ສຳເລັດກອງປະຊຸມໃຫຍ່ ຄັ້ງທີ 2 ໜ່ວຍພັກສູນການສຶກສານອກໂຮງຮຽນແຂວງ

ກອງປະຊຸມໃຫຍ່ ຄັ້ງທີ 2 ຂອງໜ່ວຍພັກສູນການສຶກສານອກໂຮງຮຽນແຂວງ ໄດ້ຈັດຂຶ້ນໃນຕອນເຊົ້າຂອງວັນທີ 10 ມິຖຸນາ 2021 ຢູ່ຫ້ອງປະຊຸມຂອງຕົນ ພາຍໃຕ້ການເປັນປະທານຂອງສະຫາຍ ສັງວານ ວິໄລສຸກສະໄຫວ ເລຂາໜ່ວຍພັກສູນການສຶກສານອກໂຮງຮຽນ, ເປັນກຽດເຂົ້າຮ່ວມຂອງທ່ານ ຄຳແຫວນ ປັນຍານຸວົງ ຮອງເຈົ້າແຂວງບໍລິຄຳໄຊ ແລະ ທ່ານ ລົມ ແພງສຸກ ກຳມະການພັກແຂວງ ຫົວໜ້າພະແນກສຶກສາທິການ ແລະ ກິລາແຂວງ, ມີສະມາຊິກພັກ ແລະ ແຂກຖືກ ເຂົ້າຮ່ວມ.

ໜ່ວຍພັກສູນການສຶກສານອກໂຮງຮຽນ ປະຈຸບັນມີສະມາຊິກພັກ 10 ສະຫາຍ, ຍິງ 5 ສະຫາຍ ເຊິ່ງກວມເອົາຈຳນວນສະມາຊິກພັກ-ພະນັກງານລັດຖະກອນໃນໜ່ວຍ 90,9 %. ຄະນະພັກໄດ້ເປັນເຈົ້າການໃນການນຳເອົາເອກະສານການເມືອງ, ມະຕິ, ຄຳສັ່ງ, ແຈ້ງການຂອງພັກ-ລັດຂັ້ນເທິງມາຈັດຕັ້ງເຜີຍແຜ່, ເຊື່ອມຊຶມໃຫ້ສະມາຊິກພັກ, ພະນັກງານ, ນັກຮຽນຮັບຮູ້ທົ່ວເຖິງ ຊີ້ນຳໆພາພະນັກງານຄູ-ອາຈານຂຶ້ນແຜນການສອນ, ແຕ່ງບົດສອນ, ຜະລິດສື່ການສອນ ແລະ ຂຶ້ນຫ້ອງສິດສອນໄດ້ທັງໝົດ 11.818 ຊ.ມ ເທົ່າກັບ 95,81 %, ຮ່ວມໂມງສອນຖອດຖອນບົດຮຽນການສອນຂອງຄູຢູ່ພາຍໃນສູນ ແລະ ໂຮງຮຽນ ມສ ອ້ອມຂ້າງໄດ້ທັງໝົດ 13 ຄັ້ງ, ສອບເສັງເລື່ອນຂັ້ນ ມ5 ຂຶ້ນ ມ6 ໄດ້ 100 %, ສອບເສັງເລື່ອນຊັ້ນ ມ6 ຂຶ້ນ ມ7 ໄດ້ 100 %, ສອບເສັງຈົບຊັ້ນ ມ7 ໄດ້ 100 % ລວມໄດ້ 4 ລຸ້ນ ມີຈຳນວນນັກສອບເສັງ 205 ຄົນ, ຍິງ 50 ຄົນ,

 ນອກນີ້ ຍັງຝຶກອົບຮົມວິຊາຊີບຂັ້ນພື້ນຖານໃຫ້ພະນັກງານ, ນັກຮຽນ ແລະ ປະຊາຊົນ ເປັນຕົ້ນແມ່ນ ການປູກເຫັດນາງລົມ, ພືດຜັກປອດສານພິດ, ປຸງແຕ່ງອາຫານຄາວ-ຫວານ, ການລ້ຽງສັດ, ຊ່າງໄມ້, ຜະລິດເຂົ້າໜົມ ເພື່ອໃຫ້ເຂົາເຈົ້າມີຄວາມບຸກບືນຫ້າວຫັນເອົາໃຈໃສ່ປະຕິບັດໜ້າທີ່ວຽກງານທີຖືກມອບໝາຍດ້ວຍຄວາມຮັບຜິດຊອບສູງ ແລະ ໜ່ວຍພັກສູນການສຶກສານອກໂຮງຮຽນ ໄດ້ຖືກຈັດເປັນປະເພດ ແຂງ ຖືວ່າເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕາມມາດຖານເງື່ອນໄຂ.

ຈາກນັ້ນ ກອງປະຊຸມ ໄດ້ມີການປ່ອນບັດ ເລືອກເອົາຄະນະພັກຊຸດໃໝ່ ເຊິ່ງຜ່ານການລົງຄະແນນສຽງ ໄດ້ເປັນເອກະສັນກັນເລືອກສະຫາຍ ສັງວານ ວິໄລສຸກສະໄຫວ ເປັນເລຂາໜ່ວຍພັກຮາກຖານ ຊຸດທີ 2, ສະຫາຍ ທະນູສັກ ຕຸນາລົມ ເປັນຮອງເລຂາ ແລະ ສະຫາຍ ສໍແຫຼມສິງ ສົມພານທະບານສຸກ ເປັນຄະນະ ທັງເປັນຜູ້ກວດກາ.

• Facebook
• Twitter
• Line