ຮອງເລຂາພັກແຂວງບໍລິຄຳໄຊ ລົງເຄື່ອນໄຫວວຽກງານ ຢູ່ເມືອງ ວຽງທອງ

ໃນວັນທີ 9 ມິຖຸນາ 2021 ທ່ານ ວັນວິໄລ ແດນພູຫຼວງ ຮອງເລຂາພັກແຂວງບໍລິຄຳໄຊ ພ້ອມດ້ວຍຄະນະ ໄດ້ລົງເຄື່ອນໄຫວຽກງານຢູ່ເມືອງວຽງທອງ ໂດຍມີທ່ານ ອາລຸນສັກ ປະທຳມະວົງ ຮອງເຈົ້າເມືອງວຽງທອງ ແລະ ຂະແໜງການທີ່ກ່ຽວຂ້ອງ ຮ່ວມພາທາງ.

ການລົງເຄື່ອນໄຫວວຽກງານໃນຄັ້ງນີ້ ໄດ້ໄປບ້ານໄຊຈະເລີນ ແລະ ບ້ານໂພນດູ່ ເພື່ອລົງເກັບກຳຂໍ້ມູນດ້ານເສດຖະກິດ-ສັງຄົມຂອງບ້ານ, ທ່ານ ຈານທອງ ອ່ອນພະຈັນ ນາຍບ້ານ ໄຊຈະເລີນ ໄດ້ລາຍງານສະພາບເສດຖະກິດ-ສັງຄົມຂອງບ້ານໃຫ້ຄະນະໄດ້ຮັບຊາບ ວ່າ: ບ້ານ ໄຊຈະເລີນ ຫ່າງຈາກເທດສະບານເມືອງວຽງທອງປະມານ 32 ກິໂລແມັດ ມີທັງໝົດ 118 ຄອບຄົວ, ຄອບຄົວທີ່ຍັງທຸກຍາກ 30 ຄອບຄົວ, ປະຊາຊົນສ່ວນໃຫຍ່ ຢຶດຖືອາຊີບທຳການຜະລິດປູກຝັງ-ລ້ຽງສັດ ແລະ ເຮັດການບໍລິການຈຳນວນໜຶ່ງ, ພື້ນຖານໂຄ່ງລ່າງໄດ້ຮັບການພັດທະນາ ເປັນຕົ້ນແມ່ນໄດ້ນຳໃຊ້ກະແສໄຟຟ້າ,ນຳໃຊ້ລະບົບນໍ້າລິນ, ລູກຫຼານໄດ້ເຂົ້າໂຮງຮຽນ ແລະ ເຂົ້າເຖິງສາທາລະນະສຸກ, ເສັ້ນທາງຄົມມະນາຄົມເຂົ້າເຖິງຕົວເມືອງ ແຕ່ມີຄວາມຫຍຸ້ງຍາກການສັນຈອນໃນລະດູຝົນ.

