ຄຊປປລ ບໍລິຄຳໄຊ ແຕ່ງຕັ້ງ ຊັບຊ້ອນຕຳແໜ່ງງານພາຍໃນ

ໃນວັນທີ 16 ກໍລະກົດ 2021 ຢູ່ຫ້ອງປະຊຸມຄະນະບໍລິຫານງານຊາວໜຸ່ມແຂວງ ໄດ້ຈັດພິທີປກາດການຈັດຕັ້ງ ພາຍໃນຄະນະຊາວໜຸ່ມແຂວງ ໂດຍການເຂົ້າຮ່ວມຂອງ ສະຫາຍ ທອງມະນີ ໂຄດປັນຍາ ກໍາມະການພັກແຂວງ ເລຂາຄະນະບໍລິຫານງານຊາວໜຸ່ມແຂວງບໍລິຄໍາໄຊ, ມີຄະນະປະຈໍາຊາວໜຸ່ມ ພ້ອມດ້ວຍພະນັກງານພາຍໃນ ເຂົ້າຮ່ວມ.

ໃນພິທີ ສະຫາຍ ວັນໄຊ ເງຍຈັນທະສອນ ໄດ້ຂຶ້ນຜ່ານຂໍ້ຕົກລົງຂອງເຈົ້າແຂວງ ວ່າດ້ວຍການແຕ່ງຕັ້ງ ສະຫາຍ ນາງ ບຸນລອດ ດວງວັນນະວົງ ຮອງຫົວໜ້າຫ້ອງການບໍລິຫານ ເປັນຫົວໜ້າຫ້ອງການບໍລິຫານຄະນະບໍລິຫານງານຊາວໜຸ່ມແຂວງ ແລະ ສະຫາຍ ນາງ ນິດຕາ ເພັງສະຫວັດ ເປັນຫົວໜ້າຂະແໜງກວດກາ.

ກອງປະຊຸມ ຍັງໄດ້ຜ່ານຂໍ້ຕົກລົງຂອງຄະນະບໍລິຫານງານຊາວໜຸ່ມແຂວງ ວ່າດ້ວຍການຊັບຊ້ອນພະນັກງານວິຊາການພາຍໃນຄະນະຊາວໜຸ່ມແຂວງ 5 ສະຫາຍ, ຍິງ 3 ສະຫາຍ, ທັງນີ້ ກໍ່ເພື່ອໃຫ້ສອດຄ່ອງກັບທີ່ຕັ້ງ ພາລະບົດບາດ ແຜນກໍານົດຕໍາແໜ່ງງານ ທີ່ກົດໝາຍກໍານົດໄວ້ ແລະ ຖືກຕ້ອງກັບໜ້າວຽກ, ຄວາມຮູ້ ຄວາມສາມາດຂອງແຕ່ລະສະຫາຍ.

ຕອນທ້າຍ ໄດ້ຮັບຟັງການໂອ້ລົມຈາກ ສະຫາຍ ທອງມະນີ ໂຄດປັນຍາ ເຊິ່ງໄດ້ເນັ້ນໜັກໃຫ້ພະນັກງານທຸກສະຫາຍ ຈົ່ງເປັນເຈົ້າການໃນທຸກວຽກງານ, ການປັບປຸງຊັບຊ້ອນແມ່ນເປັນວຽກປົກກະຕິ ເພື່ອໃຫ້ແທດເໝາະກັບຄວາມຮູ້, ຄວາມສາມາດ ແລະ ຄວາມຮຽກຮ້ອງຕ້ອງການ ເພື່ອເຮັດໃຫ້ການຈັດຕັ້ງຊາວໜຸ່ມເຂັ້ມແຂງ, ປະສົບຜົນສໍາເລັດຕາມຄາດໝາຍທີ່ວາງໄວ້.

• Facebook
• Twitter
• Line