ບໍລິຄຳໄຊ ສຸມໃສ່ໂຄສະນາເຜີຍແຜ່ວຽກງານຕິດຕາມ, ສະກັດກັ້ນ ພະຍາດໂຄວິດ-19 ສູ່ຮາກຖານທ້ອງຖິ່ນ

ເພື່ອເຮັດໃຫ້ການໂຄສະນາ-ເຜີຍແຜ່ ວຽກງານປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດໂຄວິດ-19 ລົງສູ່ທຸກຮາກຖານທ້ອງຖິ່ນ ແລະ ໄດ້ຮັບປະສິດທິຜົນສູງສຸດ ແຂວງບໍລິຄຳໄຊ ກໍ່ຄືພະແນກ ຖວທ ແຂວງ ໄດ້ນຳໃຊ້ພາຫະນະສື່ມວນຊົນ ໂຄສະນາ-ເຜີຍແຜ່ວຽກງານດັ່ງກ່າວ ດ້ວຍຫຼາຍຮູບ-ຫຼາຍສີຢ່າງແຂງແຮງ ທ່ານ ອຸດອນ ສອນສຸລິນ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງບໍລິຄຳໄຊ ໄດ້ໃຫ້ສຳພາດໃນວັນທີ 25 ພຶດສະພາ 2021 ຢູ່ພະແນກ ຖວທ ແຂວງ.

ປະຈຸບັນ ພະແນກ ຖວທ ແຂວງ ໄດ້ນໍາໃຊ້ພາຫະນະສື່ມວນຊົນທຸກປະເພດທີ່ມີ ເປັນຕົ້ນແມ່ນ ວິທະຍຸ, ໂທລະພາບ, ໜັງສືພິມ ແລະ ເວບໄຊຂອງແຂວງ ນຳເອົາຂໍ້ມູນຂ່າວສານທີ່ເປັນປະໂຫຍດ ແລະ ມີຄວາມຈິງ ໂດຍສະເພາະແມ່ນມະຕິ, ຄຳສັ່ງ ແລະ ແຈ້ງການ ຂອງຂັ້ນເທິງ ໂຄສະນາ-ເຜີຍແຜ່ໃຫ້ພໍ່ແມ່ປະຊາຊົນບັນດາເຜົ່າ ໄດ້ຮັບຮູ້ເຂົ້າໃຈເຖິງຜົນຮ້າຍ ແລະ ຮ່ວມແຮງຮ່ວມໃຈ ເຂົ້າໃນຂະບວນການຕ້ານ ແລະ ສະກັດກັ້ນພະຍາດໂຄວິດ-19 ໃຫ້ມີຄວາມເອກະພາບ ແລະ ກວ້າງຂວາງ, ພ້ອມດຽວກັນ ຍັງໄດ້ນຳໃຊ້ວິທະຍຸຊູມຊົນ ແລະ ໂທລະໂຄ່ງ ເປັນສື່ໃນການຜັນຂະຫຍາຍຄຳສັ່ງນິຕິກຳຂອງຂັ້ນເທິງ ໃຫ້ລົງສູ່ຮາກຖານທ້ອງຖິ່ນຢ່າງທົ່ວເຖີງ ເຊີ່ງປະຈຸບັນ ໃນທົ່ວແຂວງມີໂທລະໂຄ່ງຂອງເມືອງ-ບ້ານ ລວມເກືອບ 300 ຊຸດ.

