ຫ້ອງວ່າການ ແລະ ຄະນະເລຂາທິການສະພາປະຊາຊົນແຂວງ ຈັດກອງປະຊຸມຮ່ວມກັນ

ກອງປະຊຸມຮ່ວມ ລະຫວ່າງຫ້ອງວ່າການແຂວງ ກັບ ຄະນະເລຂາທິການສະພາປະຊາຊົນແຂວງ ໄດ້ຈັດຂຶ້ນໃນວັນທີ 7 ມິຖຸນາ 2021 ຢູ່ຫ້ອງປະຊຸມຫ້ອງວ່າການແຂວງ ເປັນປະທານໂດຍ ທ່ານ ສົມໃຈ ແກ້ວສຸວັນ ຮອງຫົວໜ້າຫ້ອງວ່າການແຂວງ ແລະ ທ່ານ ວິລັດ ສຸມີໄຊ ຮອງເລຂາທິການສະພາປະຊາຊົນແຂວງບໍລິຄຳໄຊ, ມີຂະແໜງການທີ່ກ່ຽວຂ້ອງ ທັງສອງພາກສ່ວນເຂົ້າຮ່ວມ.

ໃນກອງປະຊຸມ ໄດ້ທົບທວນຄືນ ການຈັດຕັ້ງປະຕິບັດບົດບັນທຶກກອງປະຊຸມຮ່ວມລະຫວ່າງ ຫ້ອງວ່າການແຂວງ ກັບ ຄະນະເລຂາທິການສະພາປະຊາຊົນແຂວງ ຄັ້ງວັນທີ 12 ກໍລະກົດ 2019 ເຫັນວ່າ ຫຼາຍວຽກງານໄດ້ຮັບການເອົາໃຈໃສ່ ແລະ ໄດ້ຮັບຜົນສຳເລັດເປັນຢ່າງດີ ເປັນຕົ້ນແມ່ນ ການປະສານສົມທົບ ແລະ ຂອດການປະສານງານ ລະຫວ່າງ ຄະນະເລຂາທິການ ກັບ ຫ້ອງວ່າການແຂວງ ມີຄວາມສະດວກຫຼາຍຂຶ້ນ, ການສະໜອງຂໍ້ມູນ ມີຄວາມຈະແຈ້ງ, ສາມາດຜັນຂະຫຍາຍມະຕິຕ່າງໆ ຖືກຈັດຕັ້ງປະຕິບັດຢ່າງກວ້າງຂວາງ, ລົງຮອດຮາກຖານທ້ອງຖິ່ນ ແລະ ອື່ນໆ.

ນ້ອກຈາກນັ້ນ ຍັງໄດ້ຄົ້ນຄວ້າ, ປຶກສາຫາລື, ສົນທະນາແລກປ່ຽນ ຖອດຖອນບົນຮຽນ ແລະ ປະກອບຄໍາຄິດຄໍາເຫັນ ຕໍ່ຂໍ້ຄົງຄ້າງຈຳນວນໜຶ່ງ ເຊັ່ນ: ການຍົກສູງການສ້າງນິຕິກຳລຸ່ມກົດໝາຍ ໃຫ້ສາມາດໃຊ້ໄດ້ຈິງ ແລະ ມີສ່ວນຮ່ວມຂອງປະຊາຊົນ, ການແກ້ໄຂຄຳສະເໜີຂອງປະຊາຊົນ ຢ່າງມີປະສິດທິພາບ, ການແບ່ງຄວາມຮັບຜິດຊອບ, ການພົວພັນຮ່ວມມືຂອງຂະແໜງການກ່ຽວຂ້ອງ ແລະ ວຽກງານອື່ນໆ, ທັງນີ້ກໍ່ເພື່ອນຳໄປປັບປຸງ, ແກ້ໄຂ ແລະ ພັດທະນາໃຫ້ດີຂຶ້ນ ເຮັດໃຫ້ວຽກງານໄດ້ຮັບປະສິດທິຜົນສູງສຸດ.

• Facebook
• Twitter
• Line