ໂອກາດນີ້ ທ່ານ ວັນວິໄລ ແດນພູຫຼວງ ໄດ້ຮຽກຮ້ອງໃຫ້ອຳນາດການປົກຄອງຂັ້ນບ້ານ ຈົ່ງໄດ້ເປັນເຈົ້າການ ໃນການເຕົ້າໂຮມຄວາມສາມັກຄີປອງດອງປະຊາຊົນພາຍໃນບ້ານ ໃຫ້ເປັນປຶກແຜ່ນ, ມີຄວາມຊ່ວຍເຫຼືອເຊີ່ງກັນ ແລະ ກັນ ເຊື່ອໝັ້ນຕໍ່ການນຳພາຂອງພັກ, ຕໍ່ອຳນາດການປົກຄອງຂັ້ນເມືອງ ເປັນເຈົ້າການນຳເອົາມະຕິ, ຄຳສັ່ງຂອງຂັ້ນເທິງ ນຳໄປເຜີບແຜ່ໃຫ້ປະຊາຊົນໄດ້ຮັບຮູ້ເຂົ້າໃຈ, ພ້ອມນັ້ນ ທ່ານຍັງໄດ້ຮັບເອົາຄຳສະເໜີຂອງບ້ານ ເປັນຕົ້ນແມ່ນ ການຫາແຫຼ່ງທຶນ ເພື່ອບູລະນະອາຄານໂຮງຮຽນຊັ້ນປະຖົມສຶກສາສົມບູນພາຍໃນບ້ານ, ສຳລັບອາຄານໂຮງຮຽນຊັ້ນປະຖົມສຶກສາສົມບູນບ້ານໂພນດູ່ ແມ່ນຈະໄດ້ປຸກຫຼັງໃໝ່ ເພາະວ່າອາຄານແມ່ນມີຄວາມເກົ່າແກ່ ແລະ ຊຸດໂຊມຫຼາຍ ແລະ ຈະໃຫ້ສຳເລັດ ພ້ອມໃຫ້ໄດ້ນຳໃຊ້ໃນການເປີດສົກຮຽນໃໝ່ ໃນສົກຮຽນປີ 2021-2022 ນີ້.

ໃນຕອນບ່າຍຂອງວັນດຽວກັນ ຢູ່ທີ່ຫ້ອງປະຊຸມຫ້ອງວ່າການເມືອງວຽງທອງ ທ່ານ ວັນວິໄລ ແດນພູຫຼວງ ພ້ອມດ້ວຍຄະນະ ກໍ່ໄດ້ເຂົ້າຮັບຟັງລາຍງານ ການປະຕິບັດໜ້າທີ່ວຽກງານ ຂອງຄະນະຮັບຜິດຊອບວຽກງານກໍ່ສ້າງຮາກຖານການເມືອງຈຸດສູມເຂດໃຈກາງ ບ້ານຜາຂອດ ເຊິ່ງຄະນະໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ແລະ ບາງບົດຮຽນທີ່ສາມາດຖອດຖອນໄດ້, ໃນນັ້ນ ຄະນະຮັບຊອບໄດ້ລົງສົບທົບກັບອຳນາດການປົກຄອງຂັ້ນບ້ານ ນຳເອົາບັນດາຄຳສັ່ງ, ມະຕິ ແລະ ນິຕິກຳຂອງຂັ້ນເທິງ ລົງເຜີຍແຜ່ໃຫ້ພໍ່ແມ່ປະຊາຊົນພາຍໃນບ້ານໄດ້ຮັບຮູ້ ແລະ ເຂົ້າໃຈ ຕໍ່ແຜນພັດທະນາເສດຖະກິດ-ສັງຄົມຂອງແຂວງ, ຂອງເມືອງ ເຫັນວ່າ ປະຊາຊົນພາຍໃນບ້ານແມ່ນມີຄວາມຮັບຮູ້ ແລະ ເຂົ້າໃຈ ໃຫ້ການຮ່ວມມືເຂົ້າຮ່ວມຂະບວນຢ່າງຕັ້ງໜ້າ ເຮັດໃຫ້ບ້ານມີຄວາມສະຫງົບໂດຍພື້ນຖານ, ການຕັດໄມ້ທຳລາຍປ່າ ເພື່ອການຜະລິດຫຼຸດລົງ, ປະຊາຊົນມີຄວາມສາມັກຄີປອງດອງ, ແຕ່ຍັງມີປະກົດການຫຍໍ້ທໍ້ເກີດຂື້ນພາຍໃນບ້ານຈຳນວນໜຶ່ງ ເປັນຕົ້ນແມ່ນ ຂໍ້ຂັດແຍ່ງທາງດ້ານທີ່ດິນ, ການຄ້າຂາຍສີ່ງເສບຕິດ, ມີອາວຸດລ່າເນື້ອໄວ້ຄອບຄອງ, ຕໍ່ກັບກໍລະນີດັ່ງກ່າວ ຄະນະຮັບຜິດຊອບວຽກງານກໍ່ສ້າງຮາກຖານເມືອງຈຸດສູມເຂດໃຈກາງ ຮ່ວມກັບອຳນາດການປົກຄອງຂັ້ນບ້ານ ໄດ້ນຳພວກກ່ຽວແຕ່ລະເປົ້າໝາຍມາສຶກສາອົບຮົມ, ສ້າງບົດບັນທຶກ ເພື່ອຈະເປັນບ່ອນອິງໃນການດຳເນີນການເຂົ້າສູ່ຂະບວນຍຸຕິທຳໃນຄັ້ງຕໍ່ໄປ.

