ບໍລິຄຳໄຊ ຜະລິດເຂົ້ານາແຊງ ລື່ນແຜນ

ຊາວກະສິກອນທົ່ວແຂວງ ກຳລັງສຸມໃສ່ເກັບກ່ຽວເຂົ້ານາແຊງ ແລະ ສາມາດປະຕິບັດສຳເລັດແລ້ວປະມານ 50-60% ທ່ານ ດາລາພອນ ພົນສະຫວັດດີ ຫົວໜ້າຂະແໜງປູກຝັງ ໄດ້ໃຫ້ສຳພາດຕໍ່ສື່ມວນຊົນຂອງແຂວງ ໃນວັນທີ 27 ເມສາ 2021 ຢູ່ພະແນກກະສິກຳ ແລະ ປ່າໄມແຂວງບໍລິຄຳໄຊ.

ຕາມແຜນການຜະລິດເຂົ້ານາແຊງແມ່ນ 1.770 ເຮັກຕາ, ປະສິດທິພາບ 4,57 ໂຕນ/ເຮັກຕາ, ຜົນຜະລິດ 8.081 ໂຕນ, ຜ່ານການຈັດຕັ້ງປະຕິບັດຕົວຈິງ ໄດ້ 1.982 ເຮັກຕາ ລື່ນແຜນ 11,98%.

ມາຮອດປະຈຸບັນ ສາມາດເກັບກ່ຽວຜົນຜະລິດໄດ້ແລ້ວ 50-60% ແລະ ຄາດວ່າຕົ້ນເດືອນພຶດສະພາ ຈະໃຫ້ສຳເລັດ 100%, ຄາດຄະເນຜົນຜະລິດປະມານ 8.202 ໂຕນ.

ນອກຈາກນັ້ນ ການຜະລິດພືດລະດູແລ້ງ ສາມາດປະຕິບັດໄດ້ 10.079 ເຮັກຕາ ເທົ່າກັບ 90% ຂອງແຜນການ ແລະ ມີເນື້ອທີ່ປູກພືດຈຳນວນໜຶ່ງ ຖືກເສຍຫານຈາກອາກາດໜາວ 55 ເຮັກຕາ, ເນື້ອທີ່ຍັງເຫຼືອ 9.077 ເຮັກຕາ, ປະເພດພືດທີ່ປູກມີ: ສາລີ, ເຜືອກ-ມັນ, ຖົ່ວດິນ, ຖົ່ວຍາວ, ພືດຜັກ, ອ້ອຍ, ຢາສູບ, ໝາກນັດ, ໝາກຫຸ່ງ ແລະ ອື່ນໆ, ຄາດຄະເນຜົນຜະລິດປະມານ 90 ພັນກວ່າໂຕນ.

ທ່ານຫົວໜ້າຂະແໜງປູກຝັງຍັງໄດ້ໃຫ້ຮູ້ຕື່ກອີກວ່າ ສຳລັບແຜນການຜະລິດລະດູຝົນ ການປູກເຂົ້ານາປີຈະປະຕິບັດໃຫ້ໄດ້ 37.119 ເຮັກຕາ ຜົນຜະລິດ 141.790 ໂຕນ, ປູກເຂົ້າໄຮ່ 1.555 ເຮັກຕາ ຜົນຜະລິດ 2.558 ໂຕນ ແລະ ການປູກພືດ ໃຫ້ໄດ້ 16.892 ເຮັກຕາ ຜົນຜະລິດ 238.535 ໂຕ່ນ.

• Facebook
• Twitter
• Line