ໄຊຈຳພອນ ສະຫລຸບການຈັດຕັ້ງປະຕິບັດກິດຈະກຳຂອງແຜນງານລາວ/030

ຕອນເຊົ້າຂອງວັນທີ 8 ກໍລະກົດ 2021 ທີ່ຫ້ອງປະຊຸມຫ້ອງການແຜນການ ແລະ ການລົງທຶນ ເມືອງໄຊຈຳພອນ ແຂວງບໍລິຄຳໄຊ ໄດ້ຈັດກອງປະຊຸມປະຈຳໄຕມາດ II ຂອງແຜນງານລາວ 030 ແລະ ວາງແຜນການຈັດຕັ້ງປະຕິບັດກິດຈະກຳຂອງແຜນງານປະຈຳໄຕມາດ III ປີ 2021 ໂດຍການເປັນປະທານຂອງທ່ານ ຄຳໄຊ ຕຸນາລົມ ຮອງເຈົ້າເມືອງໄຊຈຳພອນ ປະທານຊີ້ນຳວຽກງານ ແຜນງານລາວ/030 ປະຈຳເມືອງໄຊຈຳພອນ, ມີຫົວໜ້າ, ຮອງຫ້ອງການ, ວິຊາການ ບັນດາຫ້ອງການເປົ້າໝາຍ ແລະ ພະແນກການທີ່ເປັນຄູ່ຮ່ວມງານ ເຂົ້າຮ່ວມ.

ໃນກອງປະຊຸມ ທ່ານ ສຳລານໄຊ ເພັດສຸວັນ ວ່າການຫົວໜ້າຫ້ອງການແຜນການ ແລະ ການລົງທຶນເມືອງ ໄດ້ຂຶ້ນຜ່ານບົດລາຍງານການຈັດຕັ້ງປະຕິບັດກິດຈະກິດແຜນງານລາວ/030 ໃນໄຕມາດ 2 ແລະ ສະເໜີຊີ້ແຈງບັນດາກິດຈະກຳທີ່ປະຕິບັດສຳເລັດ, ກິດຈະກຳທີ່ກຳລັງປະຕິບັດ ແລະ ກິດຈະກຳທີ່ຍັງຄ້າງ.

ພ້ອມນັ້ນ ຍັງໄດ້ນຳສະເໜີຊີ້ແຈງການຈັດຕັ້ງປະຕິບັດກິດຈະກຳ ແລະ ການປະສານງານຫ້ອງການຄູ່ຮ່ວມງານນັບແຕ່ໄລຍະແບ່ງຄວາມຮັບຜິດຊອບ ຄື: ແຜນກິດຈະກຳກອງທຶນພັດທະນາບ້ານ ແຜນງານລາວ/030 ແຜນ ປີ 2021 ທົ່ວເມືອງມີທັງໝົດ 16 ບ້ານເປົ້າໝາຍ 77 ກິດຈະກຳ ໄດ້ຮັບທຶນປັບປຸງຊີວິດການເປັນຢູ່ VDF ໃນປີ 2018-2021 ມູນຄ່າ 2 ຕື້ ກວ່າກີບ, ທຶນ IDF ກໍ່ສ້າງພື້ນຖານໂຄງລ່າງ ມູນຄ່າ 1 ຕື້ ກວ່າກີບ, ກິດຈະກຳທີ່ຈັດຕັ້ງປະຕິບັດສຳເລັດ ຈຳນວນ 40 ກິດຈະກຳ ມູນຄ່າ 830 ລ້ານກວ່າກີບ, ກໍາລັງຈັດຕັ້ງປະຕິບັດ 36 ກິດຈະກໍາ ມູນຄ່າ 1 ຕື້ກວ່າກີບ, ຍັງບໍ່ທັນຈັດຕັ້ງປະຕິບັດ 1 ກິດຈະກຳ ມູນຄ່າ 42 ກວ່າລ້ານກີບ.

ໃນໄຕມາດ II ແມ່ນສໍາເລັດ 14 ກິດຈະກໍາ ແຜນພັດທະນາບ້ານຂອງຂະແໜງສາທາລະນະສຸກມີ 5 ກິດຈະກໍາ, ຂະແໜງ ໂຍທາທິການ ແລະ ຂົນສົ່ງມີ 4 ກິດຈະກໍາ, ຂະແໜງສຶກສາທິການ ແລະ ກິລາມີ 2 ກິດຈະກໍາ, ຂະແໜງຖະແຫຼງຂ່າວ, ວັດທະນະທຳ ແລະ ທ່ອງທ່ຽວມີ 3 ບ້ານ 3 ກິດຈະກໍາ.

ຈາກນັ້ນ ຕາງໜ້າແຕ່ລະຂະແໜງການກໍ່ໄດ້ຂຶ້ນລາຍງານຄວາມຄືບໜ້າໃນການຊ່ວຍເຫຼືອຄະນະພັດທະນາບ້ານໃນການຈັດຕັ້ງປະຕິບັດ ກິດຈະກໍາກອງທຶນຊ່ວຍເຫຼືອພັດທະນາບ້ານ 16 ບ້ານເປົ້າໝາຍທີ່ຕົນຮັບຜິດຊອບ ພ້ອມປະກອບຄຳຄິດເຫັນໃສ່ແຜນການຈັດຕັ້ງປະຕິບັດກິດຈະກຳຂອງແຜນງານປະຈຳໄຕມາດ III ປີ 2021 ເພື່ອແລກປ່ຽນຄວາມຄິດເຫັນໃນແຕ່ລະຂະແໜງການຢ່າງກົງໄປກົງມາຢ່າງເລິກເຊີ່ງ ໃຫ້ແຜນງານຂອງຕົນສຳເລັດຜົນຕາມລະດັບຄາດໝາຍ.

 

• Facebook
• Twitter
• Line