ນອກນັ້ນ ຍັງໄດ້ນໍາໃຊ້ສື່ອິນເຕີເນັດ ຫຼື ສື່ສັງຄົມອອນລາຍ ເຊັ່ນ: ເຟດບຸກຂອງວິທະຍຸ-ໂທລະພາບ, ໜັງສືພິມ ແລະ ເວບໄຊ ແລະ ເຟດບຸກຂອງຫ້ອງການ ຖວທ 7 ເມືອງ ໂດຍໄດ້ນໍາສະເໜີບົດຂ່າວປະກອບພາບ, ແຈ້ງການ, ຂໍ້ມູນຂ່າວສານ ທີ່ເປັນທາງການອື່ນໆ ນຳມາເຜີຍແຜ່ຂໍ້ມູນຂ່າວສານ ໃຫ້ເຂົ້າເຖິງເປົ້າໝາຍຢ່າງກວ້າງຂວາງ, ທຸກສະຖານທີ່, ທຸກເວລາ ແລະ ຍັງເປັນການສະກັດກັ້ນ, ຕ້ານ ບັນດາຂ່າວລວງ, ຂ່າວປອມຕ່າງໆ ທີ່ບິດເບືອນຄວາມເປັນຈິງ ເຮັດໃຫ້ສັງຄົມເກີດຄວາມສັບສົບວຸ່ນວາຍ ແລະ ເຂົ້າໃຈຜິດ ຜ່ານການຈັດຕັ້ງປະຕິບັດຕົວຈິງ ເຫັນວ່າໄດ້ຮັບການຕອບຮັບຈາກສັງຄົມເປັນຢ່າງດີ.

ທ່ານຫົວໜ້າພະແນກ ຖວທ ຍັງໄດ້ຮູ້ຕື່ມອີກວ່າ ຍັງໄດ້ສຸມໃສ່ການຄຸ້ມຄອງດ້ານວັດທະນະທໍາ ໂດຍໄດ້ຕິດຕາມກວດກາ ການເຄື່ອນໄຫວຊີວິດວັດທະນະທໍາໃນສັງຄົມ ເພື່ອໃຫ້ປະຕິບັດຖືກຕ້ອງຕາມຄໍາສັ່ງ, ແຈ້ງການ ຂອງຄະນະສະເພາະກິດໃນແຕ່ລະໄລຍະ ເປັນຕົ້ນ ການຈັດງານປະເພນີຕ່າງໆ ຢ່າງເຂັ້ມງວດ ແລະ ຕິດຕາມຊຸກຍູ້ການຈັດຕັ້ງປະຕິບັດຄໍາແນະນໍາຂອງແຂວງ ກ່ຽວກັບການດໍາລົງຊີວິດແບບໃຫມ່ ໃນໄລຍະພະຍາດໂຄວິດ-19 ລະບາດ ແລະ ໄດ້ເຄື່ອນໄຫວຕິດຕາມກວດກາ ບັນດາກິດຈະການຕິດພັນກັບການທ່ອງທ່ຽວ ໂດຍການປະສານສົມທົບກັບເຈົ້າໜ້າທີ່ ແລະ ພາກສ່ວນທີ່ກ່ຽວຂ້ອງ ເຄື່ອນໄຫວຢ່າງເປັນປົກກະຕິຕໍ່ເນື່ອງ ເພື່ອລີກລ່ຽງການຕິດເຊື້ອພະຍາດໂຄວິດ-19 ໃນຊຸມຊົນ ມາເຖິງປັດຈຸບັນບາງກິດຈະການ ຍັງປະຕິບັດມາດຕະການສືບຕໍ່ປິດຊົ່ວຄາວ: ຮ້ານບັນເທີງ, ຄາລາໂອເກະ, ຮ້ານກິນດື່ມ ແລະ ອື່ນໆ ແລະ ບາງກິດຈະການກໍ່ຈະໄດ້ມີການຄົ້ນຄວ້າພິຈາລະນາ ຜ່ອນຜັນຕາມຄວາມເໝາະສົມ ໂດຍໃຫ້ຜູ້ປະກອບການສ້າງແຜນສະເໜີເປັນລາຍລັກອັກສອນ ໃຫ້ຄະນະສະເພາະກິດຂອງເມືອງ ຄົ້ນຄວ້າພິຈາລະນາເປັນແຕ່ລະກໍລະນີໄປ.

• Facebook
• Twitter
• Line