ກອງທຶນຮ່ວມນໍ້າໃຈຕ້ານ ໂຄວິດ-19 ມອບເຄື່ອງຊ່ວຍເຫຼືອໃຫ້ສັງຄົມ

ໃນລະຫວ່າງວັນທີ 17 ພຶດສະພາ 2021 ນີ້, ກອງທຶນຮ່ວມນໍ້າໃຈຕ້ານ ໂຄວິດ-19 ມອບເຄື່ອງຊ່ວຍເຫຼືອໃຫ້ກັບສັງຄົມ ໂດຍການນໍາພາຂອງທ່ານ ຄໍາໝັ້ນ ໄຊມູນວົງ ປະທານກອງທຶນຮ່ວມນໍ້າໃຈຕ້ານ ໂຄວິດ-19 ທັງເປັນຜູ້ປະກອບການ ເຈົ້າຂອງໂຮງຮຽນອະນຸບານ-ປະຖົມ ພູມສະຫວັນ ພ້ອມດ້ວຍຄະນະ ໄດ້ມອບເຄື່ອງຊ່ວຍເຫຼືອ ຕ້ານໂຄວິດ 19 ໃຫ້ແກ້ເມືອງຄຳເກີດ ແຂວງບໍລິຄຳໄຊ.

ກອງທຶນດັ່ງກ່າວແມ່ນໄດ້ລະດົມທຶນມາຈາກພາກສ່ວນຕ່າງໆເຊັ່ນ: ຜູ້ປົກຄອງນັກຮຽນ, ນັກທຸລະກິດ, ຊາວຄ້າຂາຍ ແລະ ປະຊາຊົນຜູ້ທີ່ມີນໍ້າໃຈຢາກຊ່ວຍເຫຼືອສັງຄົມ ແລະ ຢາກມີສ່ວນຮ່ວມໃນການຕ້ານໂຄວິດ-19, ເຊິ່ງໂຮງຮຽນອະນຸບານ-ປະຖົມ ພູມສະຫວັນ ເປັນພາກສ່ວນໂຮງຮຽນເອກກະຊົນເປັນໃຈກາງໃນການລະດົມທຶນດັ່ງກ່າວ ມາຮອດປະຈຸບັນ ແມ່ນສາມາດນໍາເຄື່ອງໄປມອບເຊັ່ນ: ຜ້າອັດປາກ, ເຈວລ້າງມື, ໝີ່ ແລະ ນໍ້າດື່ມມອບໃຫ້ບັນດາຫ້ອງການ ແລະ ດ່ານທີ່ເປັນຈຸດກວດຄົນເຂົ້າອອກເມືອງຄື: ມອບໃຫ້ດ່ານໂພນສະອາດທີ່ເປັນເຂດເຊື່ອມຕໍ່ລະຫວ່າງເມືອງຄໍາເກີດແຂວງບໍລິຄໍາໄຊກັບເມືອງນາກາຍແຂວງຄໍາມ່ວນ, ມອບໃຫ້ດ່ານໜອງກອກ, ມອບໃຫ້ຫ້ອງການສາທາລະນະສຸກເມືອງ, ມອບໃຫ້ໂຮງໝໍຊຸມຊົນເມືອງຄໍາເກີດ ແລະ ມອບໃຫ້ຫ້ອງວ່າການເມືອງຄໍາເກີດ ລວມມູນຄ່າລວມທັງໝົດແມ່ນ 6 ລ້ານກວ່າກີບ ກອງທຶນຮ່ວມນໍ້າໃຈຕ້ານ ໂຄວິດ-19 ຍັງສືບຕໍ່ລະດົມທຶນນໍາພາກສ່ວນຕ່າງໆທີ່ຢາກຊ່ວຍເຫຼືອສັງຄົມ ຈົນກວ່າພະຍາດໂຄວິດ-19 ຈະໝົດໄປ ທັງນີ້ກໍ່ເພື່ອເປັນການຊຸກຍູ້ນໍ້າໃຈໃຫ້ແກ່ພະນັກງານທີ່ເຮັດໜ້າທີ່ຕ້ານ ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ພາຍໃນເມືອງຄຳເກີດ ກໍ່ຄື ສປປ ລາວ.

• Facebook
• Twitter
• Line