໄຫວ ຮ່ວມເຮັດວຽກກັບຄະນະສະເພາະກິດຂອງແຂວງບໍລິຄໍາໄຊ ໂດຍການຕ້ອນຮັບຂອງ ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ ພ້ອມດ້ວຍການນຳຂອງແຂວງ ແລະ ພາກສ່ວນທີ່ກ່ຽວຂ້ອງ.

ກ່ອນອື່ນ ທ່ານຮອງນາຍົກລັດຖະມົນຕີພ້ອມດ້ວຍຄະນະ ໄດ້ລົງໄປສໍາຫຼວດເບີ່ງສູນກັກກັນແຮງງານລາວ ທີ່ເດີນທາງມາຈາກຕ່າງປະເທດ ແລະ ສູນປິ່ນປົວຜູ້ທີ່ຕິດເຊື້ອໂຄວິດ-19 ຈໍານວນ 3 ແຫ່ງ ທີ່ຄະນະສະເພາະກິດຂອງແຂວງໄດ້ກໍານົດໄວ້, ໃນນີ້ ມີສູນປິ່ນປົວ ຫຼັກ 6, ສູນກັກກັນ ສູນຊາວໜຸມແຂວງ ແລະ ສູນກັກກັນ ໂຮງຮຽນນາຍ 10 ປກສ ຊັນຕົ້ນ ເລກ 4 ແຂວງ ບໍລິຄໍາໄຊ.

ແຕ່ລະແຫ່ງ ທ່ານຫົວໜ້າຄະນະສະເພາະກິດຂັ້ນສູນກາງ ໄດ້ຮັບຟັງການລາຍງານສະພາບລວມໂດຍຫຍໍ້ ໃນການຈັດຕັ້ງປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂ ການແຜ່ລະບາດ ຂອງພະຍາດໂຄວິດ-19 ໃນດ້ານຕ່າງໆ ເພື່ອຮັບປະກັນຄວາມເປັນລະບຽບຮຽບຮ້ອຍພາຍໃນສູນ ເປັນຕົ້ນແມ່ນ ການປ້ອງກັນເວນຍາມ ການຮັກສາໄລຍະຫ່າງ ການກໍານົດຂອບເຂດບໍລິເວນ ຂອງຜູ້ຕິດເຊື່ອ ແລະ ອື່ນໆ.

ປະຈຸບັນ ແຂວງ ບໍລິຄໍາໄຊ ມີຜູ້ຕິດເຊື້ອໂຄວິດສະສົມລວມທັງໝົດ 32 ກໍລະນີ ປິ່ນປົວຫາຍດີແລ້ວ 3 ກໍລະນີ ແລະ ກໍາລັງປິ່ນປົວ 29 ກໍລະນີ, ການຕິດເຊື້ອ ທັງໝົດພາຍໃນແຂວງ ແມ່ນກໍລະນີຈາກແຮງງານນໍາເຂົ້າຈາກຕ່າງປະເທດ.

ໃນໂອກາດດຽວກັນທ່ານຮອງນາຍົກລັດຖະມົນຕີ ຍັງໄດ້ໂອ້ລົມ ແລະ ໃຫ້ກຳລັງໃຈ ແກ່ຜູ້ທີ່ກຳລັງຈຳກັດບໍລິເວນ ແລະ ຜູ້ທີ່ຕິດເຊື້ອໂຄວິດ-19 ທີ່ກໍາລັງປິ່ນປົວ ຢູ່ສະຖານທີ່ຕ່າງໆ ໂດຍທ່ານໄດ້ຍົກໃຫ້ເຫັນຄວາມເປັນຫ່ວງເປັນໄຍຂອງລັັັັດຖະບານ ຕໍ່ແຮງງານລາວ, ນະໂຍບາຍຂອງລັດຖະບານ ໂດຍສະເພາະ ການໄປອອກແຮງງານຢູ່ຕ່າງປະເທດ, ຄວາມເອົາໃຈໃສ່ ແລະ ພະຍາຍາມ ໃນການແກ້ໄຂບັນຫາການແຜ່ລະບາດຂອງພະຍາດໂຄວິດ-19 ຢູ່ປະເທດເຮົາ, ເຫດຜົນ ແລະ ຄວາມຈຳເປັນ ທີ່ຕ້ອງນຳຜູ້ທີ່ມີຄວາມສ່ຽງຕິດເຊື້ອ ເຂົ້າກັກບໍລິເວນ, ຜົນຮ້າຍຂອງເຊື້ອພະຍາດດັ່ງກ່າວ ແລະ ອື່ນໆ.

ພ້ອມນັ້ນ ທ່ານຍັງໄດ້ເນັ້ນໜັກ ໃຫ້ສືບຕໍ່ອົດທົນ, ທຸ່ນທ່ຽງ, ເອົາໃຈໃສ່ ແລະ ໃຫ້ການຮ່ວມມືກັບລັດຖະບານ, ປະຕິບັດຕາມຄຳແນະນຳຂອງແພດໝໍ ແລະ ລະບຽບການທີ່ກ່ຽວຂ້ອງ ຢ່າງເຂັ້ມງວດ, ພ້ອມທັງເອົາໃຈໃສ່ເບິ່ງແຍງຮັກສາສຸຂະພາບຂອງຕົນ ເພື່ອຜ່ານຜ່າວິກິດຄວາມຫຍຸ້ງ ຍາກຕ່າງໆໄປພ້ອມກັນ, ພາຍຫຼັງປິ່ນປົວຫາຍດີເປັນປົກກະຕິແລ້ວ ໃຫ້ພ້ອມກັນໄປຮັບວັກຊີນປ້ອງກັນ ແລະ ສືບຕໍ່ປະຕິບັດມາດຕະການປ້ອງກັນການຕິດເຊື້ອ ແລະ ແຜ່ເຊື້ອ ທີຄະນະສະເພາະກິດແຂວງວາງອອກຢ່າງເຂັ້ມງວດ.

• Facebook
• Twitter
• Line