ທ່ານ ວັນວິໄລ ແດນພູຫຼວງ ຮອງເລຂາພັກແຂວງ ໄດ້ຕີລາຄາສູງ ແລະ ຍ້ອງຍໍຊົມເຊີຍຜົນງານ ການປະຕິບັດໜ້າຂອງຄະນະຮັບຜິດຊອບ ວຽກງານກໍ່ສ້າງຮາກຖານເມືອງຈຸດສູມເຂດໃຈກາງ ຕະຫຼອດໄລຍະຜ່ານມາ, ທ່ານຍັງໄດ້ຊີ້ນຳວຽກງານເພີ່ມເຕີມຫຼາຍດ້ານ ເປັນຕົ້ນແມ່ນ ໃຫ້ຖືເອົາວຽກງານການສຶກສາອົບຮົມການເມືອງ-ແນວຄິດ ສອດຫ້ອຍເຂົ້າໃນການເຜີຍແຜ່ມະຕິ, ຄໍາສັ່ງຂອງຂັ້ນເທິງ ເປັນອັນລວມ ແລະ ອັນສະເພາະດ້ວຍຫຼາຍຮູບຫຼາຍສີ ເຮັດໃຫ້ປະຊາຊົນມີຄວາມເຂົ້າໃຈຢ່າງເລິກເຊິ່ງ ຕໍ່ກັບແຜນພັດທະນາເສດຖະກິດ-ສັງຄົມຂອງແຂວງ, ຂອງເມືອງ ໃນໄລຍະປະຈຸບັນ ,ແກ້ໄຂປະກົດການຫຍໍ້ທໍ້ທີ່ເກີດຂື້ນສັງຄົມໃນທ້ອງຖິ່ນໃຫ້ຂາດໂຕ, ມີຄວາມສະຫງົບ, ຊຸກຍູ້, ສົ່ງເສີມປະຊາຊົນ ຫັນທຳການຜະລິດການປູກ-ການລ້ຽງ ໃຫ້ຫຼາຍກາຍເປັນສິນຄ້າ, ສ້າງຄວາມເຂັ້ມແຂງອົງການຈັດຕັ້ງຂັ້ນບ້ານ ໃຫ້ເປັນເຈົ້າການໃນການເຕົ້າໂຮມຄວາມສາມັກຄີປອງດອງປະຊາຊົນພາຍໃນບ້ານໃຫ້ເປັນປຶກແຜ່ນ.

ໂອກາດທີ່ທ່ານຮອງເລຂາພັກພັກແຂວງ ພ້ອມຄະນະ ໄດ້ພົບປະໂອ້ລົມໃນຄັ້ງນີ້ ຍັງໄດ້ນຳເອົາເຄື່ອງອຸປະໂພກ-ບໍລິໂພກຈຳນວນໜຶ່ງ ມາມອບໃຫ້ຄະນະຮັບຜິດຊອບວຽກງານກໍ່ສ້າງຮາກຖານເມືອງຈຸດສູມເຂດໃຈກາງ ບ້ານຜາຂອດ ເພື່ອນຳໃຊ້ເຂົ້າໃນຊີວິດປະຈຳວັນ.

• Facebook
• Twitter
• Line