ບໍລິຄຳໄຊ ລະນຶກ 100 ປີ ວັນສ້າງຕັ້ງພັກກອມມູນິດຈີນ

ພິທີປະຖາກະຖາ ວັນສ້າງຕັ້ງພັກກອມມູນິດຈີນ ຄົບຮອບ 100 ປີ ( 1/7/1921-1/7/2021) ໄດ້ຈັດຂຶ້ນໃນວັນທີ 15 ກໍລະກົດ 2021 ຢູ່ສະໂມສອນໃຫຍ່ຂອງແຂວງ ໃຫ້ກຽດເຂົ້າຮ່ວມ ແລະ ຫວນຄືນມູນເຊື້ອໂດຍ ທ່ານ ປອ ກອງແກ້ວ ໄຊສົງຄາມ ກຳມະການສູນກາງພັກ ເລຂາພັກແຂວງ ເຈົ້າແຂວງບໍລິຄຳໄຊ ມີການນຳຂອງແຂວງ, ບັນດາພະແນກການ, ນາຍ ແລະ ພົນທະຫານ, ນາຍ ແລະ ພົນຕຳຫລວດ ແລະ ພະນັກງານລັດຖະກອນ ັເຂົ້າຮ່ວມ.

ພາຍຫຼັງສົງຄາມຢາຝິ່ນໄດ້ສິ້ນສຸດລົງໃນປີ 1840 ປະເທດຈີນຖືກການຮຸກຮານ ຈາກຕ່າງປະເທດ ແລະ ຄວາມເຊື່ອມຊາມຈາກການປົກຄອງຂອງສັກດີນາ, ບັນດາຊົນຊາດ ແລະ ປະຊາຊົນຈີນ ໄດ້ປະສົບກັບຄວາມທຸກຍາກລຳບາກຢ່າງແສນສາຫັດ, ໄດ້ມີຫຼາຍຂະບວນການຕໍ່ສູຕ້ານລັດທິຈັກກະພັດ ແລະ ສັກດີນາ ແຕ່ກໍ່ບໍ່ສຳເລັດ, ໃນຕົ້ນປີ 1920 ການນຳພັກກອມມູນິດຈີນຮູ່ນທຳອິດ ໄດ້ເຄື່ອນໄຫວແບບໃຕ້ດິນ ກະກຽມການສ້າງພັກ ແລະ ໃນເດືອນສິງຫາ 1920 ການຈັດຕັ້ງພັກຢູ່ນະຄອນຊຽງໄຮ ໄດ້ຮັບການສ້າງຕັ້ງຂຶ້ນ ຢູ່ພະແນກບັນນາທິການຖະແຫຼງຂ່າວຊາວໜຸ່ມຍຸກໃໝ່, ເຮືອນເລກທີ 2, ໝູ່ບ້ານລາວຢູຢ່າງ ຢູ່ເຂດກົງສູນຝຣັ່ງ.

ໃນກອງປະຊຸມໄດ້ຕົກລົງເອີ້ນຊື່ພັກວ່າ “ພັກກອມມູນິດຈີນ” ໂດຍຖືເອົາການຈັດຕັ້ງພັກຢູ່ນະຄອນຊຽງໄຮເປັນໃຈກາງ ໃນການເຄື່ອນໄຫວຂະຫຍາຍຕົວໄປຫຼາຍແຂວງ ເປັນຕົ້ນແມ່ນ  ປັກກິ່ງ, ແຂວງຫູໜານ, ກຸ້ຍໂຈ ແລະ ແຂວງອື່ນໆ. ໃນໂອກາດສະເຫຼີມສະຫຼອງວັນສ້າງຕັ້ງພັກກອມມູນິດຈີນ ຄົບຮອບ 20 ປີ ໃນເດືອນ ມິຖຸນາ 1941 ໄດ້ກຳນົດເອົາວັນທີ 1 ກໍລະກົດ 1921 ເປັນວັນສ້າງຕັ້ງພັກກອມມູນິດຈີນ ເຊິ່ງໄດ້ຮັບການຈັດຕັ້ງປະຕິບັດຈົນເຖິງປະຈຸບັນ.

ພາຍຫຼັງທີ່ໄດ້ຮັບການສ້າງຕັ້ງຂຶ້ນ ພັກໄດ້ສາມັກຄີ ເປັນເອກະພາບໃນການນຳພາປະຊາຊົນຈີນດຳເນີນການຕໍ່ສູ້ ຍາດເອົາໄຊຊະນະອັນຍິ່ງໃຫຍ່ຕໍ່ເນື່ອງລຽນຕິດ ເຊິ່ງໄດ້ສ້າງສິ່ງມະຫັດສະຈັນຫຼາຍຢ່າງໃນປະຫວັດສາດ ເປັນຕົ້ນແມ່ນໄດ້ສຳເລັດການປະຕິວັດຊາດປະຊາທິປະໄຕ ໃນສົງຄາມຕ້ານສັກດີນາ, ຂຸນເສິກ ແລະ ຟາດຊິດຍີ່ປຸນ, ໄດ້ປະກາດຄວາມເປັນເອກະລາດຂອງຊາດ ແລະ ສະຖາປະນາເປັນປະເທດ ສາທາລະນະລັດ ປະຊາຊົນຈີນ ໃນວັນທີ 1 ຕຸລາ 1949 ແລະ ພາຍໃຕ້ການນຳພາຂອງພັກ ປະເທດຈີນໄດ້ບັນລຸຜົນສຳເລັດຄັ້ງປະຫວັດສາດ ແລະ ເກີດມີການປ່ຽນແປງໃໝ່ຄັ້ງປະຫວັດສາດ, ສັງຄົມນິຍົມທີ່ມີສີສັນພິເສດຂອງຈີນ ໄດ້ກ້າວຂຶ້ນສູ່ຍຸກສະໄໝໃໝ່.

ຫຼັງຈາກນັ້ນ ທ່ານ ປອ ກອງແກ້ວ ໄຊສົງຄາມ ຍັງໄດ້ຍົກໃຫ້ເຫັນເຖິງ ການພົວພັນຮ່ວມມືຂອງສອງລັດຖະບານລາວ-ຈີນ ທີ່ໄດ້ມີການພົວພັນທີ່ດີນໍາກັນມາແຕ່ບູຮານນະການ, ປະຊາຊົນສອງຊາດໄດ້ດໍາລົງຊີວິດ ແລະ ທໍາມາຫາກິນຮ່ວມກັນບົນສາຍນໍ້າ ແລະ ສາຍພູທີ່ຕິດຈອດກັນ, ໄດ້ມີການສະໜັບສະໜູນຊ່ວຍເຫຼືອເຊິ່ງກັນ ແລະ ກັນ ທັງໃນໄລຍະຕໍ່ສູ້ກູ້ຊາດ, ການປົກປັກຮັກສາຄວາມເປັນເອກະລາດ ກໍ່ຄື ໄລຍະແຫ່ງການສ້າງສາພັດທະນາປະເທດຊາດ ຂອງປະຊາຊົນສອງຊາດ, ພັກ ປປ ລາວ ໄດ້ມີການພົວພັນກັບ ພັກກອມມູນິດຈີນ ແຕ່ປີ 1959, ຕໍ່ມາປີ 1961 ສອງປະເທດໄດ້ສ້າງຕັ້ງສາຍພັວພັນການທູດຮ່ວມກັນຢ່າງເປັນທາງການ.

• Facebook
• Twitter
• Line