ປະກາດແຕ່ງຕັ້ງຫົວໜ້າພະແນກຍຸຕິທຳແຂວງ

ພິທີປະກາດການຈັດຕັ້ງຫົວໜ້າພະແນກຍຸຕິທຳແຂວງ ໄດ້ຈັດຂຶ້ນໃນຕອນບ່າຍຂອງວັນທີ 28 ມິຖຸນາ 2021 ຢູ່ຫ້ອງປະຊຸມຫ້ອງວ່າການແຂວງ, ເປັນກຽດເຂົ້າຮ່ວມຂອງທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີຄະນະປະຈຳພັກແຂວງ, ຄະນະພະແນກ, ພະນັກງານລັດຖະກອນພາຍໃນພະແນກ ແລະ ແຂກຖືກເຊີນ ເຂົ້າຮ່ວມ.

ໃນພິທີ ໄດ້ຮັບຟັງການຜ່ານຂໍ້ຕົກລົງຂອງທ່ານເຈົ້າບໍລິຄຳໄຊ ສະບັບເລກທີ 443/ຂບຊ ລົງວັນທີ 15 ມິຖຸນາ 2021 ແລະ ເລກທີ 444/ຂບຊ ລົງວັນທີ 15 ມິຖຸນາ 2021 ວ່າດ້ວຍການຍົກຍ້າຍ ທ່ານນາງ ວັນນາ ປະເສີດກຸນ ຮອງປະທານຄະນະກຳມະການຍຸຕິທຳ, ປກຊ-ປກສ ສະພາປະຊາຊົນແຂວງຊຸດທີ 1 ໄປເປັນຫົວໜ້າພະແນກຍຸຕິທຳແຂວງບໍລິຄຳໄຊ, ຂໍ້ຕົກລົງຂອງຄະນະປະຈຳພັກແຂວງ ສະບັບເລກທີ 328/ຄປພ.ຂບຊ ລົງວັນທີ 15 ມິຖຸນາ 2021 ວ່າດ້ວຍການບົ່ງຕົວແຕ່ງຕັ້ງ ສະຫາຍ ນາງ ວັນນາ ປະເສີດກຸນ ເປັນເລຂາໜ່ວຍພັກຮາກຖານພະແນກຍຸຕິທຳແຂວງ.

ໂອກາດນີ້ ທ່ານເຈົ້າແຂວງ ຍັງໄດ້ໂອ້ລົມ ແລະ ໃຫ້ທິດຊີ້ນຳໃນຫຼາຍວຽກງານ ເຊິ່ງທ່ານໄດ້ເວົ້າວ່າ ການແຕ່ງຕັ້ງຍົກຍ້າຍບ່ອນປະຈຳການ ຂອງພະນັກງານລັດຖະກອນ ແມ່ນເປັນວຽກງານປົກກະຕິ ເພື່ອໃຫ້ແທດເໝາະກັບໜ້າທີ່ວຽກງານ ພ້ອມນີ້ ຜູ້ທີ່ໄດ້ຮັບມອບໝາຍ ຕ້ອງເອົາໃຈໃສ່ສຶກສາອົບການເມືອງ-ແນວຄິດ ໃຫ້ແກ່ສະມາຊິກພັກ ແລະ ພະນັກງານ ໃຫ້ເລິກເຊີ່ງກວ້າງຂວາງ, ກຳແໜ້ນໃຫ້ໄດ້ເຖິງສິດ, ໜ້າທີ່ ແລະ ພາລະບົດບາດຂອງຕົນ, ການປັບປຸງແບບແຜນວິທີເຮັດວຽກ ຕ້ອງມີຄວາມໂປ່ງໃສ, ບໍລິການສັງຄົມດ້ວຍຄວາມຈິງໃຈ, ມີທັດສະນະແກ້ໄຂບັນຫາໃຫ້ຖືກຕ້ອງຕາມຄວາມເປັນຈິງ, ຮູ້ແນວທາງຂອງພັກ-ລັດ, ຕັ້ງໜ້າຍົກລະດັບພະນັກງານໃນການຊອກຮູ້ຮ່ຳຮຽນທາງດ້ານວິສະເພາະ ແລະ ເອົາໃຈໃສ່ເພີ່ມທະວີຄວາມສາມັກຄີ ທັງພາຍໃນ ແລະ ພາຍນອກແໜ້ນແຟ້ນກວ່າເກົ່າ.

• Facebook
• Twitter
• Line