ປກສ ເມືອງບໍລິຄັນ ກັກຕົວຜູ້ຖືກຫາ ພ້ອມຂອງກາງຢາບ້າ 4.000 ເມັດ

ໃນຕອນເຊົ້າ ວັນທີ 14 ກໍລະກົດ ປີ 2020 ເຈົ້າໜ້າທີ່ ປກສ ເມືອງບໍລິຄັນ ແຂວງ ບໍລິຄຳໄຊ ໄດ້ຮັບການລາຍງານຈາກພົນລະເມືອງດີ ວ່າ: ຢູ່ສວນຢາງພາລາ ລະຫວ່າງ ບ້ານກົກໂພ ເຊື່ອມຕໍ່ກັບ ບ້ານໜອງແດງ ເຂດນາກູນ ເມືອງ ບໍລິຄັນ ແຂວງບໍລິຄຳໄຊ, ຈະມີກຸ່ມຄົນບໍ່ດີລັກລອບຂົນສົ່ງຢາບ້າ, ຈຶ່ງແຕ່ງຕັ້ງພະນັກງານວິຊາສະເພາະລົງສົມທົບກັບ ປກສ ກຸ່ມນາກູນ ເພື່ອລົງກວດກາຕົວຈິງ, ຈົນຮອດເວລາ 20 ໂມງ ຂອງວັນດຽວກັນ ຈຶ່ງສາມາດກັກຕົວຜູ້ຖືກຫາໄດ້ 01 ຄົນ, ຊື່ ທ້າວ ລີຊົ່ງ, ອາຍຸ 45 ປີ, ອາຊີບເຮັດນາ, ຢູ່ບ້ານວັງໄຮ, ເມືອງທ່າໂທມ, ແຂວງ ໄຊສົມບູນ ພ້ອມຂອງກາງຢາບ້າ 02 ມັດ, ເທົ່າກັບ 4.000 ເມັດ, ພ້ອມດ້ວຍລົດຈັກເວບ 100 ສີຂຽວຫົວເປັດ, ທະບຽນ ດອ 2620 ກໍາແພງນະຄອນ.

