ທ່ານຮອງນາຍົກລັດຖະມົນຕີ ເຄື່ອນໄຫວຢ້ຽມຢາມແຂວງ ບໍລິຄຳໄຊ

ໃນຕອນບ່າຍຂອງວັນທີ 03 ສິງຫາ 2021 ຢູ່ທີ່ຫ້ອງປະຊຸມຫ້ອງວ່າການແຂວງ ທ່ານ ກິແກ້ວ ໄຂຄຳພິທູນ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ແຫ່ງ ສປປລາວ ຫົວໜ້າສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຂັ້ນສູນກາງ ພ້ອມດ້ວຍຄະນະ ໄດ້ລົງພົບປະໂອ້ລົມພະນັກງານຫຼັກແຫຼ່ງ ແລະ ຊີ້ນຳບາງວຽກງານຄະນະສະເພາະກິດແຂວງ ໂດຍເປັນກຽດຕ້ອນຮັບຂອງທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ທ່ານ ບຸນເສັງ ປະທຳມະວົງ ຮອງເຈົ້າແຂວງ ຫົວໜ້າສະເພາະກິດຂັ້ນແຂວງບໍລິຄຳໄຊ.

ໃນການຢ້ຽມຢາມຄັ້ງນີ້ ທ່ານຮອງນາຍົກ ກໍ່ໄດ້ຮັບຟັງການລາຍງານ ສະພາບໂດຍລວມໃນການຈັດຕັ້ງຜັນຂະຫຍາຍແຜນພັດທະນາເສດຖະກິດ-ສັງຄົມຂອງແຂວງ ແລະ ການລະບາດຂອງພະຍາດໂຄວິດ 19 ຈາກທ່ານເຈົ້າແຂວງ ແລະ ຫົວໜ້າສະເພາະກິດຂັ້ນແຂວງ ໃນປະຈຸບັນແຂວງບໍລິຄຳໄຊ ໄດ້ມີມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍດີ, ເສດຖະກິດມີຄວາມບອບບາງ ແລະ ໄດ້ຮັບຜົນກະທົບຕໍ່ການລະບາດຂອງພະຍາດໂຄວິດ-19 ແຕ່ກໍ່ສາມາດປະຄັບປະຄອງໄດ້, ການຈັດຕັ້ງທຸກຂັ້ນໄດ້ຮັບການປັບປຸງ ແລະ ບູລະນະໃຫ້ມີຄວາມເຂັ້ມແຂງຂື້ນ, ຊີວິດການເປັນຢູ່ທາງດ້ານວັດຖຸ ແລະ ຈິດໃຈ ຂອງສະມາຊິກພັກ-ພະນັກງານ, ທະຫານ, ຕຳຫຼວດ ແລະ ປະຊາຊົນ ກໍ່ນັບມື້ດີຂື້ນ, ປະຊາຊົນ ແລະ ທຸກຊັ້ນຄົນມີຄວາມອຸ່ນອຽນທຸ່ນທ່ຽງ, ເຊື່ອໝັ້ນຕໍ່ການນຳພາຂອງພັກ-ລັດ ເຊິ່ງສະແດງອອກໄດ້ຮັບການສະໜັບສະໜູນ ແລະ ເຂົ້າຮ່ວມປະຕິບັດ 2 ໜ້າທີ່ຍຸດທະສາດຢ່າງເປັນເຈົ້າການ, ເສດຖະກິດຂະຫຍາຍຕົວໃນລະດັບ 1,92%, ແຜນການຈັດລາຍຮັບທັງໝົດ 901,12 ຕື້ກີບ ປະຕິບັດໄດ້ 269,79 ຕື້ກີບ ເທົ່າກັບ 29,94% ຂອງແຜນການປີ.

ການຈັດຕັ້ງຜັນຂະຫຍາຍຄຳສັ່ງ ເລກທີ 15/ນຍ ວ່າດ້ວຍການເພີ່ມທະວີມາດຕະການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານການລະບາດຂອງພະຍາດໂຄວິດ-19 ໄດ້ເຂົ້າສູ່ຊີວິດຕົວຈິງ ແຂວງບໍລິຄຳໄຊ ມີສູນກັກກັນ 12 ສູນ, ໂຮງແຮມ 7 ແຫ່ງ, ສູນປີ່ນປົວຜູ້ຕິດເຊື້ອ 2 ແຫ່ງ, ໄດ້ເກັບຕົວຢ່າງຈາກກຸ່ມສ່ຽງທີ່ໄດ້ສຳພັດຈາກຜູ້ຕິດເຊື້ອ ແລະ ແຮງງານທີ່ມາຈາກຕ່າງປະເທດ 4,611 ຕົວຢ່າງທີ່ເຂົ້າສູນກັກກັນຜົນກວດເປັນບວກຕິດເຊື້ອພະຍາດໂຄວິດ-19 ຈໍານວນ 32 ຄົນ, ປະຈຸບັນເຂົ້າຮັບການປິ່ນປົວຢູ່ສູນປິ່ນປົວຂອງແຂວງ 28 ຄົນ, ປີ່ນປົວຫາຍດີ 3 ຄົນ, ທົ່ວແຂວງມີປະຊາກອນໄດ້ຮັບວັກຊິນເຂັມ 1ຈຳນວນ 33,695 ຄົນ, ຄົບ 2 ເຂັມ 29,294 ຄົນ,ຖ້າທຽບໃສ່ປະຊາກອນເປົ້າໝາຍອາຍຸ 18-60 ປີ ເທົາກັບ 32,27 %,ຖ້າທຽບໃສ່ປະຊາກອນທັງໝົດທົ່ວແຂວງເທົ່າກັບ 19,14 %.

