ສຳເລັດກອງປະຊຸມໃຫຍ່ ຄັ້ງທີ IV ຂອງແມ່ຍິງໜ່ວຍສະຫະພັນກໍາມະບານແຂວງ

ກອງປະຊຸມໃຫຍ່ ຄັ້ງທີ IV ຂອງແມ່ຍິງໜ່ວຍສະຫະພັນກໍາມະບານ ແຂວງບໍລິຄຳໄຊ ໄດ້ຈັດຂຶ້ນໃນຕອນບ່າຍຂອງວັນທີ 15 ມິຖຸນາ 2021 ຢູ່ຫ້ອງປະຊຸມຂອງຕົນ ພາຍໃຕ້ການເປັນປະທານຂອງສະຫາຍ ນາງ ພຸດສະດີ ບົວທອງ ປະທານແມ່ຍິງໜ່ວຍສະຫະພັນກໍາມະບານແຂວງ, ເປັນກຽດເຂົ້າຮ່ວມຂອງທ່ານ ນາງ ຄຳໃບ ບໍລິວັນ ຮອງປະທານສະຫະພັນແມ່ຍິງແຂວງ ແລະ ທ່ານ ດຳລົງ ທັບລາດ ປະທານສະຫະພັນກຳມະບານແຂວງ, ມີສະມາຊິກພາຍໃນໜ່ວຍ ແລະ ແຂກຖືກເຊີນ ເຂົ້າຮ່ວມ.

ແມ່ຍິງໜ່ວຍສະຫະພັນກຳມະບານແຂວງ ປະກອບມີສະມາຊິກແມ່ຍິງທັງໝົດ 15 ສະຫາຍ ເປັນສະມາຊິກພັກ 12 ສະຫາຍ ສໍາຮອງ 2 ສະຫາຍ, ໄລຍະຜ່ານມາ ໄດ້ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຂອງຕົນ ຕິດພັນກັບວຽກວິຊາສະເພາະທີ່ໄດ້ຮັບມອບໝາຍ ເຊິ່ງສະແດງອອກ ຄື: ວຽກງານສຶກສາອົບຮົມ ການເມືອງ-ແນວຄິດ ເຂົ້າຮ່ວມເຊື່ອມຊຶມມະຕິ ແລະ ເອກະສານສໍາຄັນຕ່າງໆຂອງພັກ-ລັດ ນຳຄະນະພັກ-ອົງການປົກຄອງແຂວງຈັດຂຶ້ນ 404 ຄັ້ງ, ເຂົ້າຮ່ວມເຊື່ອມຊຶມເນື້ອໃນເອກະສານລວມທັງໝົດ 34 ເອກະສານ ທຽບໃສ່ຄາດໝາຍສູ້ຊົນປະຕິບັດໄດ້ 95%, ຂະຫຍາຍສະມາຊິກແມ່ຍິງໄດ້ທັງໝົດ 15 ຄົນ ກວມເອົາ 100%, ໄດ້ຮັບການຍ້ອງຍໍຈາກທ່ານເຈົ້າແຂວງໃນການເຄື່ອນໄຫວວຽກງານຂໍ້ແຂ່ງຂັນ 5 ເປັນເຈົ້າປະຈຳທຸກໆປີ ແຕ່ປີ 2017-2020, ໄດ້ຮັບການຍ້ອງຍໍຈາກສູນກາງສະຫະພັນກຳມະບານລາວ 75 ເທື່ອຄົນ, ສາມາດຄັດເລືອກບຸກຄົນ 3 ດີ ປະເພດ 1 ມີ 14 ຄົນ, ປະເພດ 2 ມີ 1 ຄົນ ແລະ ຍັງໄດ້ຮັບການຢັ້ງຢືນເປັນໜ່ວຍແມ່ຍິງ 3 ດີ.

ຫຼັງຈາກນັ້ນ ກອງປະຊຸມ ໄດ້ມີການປ່ອນບັດ ເພື່ອເລືອກເອົາຄະນະໜ່ວຍແມ່ຍິງຊຸດໃໝ່ ເຊິ່ງຜ່ານການລົງຄະແນນສຽງ ໄດ້ເປັນເອກະສັນກັນເລືອກສະຫາຍ ນາງ ນາລີພອນ ອິນສີຊຽງໃໝ່ ເປັນປະທານແມ່ຍິງໜ່ວຍສະຫະພັນກຳມະບານແຂວງ ຊຸດທີ IV, ສະຫາຍ ນາງ ບຸນທະວີ ສີສະຫວັດ ເປັນຮອງປະທານ ແລະ ສະຫາຍ ນາງ ບົວບານ ແສນສຸກ ເປັນກຳມະການ ແລະ ຜູ້ກວດກາ.

• Facebook
• Twitter
• Line