ມອບ-ຮັບ ອາຄານໂຮງຮຽນ ມັດທະຍົມຕົ້ນບ້ານ ນາໂທ

ຕອນບ່າຍຂອງວັນທີ 1 ເມສາ 2021 ຢູ່ໂຮງຮຽນບ້ານ ນາໂທ, ເມືອງວຽງທອງ, ແຂວງບໍລິຄໍາໄຊ ໄດ້ຈັດພິທີມອບ-ຮັບໂຮງຮຽນມັດທະຍົມຕົ້ນ ຫຼັງໃໝ່ພາຍຫຼັງກໍ່ສ້າງສໍາເລັດ ລະຫວ່າງ ບໍລິສັດ ສົມໄຊ ພັດທະນາກໍ່ສ້າງ ຈໍາກັດຜູ້ດຽວ ຜູ້ຮັບເໝົາ ແລະ ຫ້ອງການສຶກສາທິການ ແລະ ກິລາເມືອງ ເຈົ້າຂອງໂຄງການ ໂດຍເປັນກຽດເຂົ້າຮ່ວມຂອງ ທ່ານ ສົມໃຈ ຊົງລາວ່າງ ຮອງເລຂາພັກເມືອງ, ປະທານກວດກາພັກ-ຫົວໜ້າອົງການກວດກາລັດເມືອງວຽງທອງ, ມີຫົວໜ້າຫ້ອງການທີ່ກ່ຽວຂ້ອງ, ຄະນະກໍາມະການ, ຫົວໜ້າບໍລິສັດ, ພະນັກງານຕິດຕາມປະຈໍາພາກສະໜາມ, ຄູ-ອາຈານ, ນາຍບ້ານ ແລະ ພໍ່ແມ່ປະຊາຊົນພາຍໃນບ້ານເຂົ້າຮ່ວມ.

ການກໍ່ສ້າງໂຮງຮຽນຢູ່ບ້ານນາໂທ ເຊີ່ງໄດ້ເລີ່ມຈັດຕັ້ງປະຕິບັດຕົວຈິງ ແຕ່ວັນທີ 7 ກັນຍາ 2020 ຫາ ວັນທີ 1 ເມສາ 2021 ໄດ້ສໍາເລັດ 100%. ໂຄງການກໍ່ສ້າງຄັ້ງນີ້ປະກອບມີອາຄານຮຽນ 1 ຫຼັງ, ມີຂະໜາດ 40X9 ແມັດ, ແບ່ງອອກເປັນ 4 ຫ້ອງຮຽນ, 1 ຫ້ອງການຄູ ແລະ ອາຄານຫ້ອງນໍ້າ 1 ຫຼັງຂະໜາດ 3X6 ແມັດ, ແບ່ງເປັນ 4 ຫ້ອງ. ໂຮງຮຽນຫຼັງນີ້ແມ່ນເປັນລັກສະນະເຮືອນກໍ່ມຸ້ງດ້ວຍກະເບື້ອງສີ, ປູກະໂລ, ແຕ່ລະຫ້ອງປະກອບດ້ວຍໂຕະຕັ່ງ, ຕິດຕັ້ງໄຟຟ້າ ແລະ ພັດລົມ ຄົບຊຸດ. ລວມມູນຄ່າການກໍ່ສ້າງທັງໝົດ 699,994,142 ກີບ. ໂດຍການສະໜັບສະໜູນທຶນຈາກ ລັດຖະບານລາຊາອານາຈັກລູກຊໍາບວກ ແຜນງານລາວ/030 ໃນພິທີໄດ້ມີການເຊັນມອບ-ຮັບຈາກຜູ້ຮັບເໝົາກໍ່ສ້າງ ແລະ ເຈົ້າຂອງໂຄງການ ແລ້ວມອບຕໍ່ໃຫ້ຄູ-ອາຈານ ແລະ ບ້ານ ປົກປັກຮັກສາຕໍ່ໄປ.

• Facebook
• Twitter
• Line