ສຳເລັດກອງປະຊຸຸມ ຄັ້ງທີ V ຂອງຄະນະພັກຮາກຖານພະແນກສາທາລະນະສຸກແຂວງ

 

ກອງປະຊຸມໃຫຍ່ ຄັ້ງທີ V ຂອງຄະນະພັກຮາກຖານພະແນກສາທາລະນະສຸກແຂວງບໍລິຄຳໄຊ ໄດ້ຈັດຂຶ້ນໃນຂອງວັນທີ 15 ກໍລະກົດ 2020 ຢູ່ສະໂມສອນໃຫຍ່ຂອງແຂວງ ພາຍໃຕ້ການເປັນປະທານຂອງ ສະຫາຍ ສອນໄຊ ປັນຍານຸວົງ ເລຂາຄະນະພັກຮາກຖານພະແນກສາທາລະນະສຸກແຂວງ, ໃຫ້ກຽດເຂົ້າຮ່ວມຂອງສະຫາຍ ປອ ກອງແກ້ວ ໄຊສົງຄາມ ກຳມະການສູນກາງພັກ ເລຂາຄະນະບໍລິຫານງານພັກແຂວງ ມີສະມາຊິກພັກສົມບູນ 89 ສະຫາຍ, ຍິງ 50 ສະຫາຍ ແລະ ແຂກຖືກເຊີນເຂົ້າຮ່ວມ.

ກອງປະຊຸມໃຫຍ່ ຄັ້ງທີ V ຂອງຄະນະພັກຮາກຖານພະແນກສາທາລະນະສຸກແຂວງ ໄດ້ພ້ອມກັນຄົ້ນຄວ້າ ແລະ ປະກອບຄຳຄິດຄຳເຫັນ ໃສ່ຮ່າງບົດລາຍງານການເມືອງ, ແຜນພັດທະນາດ້ານສາທາລະນະສຸກ ແລະ ບົດສຳຫຼວດການນຳພາລວມ ຂອງຄະນະພັກຮາກຖານຊຸດເກົ່າ, ກອງປະຊຸມໄດ້ຕີລາຄາດ້ານດີ, ຂໍ້ຄົງຄ້າງ, ສາເຫດ, ບົດຮຽນໃນການຊີ້ນຳ-ນຳພາ ແລະ ການຈັດຕັ້ງປະຕິບັດມະຕິກອງປະຊຸມໃຫ່ຍໃນ 5 ປີຜ່ານມາ, ພ້ອມນີ້ຍັງໄດ້ເປັນເອກະສັນກັບຮັບຮອງເອົາທິດທາງ ແຜນການ 5 ປີ ນັບແຕ່ປີ 2021 ຮອດປີ 2025 ເຊິ່ງມີເນື້ອໃນສຳຄັນຫຼາຍດ້ານ ເປັນຕົ້ນແມ່ນດ້ານການເມືອງ-ແນວຄິດ ເອົາໃຈໃສ່ຫັນເອົາແນວທາງນະໂຍບາຍຂອງພັກ-ລັດ ເຂົ້າສູ່ແຕ່ລະຂົງເຂດວຽກງານຕົວຈິງທີ່ຕົນຮັບຜິດຊອບ.

ປັງປຸງກົງຈັກການຈັດຕັ້ງ, ຊັບຊ້ອນພະນັກງານໃຫ້ຖືກຕ້ອງສອດຄ່ອງກັບຕົວຈິງ, ຈັດແບ່ງສະມາຊິກພັກ ເຂົ້າໃນການຊີ້ນຳ-ນຳພາ ວຽກງານແຕ່ລະຂະແໜງຢ່າງແທດເໝາະ ໂດຍສະເພາະແມ່ນດ້ານແບບແຜນວິທີເຮັດວຽກ ແບບແຜນວິທີນຳພາ ແລະ ວິທີເຮັດວຽກ ເອົາໃຈໃສ່ປະຕິບັດຕາມຫຼັກການລວມສູນປະຊາທິປະໄຕ ເຮັດວຽກເປັນໝູ່ຄະນະ ແບ່ງຄວາມຮັບຜິດຊອບ, ສຸມໃສ່ຈັດຕັ້ງປະຕິບັດແຜນພັດທະນາວຽກງານສາທາລະນະສຸກ 5 ປີ ຄັ້ງທີ IX (2021-2025) ຂອງກະຊວງສາທາລະນະສຸກວາງອອກ, ຄະນະພັກຮາກຖານຕ້ອງນຳພາເດັດຂາດໂດຍກົງຮອບດ້ານ ຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ, ປຸກລະດົມສະມາຊິກພັກ, ພະນັກງານ ເປັນເຈົ້າການຈັດຕັ້ງປະຕິບັດຢ່າງຕັ້ງໜ້າ ແລະ ວຽກງານອື່ນໆ.

ພ້ອມກັນນັ້ນໃນພິທີຍັງໄດ້ໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະພັກຮາກຖານຊຸດໃໝ່ ຜ່ານການປ່ອນບັດລົງຄະແນນສຽງ ແລະ ກອງປະຊຸມຄັ້ງປະຖົມມະລຶກເລືອກໄດ້ ສະຫາຍ ດຣ ສອນໄຊ ປັນຍານຸວົງ ເປັນເລຂາຄະນະພັກຮາກຖານ ຊຸດທີ V, ສະຫາຍ ດຣ ນາງ ດວງຕາ ເລືອງມີໄລ ເປັນຮອງເລຂາ, ສະຫາຍ ຟອງສາລີ ຫຼວງມີໄຊ ເປັນຜູ້ກວດກາ, ສະຫາຍ ຈັນທອນ ຄູຫາເທບ ແລະ ສະຫາຍ ນາງ ບັນລຽງ ວໍລະສານ ເປັນຄະນະພັກຮາກຖານ ພ້ອມດຽວກັນໃນພິທີ ຍັງໄດ້ປ່ອນບັດເອົາຜູ້ແທນສົມບູນ 4 ສະຫາຍ ແລະ ສຳຮອງ 1 ສະຫາຍ ໄປຮ່ວມກອງປະຊຸມໃຫຍ່ ຄັ້ງທີ VII ຂອງຄະນະບໍລິຫານງານພັກແຂວງ.

• Facebook
• Twitter
• Line