ຜ່ານການສືບສວນ-ສອບສວນຂອງເຈົ້າໜ້າທີ່ ທ້າວ ລີຊົ່ງ ໄດ້ຮັບສາລະພາບວ່າ: ຢາບ້າຈຳນວນ 02 ມັດ ເທົ່າກັບ 4.000 ເມັດ, ທີ່ເຈົ້າໜ້າທີ່ໄດ້ກວດກາເຫັນແມ່ນເປັນຢາຂອງຜູ້ກ່ຽວຢາງແທ້ຈິງ, ເຊິ່ງຜູ້ກ່ຽວໄດ້ເລີ່ມຂາຍຢາບ້າມາແຕ່ຕົ້ນເດືອນ ມີຖຸນາ 2020, ຄັ້ງທຳອິດໄດ້ຊື້ຢາບ້ານຳກຸ່ມໄວລຸ່ນທີ່ມາຈາກແຂວງ ຊຽງຂວາງ ບໍ່ຮູ້ຊື່ , ຊື້ໃນຈຳນວນ 01 ຖົງ ເທົາກັບ 200 ເມັດ, ໃນລາຄາ 400.000 ກີບ, ເມື່ອໄດ້ຢາບ້າມາແລ້ວກໍ່ເອົາເສບ ແລະ ອີກຈຳນວນໜຶ່ງກໍ່ນຳໄປຂາຍໃຫ້ກັບໄວລຸ່ນເຂດບ້ານວັງໄຮ, ເມືອງ ທ່າໂທມ, ຂາຍໃນລາຄາເມັດລະ 5.000 – 10.000 ກີບ, ຕົກມາຮອດທ້າຍເດືອນ ມີຖຸນາ 2020 ທ້າວ ລີຊົ່ງ ກັບໝູ່ຊື່ທ້າວ ກ (ນາມສົມມຸດ) ຢູ່ບ້ານ ທົ່ງນາມີ, ເມືອງ ປາກກະດິງ ແຂວງ ບໍລິຄຳໄຊ ທັງສອງກໍ່ໄດ້ຊັກຊວນກັນຄ້າຂາຍຢາເສບຕິດ, ປະເພດ ຢາບ້າ , ທ້າວ ກ ໄດ້ຢາບ້າແລ້ວກໍ່ເອົາໃຫ້ທ້າວ ລີຊົງ ໄປຂາຍກ່ອນ ເມື່ອຂາຍໄດ້ຈຶ່ງເອົາເງິນມາຈ່າຍຕາມຫຼັງ, ໃນລາຄາມັດລະ 2.500.000 ກີບ, ມາຮອດວັນທີ່ 14 ກໍລະກົດ ປີ 2020 ທ້າວ ກໍ ໄດ້ໂທລະສັບຫາ ທ້າວ ລີຊົ່ງ ໃຫ້ມາຮັບເອົາຢາບ້ານໍາທ້າວ ກໍ ຢູ່ຄິວລົດເມືອງ ບໍລິຄັນ ແຂວງບໍລິຄຳໄຊ ໃນຕອນເຊົ້າວັນທີ່ 15 ກໍລະກົດ 2020 ທ້າວ ລີຊົ່ງ ກໍ່ໄດ້ຂີ່ລົດຈັກ ເວບ 100 ສີຂຽວຫົວເປັດ ທະບຽນ ອດ 2620 ກຳແພງນະຄອນ ມຸ່ງໜ້າມາແຕ່ບ້ານວັງໄຮ ເມືອງທ່າໂທມ ແຂວງ ໄຊສົມບູນ ລົງມາຫາທ້າວ ກໍ ທີ່ລໍຖ້າຢູ່ຄິວລົດເມືອງ ບໍລິຄັນ ແຂວງ ບໍລິຄຳໄຊ ຕາມການນັດໝາຍ, ພໍມາຮອດຄິວລົດແລ້ວ ທ້າວ ກໍ ກໍ່ ໄດ້ເອົາຢາບ້າຈຳນວນ 02 ມັດໃຫ້ທ້າວ ລີຊົ່ງ, ເມືອໄດ້ຢາຕາມທີ່ຕ້ອງການແລ້ວ ທ້າວ ລິຊົ່ງ ກໍ່ໄດ້ຂີ່ລົດຈັກ ເພື່ອຈະກັບເມືອບ້ານວັງໄຮ , ແຕ່ພໍມາຮອດເຂດບ້ານທ່າສີ ເມືອງບໍລິຄັນ ແຂວງບໍລິຄຳໄຊ ທ້າວ ລີຊົ່ງ ກໍ່ໄດ້ເອົາຢາບ້າ ມາເລາະຂາຍຢູ່ບ້ານກົກໂພ ແລະ ບ້ານໜອງແດງ, ເມື່ອມາຮອດເຂດສວນຢາງພາລາຜູ້ກ່ຽວຈຶ່ງຖືກເຈົ້າໜ້າທີ່ ປກສ ເມືອງບໍລີຄັນ ແຂວງບໍລິຄຳໄຊກັກຕົວພ້ອມຂອງກາງຢາບ້າຈຳນວນ 4.000 ເມັດ.

       ການເສບ ແລະ ການຄ້າ-ຂາຍ ສິ່ງເສບຕິດ ແມ່ນຜິດຕໍ່ມາດຕາ 315 ແລະ 320 ຂອງປະມວນກົດໝາຍອາຍາ ແຫ່ງ ສປປ ລາວ, ສ່ວນຄະດີດັ່ງກ່າວ ປະຈຸບັນ ທາງເຈົ້າໜ້າທີ່ກຳລັງສືບສວນ – ສອບສວນຂະຫຍາຍຜົນຫາກຸ່ມແກ້ງພວກຮ່ວມຂະບວນການມາດໍາເນີນຄະດີ ຕາມລະບຽບກົດໝາຍຢ່າງເຂັ້ມງວດ.

• Facebook
• Twitter
• Line