ຝຶກອົບຮົມ ການປ້ອງກັນການແຜ່ລະບາດ ແລະ ຫຼຸດຜ່ອນຜົນກະທົບ ຈາກພະຍາດໂຄວິດ-19

ຍ້ອນພະຍາດໂຄວິດ 19 ກຳລັງແຜ່ລະບາດເປັນວົງກວ້າງ, ສະນັ້ນ ເພື່ອເປັນການຮຽນຮູ້ວິທີປ້ອງກັນຢ່າງຖືກຕ້ອງ ໃນວັນທີ 15 ມິຖຸນາ 2021 ຢູ່ສູນໄອຊີທີ ແຂວງບໍລິຄຳໄຊ ໄດ້ເປີດການຝຶກອົບຮົມ ກ່ຽວກັບການປ້ອງກັນການແຜ່ລະບາດ ແລະ ຫຼຸດຜ່ອນຜົນກະທົບຈາກພະຍາດໂຄວິດ 19 ຂຶ້ນ ໂດຍການເປັນປະທານຂອງ ທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ ປະທານຄະນະກຳມະການສະເພາະກິດຂັ້ນແຂວງ ເພື່ອປ້ອງກັນ, ຄວບຄູມ ແລະ ການແກ້ໄຂການລະບາດພະຍາດອັກເສບປອດ ເຊື້ອຈຸລະໂລກສາຍພັນໃໝ່ໂຄວິດ-19, ມີບັນດາພະແນກການທີ່ກ່ຽວຂ້ອງ, ວິທະຍາກອນ ຈາກສະມາຄົມສົ່ງເສີມທັກສະຊີວິດເດັກນ້ອຍ ແລະ ໄວໜຸ່ມສູນກາງ ແລະ ນັກສຳມະນາກອນຈາກ ເມືອງທ່າພະບາດ ແລະ ເມືອງບໍລິຄັນ ເຂົ້າຮ່ວມ.

ໃນພິທີ ທ່ານ ບຸນເສັງ ປະທຳມະວົງ ໄດ້ມີຄຳເຫັນກ່າວເປີດບັ້ນຝຶກອົບຮົມວ່າ ໂຄງການນີ້ມີຄວາມສຳຄັນຫຼາຍ ໃນການແກ້ໄຂສະພາບປະຈຸບັນ ເຊິ່ງມີເປົ້າໝາຍເພື່ອຊ່ວຍກຸ່ມເປົ້າໝາຍໃນຊຸມຊົນ, ໂຮງຮຽນປະຖົມ, ເດັກນ້ອຍ ເພື່ອເພີ່ມຄວາມຮູ້ກ່ຽວກັບການປ້ອງກັນພະຍາດໂຄວິດ-19 ໃຫ້ແກ່ຄະນະສຶກສາທິການ ແລະ ກິລາ ຂັ້ນເມືອງ ອຳນາດການປົກຄອງບ້ານ ແລະ ຄູອາຈານ ໃນໂຮງຮຽນເປົ້າໝາຍ 10 ແຫ່ງ ເພື່ອໃຫ້ສາມາດເຜີຍແຜ່ຂໍ້ມູນທີ່ຖືກຕ້ອງໃຫ້ນັກຮຽນ ແລະ ຄະນະພັດທະນາການສຶກສາຂັ້ນບ້ານໃຫ້ຫຼາຍຂຶ້ນ.

ໂຄງການດັ່ງກ່າວ ຈະສະໜອງອຸປະກອນ, ເຄື່ອງມື ແລະ ເຕັກນິກການດຳລົງຊີວິດແບບໃໝ່ ເພື່ອປັບປຸງຊີວິດການເປັນຢູ່ຂອງຊຸມຊົນ ທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19.

ໂຄງການນີ້ ຈະຖືກນຳໄປຈັດຕັ້ງປພະຕິບັດ ຢູ່ 10 ບ້ານເປົ້າໝາຍ ພາຍໃນເມືອງ ທ່າພະບາດ ແລະ ເມືອງບໍລິຄັນ, ໂດຍຈະມີກິດຈະກຳການນຳໃຊ້ຄູ່ມື, ການປ້ອງກັນການແຜ່ເຊື້ອ, ກິດຈະກຳການປູກຈິດສຳນຶກ, ກິດຈະກຳວາງແຜນ ແລະ ກຽມຄວາມພ້ອມ ເພື່ອຮອງຮັບການລະບາດ ຮ່ວມກັບຄະນະສະເພາະກິດຂັ້ນແຂວງ ແລະ ເມືອງ.

ພ້ອມນີ້ ຍັງໄດ້ຝຶກການຜະລິດໜ້າກາກອະນາໄມ ໃຫ້ກຸ່ມແມ່ຍິງທັງສອງເມືອງເປົ້າໝາຍ, ກິດຈະກຳສ້າງສະຖານທີ່ລ້າງມືຢູ່ໃນໂຮງຮຽນ, ພ້ອມຝຶກອົບຮົມການສ້າງລາຍຮັບໃຫ້ແກ່ຄອບຄົວ ດ້ວຍການລ້ຽງຈີ່ຫຼີດໃຫ້ແກ່ 10 ບ້ານ 2 ເມືອງເປົ້າໝາຍ, ຝຶກອົບຮົມການເຮັດນ້ຳຢາລ້າງຈານ ແລະ ຄຽງຄູ່ກັບການປ້ອງກັນການແຜ່ເຊືື້ອໂຄວິດ-19 ໄປພ້ອມໆກັນ.

ພາຍຫຼັງນັກສຳມະນາກອນຝືກອົບຮົມສຳເລັດແລ້ວ ຈະໄດ້ນຳໃຊ້ຄວາມຮູ້ ໄປເຜີຍແຜ່ໃຫ້ກວ້າງຂວາງ ແລະ ນຳໃຊ້ໃນຊຸມຊົນອຶ່ນໆ ເພື່ອປ້ອງກັນການແຜ່ເຊື່ອໂຄວິດ-19 ໃນອານາຄົດ.

• Facebook
• Twitter
• Line