ພະແນກການຕ່າງປະເທດ ແຂວງບໍລິຄຳໄຊ – ນະຄອນດ່າໜັງ ຈັດກອງປະຊຸມທາງໄກຮ່ວມກັນ

ກອງປະຊຸມແລກປ່ຽນຖອດຖອນບົດຮຽນ ລະຫວ່າງ ພະແນກການຕ່າງປະເທດ ແຂວງບໍລິຄຳໄຊ ສປປ ລາວ ແລະ ພະແນກພົວພັນຕ່າງປະເທດ ນະຄອນດາໜັງ ສສ ຫວຽດນາມ ຜ່ານລະບົບກອງປະຊຸມທາງໄກ ໄດ້ຈັດຂຶ້ນໃນວັນທີ 4 ມິຖຸນາ 2021 ຢູ່ຫ້ອງປະຊຸມຫ້ອງວ່າການແຂວງ ຝ່າຍແຂວງບໍລິຄຳໄຊ ນຳໂດຍ ທ່ານ ອຸດົມ ວົງໄກສອນ ຫົວຫນ້າພະແນກການຕ່າງປະເທດແຂວງ ທັງເປັນສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 11, ຝ່າຍນະຄອນດ່າໜັງ ນຳໂດຍທ່ານ ນາງ ເລຖີ້ທູແຫັ້ງ ຮອງຫົວຫນ້າພະແນກພົວພັນຕ່າງປະເທດ, ມີຄະນະພະແນກ ແລະ ພະນັກງານທັງສອງຝ່າຍ ເຂົ້າຮ່ວມ.

ຈຸດປະສົງ ກໍ່ເພື່ອເປັນການປຶກສາຫາລື, ແລກປ່ຽນສະພາບການກະກຽມບັນດາເນື້ອໃນ, ເງື່ອນໄຂ ແລະ ຄວາມພ້ອມຮອບດ້ານ ໃຫ້ແກ່ແຜນການຈັດກອງປະຊຸມພົບປະຂັ້ນສູງ ເພື່ອລົງນາມບົດບັນທຶກການຮ່ວມມືມິດຕະພາບ ລະຫວ່າງ ແຂວງບໍລິຄໍາໄຊ ແລະ ນະຄອນດ່າໜັງ ຢ່າງເປັນທາງການ ໃນໄລຍະມໍ່ໆນີ້.

ໂອກາດນີ້ ທ່ານຫົວໜ້າພະແນກການຕ່າງປະເທດແຂວງບໍລິຄຳໄຊ ໄດ້ລາຍງານໂດຍຫຍໍ້ສະພາບຈຸດພິເສດລວມຂອງແຂວງ ເປັນຕົ້ນແມ່ນ ການພັດທະນາເສດຖະກິດ-ສັງຄົມ, ທ່າແຮງບົ່ມຊ້ອນ, ດ້ານການພົວພັນຮ່ວມມືຂອງແຂວງບໍລິຄຳໄຊ ກັບບັນດາແຂວງຂອງ ສສ ຫວຽດນາມ ທີ່ສາມາດຮັກສາມູນເຊື້ອສາຍພົວພັນແບບພິເສດ, ການຮ່ວມມືຮອບດ້ານ ໄດ້ເປັນຢ່າງດີ, ມີການພົວພັນຊ່ວຍເຫຼືອ, ແລກປ່ຽນບົດຮຽນຮ່ວມກັນຢ່າງຕໍ່ເນື່ອງ ແລະ ແໜ້ນແຟ້ນ.

ສະເພາະການພົວພັນຮ່ວມມື ລະຫວ່າງ ແຂວງບໍລິຄໍາໄຊ ກັບ ນະຄອນດ່າໜັງ ເຫັນວ່າຄະນະການນໍາຂັ້ນສູງຂອງສອງແຂວງ ໄດ້ເດີນທາງໄປຢ້ຽມຢາມ ແລະ ພົບປະມິດຕະພາບ ຢ່າງເປັນປະຈຳ, ໃນໄລຍະຜ່ານມານະຄອນດ່າໜັງ ໄດ້ມອບເງິນສົດຈໍານວນ 440 ລ້ານດົ່ງ ໃຫແຂວງບໍລິຄໍາໄຊ ເພື່ອນໍາໃຊ້ເຂົ້າໃນວຽກງານຂົງເຂດກໍ່ສ້າງບຸກຄະລາກອນຊ່ວຍ, ມອບທຶນການສຶກສາ ຈໍານວນ 10 ທຶນ ໃຫ້ສະມາຄົມມິດຕະພາບລາວ-ຫວຽດຂອງແຂວງບໍລິຄໍາໄຊ, ໄດ້ຊ່ວຍເຫຼືອທຶນກໍ່ສ້າງບຸກຄະລາກອນ ຈໍານວນ 10 ທຶນ ແລະ ວຽກງານອື່ນໆ ກໍ່ໄດ້ມີການພົວພັນຮ່ວມມືກັນດ້ວຍດີຕະຫຼອດມາ.

ໃນກອງປະຊຸມ ຍັງໄດ້ຮັບຟັງການຜ່ານຮ່າງບົດບັນທຶກຊ່ວຍຈໍາ ວ່າດ້ວຍການຮ່ວມມືມິດຕະພາບ ໄລຍະ 5 ປີ 2022-2026 ລະຫວ່າງ ແຂວງບໍລິຄໍາໄຊ ສປປ ລາວ ແລະ ນະຄອນດ່າໜັງ ສສ ຫວຽດນາມ ທີ່ມີຫຼາຍເນື້ອໃນສຳຄັນ ເປັນຕົ້ນແມ່ນ ການສ້າງສາຍພົວພັນມິດຕະພາບລະຫວ່າງ 2 ແຂວງ, ແຜນການຮ່ວມມື ແລະ ຊ່ວຍເຫຼືອເຊິ່ງກັນ ແລະ ກັນ ໃນດ້ານການກໍ່ສ້າງບຸກຄະລາກອນ, ການສຶກສາ, ດ້ານເສດຖະກິດ-ສັງຄົມ ແລະ ອື່ນໆ.

ຫຼັງຈາກນັ້ນ ທັງສອງຝ່າຍ ໄດ້ມີການສະເໜີແລກປ່ຽນບົດຮຽນ ແລະ ປະກອບຄຳຄິດຄຳເຫັນຮ່ວມກັນ ເປັນຕົ້ນແມ່ນວຽກງານການສຶກສາ, ວຽກງານເສດຖະກິດ, ການດຶງດູດການລົງທຶນ ແລະ ອື່ນໆ.

• Facebook
• Twitter
• Line