ເພື່ອຮັບປະກັນໃນການຮັບມືການລະບາດຂອງພະຍາດໂຄວິດ-19 ແຂວງບໍລິຄຳໄຊ ຈະຕ້ອງໄດ້ເພີ່ມທະວີການນຳພາ-ຊີ້ນຳຂອງອົງຄະນະພັກທຸກຂັ້ນ ແລະ ເຈົ້າໜ້າທີທຸກພາກສ່ວນເຂົ້າຮ່ວມຂະບວນການປ້ອງກັນສະກັດກັ້ນ ແລະ ຕ້ານການລະບາດຂອງພະຍາດໂຄວິດ-19 ໃຫ້ແຂງແຮງກວ່າເກົ່າ, ສືບຕໍ່ໃຫ້ວັກຊິນໃນກຸ່ມເປົ້າໝາຍ, ກະກຽມສູນກັກກັນ ແລະ ສູູນປິ່ນປົວຢູ່ບັນດາເມືອງ, ປະສານສົມທົບກັບເຈົ້າໜ້າທີ່ກ່ຽວຂ້ອງຈັງຫວັດບຶງການ ລາຊະອານາຈັກໄທ ເພື່ອອໍານວຍຄວາມສະດວກໃນການເດີນທາງກັບຄືນພູມລໍາເນົາຂອງແຮງງານແຂວງ ບໍລິຄຳໄຊ ຫຼີກລ່ຽງການລັກລອບເຂົ້າ-ອອກເມືອງຜິດກົດໝາຍ, ມີການຄຸ້ມຄອງເປັນລະບົບຕໍ່ແຮງງານທີ່ກັບຄືນທ້ອງຖິ່ນ. ກອງປະຊຸມຄັ້ງນີ້ຍັງໄດ້ຮັບຟັງການຊີ້ແຈງຕາງໜ້າລັດຖະມົນຕີ ຕໍ່ຂໍ້ສັກຖາມຈາກອົງການປົກຄອງແຂວງ ເປັນການແລກປ່ຽນຖອດຖອນບົດຮຽນເປັນຕົ້ນແມ່ນວຽກງານສະກັດກັ້ນພະຍາດໂຄວິດ-19.

ໃນຕອນທ້າຍ  ຮອງນາຍົກລັດຖະມົນຕີ ກິແກ້ວ ໄຂຄຳພິທູນ ໄດ້ຍ້ອງຍໍຊົມເຊີຍມາຍັງອົງການປົກຄອງແຂວງ ທີ່ສາມາດປະຕິບັດໜ້າທີ່ມີຜົນສຳເລັດເປັນຕົ້ນແມ່ນແຜນພັດທະນາເສດຖະກິດ-ສັງຄົມ ໃນແຕ່ລະໄລຍະ, ການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານການລະບາດຂອງພະຍາດໂຄວິດ-19 ພ້ອມນັ້ນອົງການປົກຄອງແຂວງ ກໍ່ຄືຄະນະສະເພາະກິດຂັ້ນແຂວງ ໄດ້ຈັດຕັ້ງຜັນຂະຫຍາຍບັນດາມະຕິ, ຄຳສັ່ງຂອງຂັ້ນເທິງເຂົ້າສູ່ລວງເລິກ, ມີລະບົບກົນໄກປະສານງານມີຄວາມສອດຄ່ອງວ່ອງໄວ, ມີຄວາມຮັບຜິດຊອບເດັດຂາດໃນການແກ້ໄຂບັນຫາ, ປຸກລະດົມທົ່ວປວງຊົນເປັນເຈົ້າການການປ້ອງກັນ, ຄວບຄຸມ ແກ້ໄຂການລະບາດຂອງພະຍາດໂຄວິດ-19 ແລະ ເຂົ້າຮັບວັກຊີນໃຫ້ທົ່ວເຖິງ, ຖືເອົາໂອກາດນີ້ສຶກສາອົບຮົມ ແລະ ສົ່ງເສີມແຮງງານທີ່ມີສີມືຊຳນານດ້ານຕ່າງໆ ເຂົ້າໃນຂະແຫນງອຸດສະຫະກຳ, ກະກຽມສະຖານທີ່ກັນກັນ, ສູນປີ່ນປົວ ລວມທັງບຸກຄາລາກອນອຸປະກອນການແພດ ເພື່ອຮັບມືເຫດການລະບາດຂອງພະຍາດທີ່ຮ້າຍແຮງກວ່າເກົ່າ.ໂອກາດທີ່ທ່ານຮອງນາຍົກ ໄດ້ເປັນກຽດມອບ ອຸປະກອນການແພດຈຳນວນໜື່ງມາມອບໃຫ້ແຂວງ ບໍລິຄຳໄຊ.

• Facebook
• Twitter
• Line