ກອງປະຊຸມໃຫຍ່ຄັ້ງທີ່ 4 ຂອງສະມາຄົມນັກທຸລະກິດໜຸ່ມ ເມືອງຄໍາເກີດ

ຕອນເຊົ້າວັນທີ່ 7 ກໍລະກົດ 2021 ທີ່ຫ້ອງປະຊຸມບໍລິສັດລັດພັດທະນາຊົນບົດ ໄດ້ຈັດກອງປະຊຸມໃຫຍ່ຄັ້ງທີ່ 4 ຂອງສະມາຄົມນັກທຸລະກິດໜຸ່ມ ເມືອງຄໍາເກີດ  ແຂວງບໍລິຄຳໄຊ ເປັນກຽດເຂົ້າຮ່ວມຂອງທ່ານ ທອງມະນີ ໂຄດປັນຍາ ເລຂາຊາວໜຸ່ມແຂວງ, ທ່ານ ໄຊຍະເພັດ ຈັນທິສອນ ປະທານສະມາຄົມນັກທຸລະກິດໜຸ່ມ ແຂວງບໍລິຄໍາໄຊ, ທ່ານ ແສງແກ້ວ ໃສມະນີ ຮອງເຈົ້າເມືອງ, ທ່ານ ຄອນສະຫວັນ ປິມາລາ ປະທານສະມາຄົມນັກທຸລະກິດໜຸ່ມເມືອງ ຄຳເກີດ, ມີ ຕາງຫນ້າສູນມິດຕະພາບລາວ-ຫວຽດນາມ, ຕາງຫນ້າຊາວໜຸ່ມ 3 ເມືອງ ແລະ ແຂກທີ່ຖືກເຊີນ ເຂົ້າຮ່ວມ.

ໃນໄລຍະ 5 ປີຜ່ານມາ ສະມາຄົມນັກທຸລະກິດໜຸ່ມເມືອງ ພາຍໃຕ້ການຊີ້ນໍາ-ນໍາພາ ຄະນະບໍລິຫານງານຊາວໜຸ່ມເມືອງຄໍາເກີດ ໄດ້ເປັນເຈົ້າການຜັນຂະຫຍາຍ ແລະ ຈັດຕັ້ງປະຕິບັດ ດ້ວຍຄວາມຮັບຜິດຊອບ ສາມາດຍາດໄດ້ຜົນສໍາເລັດຫຼາຍດ້ານ ເຊິ່ງເປັນການປະກອບສ່ວນເຂົ້າໃນການສ້າງສາ ແລະ ພັດທະນາເສດຖະກິດຂອງເມືອງ ໃຫ້ເຕີບໃຫຍ່ຂະຫຍາຍຕົວຕາມທິດຊີ້ນໍາ ແລະ ຈຸດໝາຍທີ່ທາງຂັ້ນເທິງວາງໄວ້.

ສະມາຄົມນັກທຸລະກິດໜຸ່ມເມືອງ ຍັງໄດ້ເຄື່ອນໄຫວຊ່ວຍເຫຼືອສັງຄົມ ເປັນຕົ້ນແມ່ນວຽກງານຂະບວນການ ໄດ້ເຂົ້າຮ່ວມຖອດຖອນບົດຮຽນວຽກງານຊາວໜຸ່ມຮອບດ້ານ 4 ເມືອງ ທີ່ເມືອງວຽງທອງເປັນເຈົ້າພາບ, ໄປຖອດຖອນບົດຮຽນການລ້ຽງປາເປັນສິນຄ້າຂອງຄອບຄົວຊາວໜຸ່ມຕົວແບບ ທີ່ບ້ານປາກປຶງ ເມືອງປາກຊັນ, ໄປທັດສະນະແລກປ່ຽນບົດຮຽນທີ່ ສສ ຫວຽດນາມ ກັບຊາວໜຸ່ມເມືອງ.

ຄຽງຄູ່ກັນນັ້ນ ບັນດາໂຄງການທີ່ເມືອງມອບໃຫ້ ສະມາຄົມນັກທຸລະກິດໜຸ່ມຮັບຜິດຊອບມີ: ໂຄງການບຸນຊ່ວງເຮືອ, ໂຄງການຕະຫຼາດຂອງກິນສຸກ ແລະ ໂຄງການເດີ່ນດອກປີກໄກ່ ລວມມູນຄ່າ 234 ລ້ານກີບ.

ຈາກນັ້ນ ສະມາຄົມນັກທຸລະກິດໜຸ່ມຊຸດເກົ່າກໍ່ໄດ້ຂຶ້ນລາໜ້າທີ່ ພ້ອມດຳເນີນການຄັດເລືອກເອົາຄະນະຊຸດໃໝ່ ໂດຍເລືອກເອົາ ທ່ານ ສຸດທິພົງ ຈັນທະພັນ ເປັນປະທານ, ທ່ານ ນ. ໄມແຖນ ກັນລະຍາ ເປັນຮອງປະທານ, ທ່ານ ສົມບູນ ແກ້ວສຸວັນ ເປັນຮອງປະທານ, ທ່ານ ຄໍາໃບ ອິນທະວົງ ແລະ ທ່ານ ຊຽງສົດ ພອນໄຊເດດ ເປັນຄະນະ.

• Facebook
• Twitter
• Line