ບ້ານໃຫຍ່ນໍ້າຢ້າງ ຈັດກອງປະຊຸມ ສະຫຼຸບຖອດຖອນບົດຮຽນ ປະຈໍາປີ 2020

ໃນວັນທີ 24 ມີນາ 2021 ນີ້ບ້ານໃຫຍ່ນໍ້າຢ້າງ, ເມືອງວຽງທອງ, ແຂວງບໍລິຄໍາໄຊ ໄດ້ຈັດກອງປະຊຸມສະຫຼຸບຖອດຖອນບົດຮຽນ ປະຈໍາປີ 2020 ແລະ ວາງທິດທາງແຜນປີ 2021 ຢູ່ຫ້ອງການບ້ານຂອງຕົນ ໂດຍການເປັນປະທານຂອງ ທ່ານ ມູນ ຄຸນປະເສີດ ກໍາມະການພັກເມືອງ, ເລຂາພັກບ້ານ-ນາຍບ້ານໃຫຍ່ນໍ້າຢ້າງ, ໃຫ້ກຽດເຂົ້າຮ່ວມໂດຍ ທ່ານ ສົມໃຈ ຊົງລາວ່າງ ຮອງເລຂາພັກເມືອງ, ປະທານກວດກາພັກ-ຫົວໜ້າອົງການກວດກາລັດ ເມືອງວຽງທອງ, ມີຄະນະບ້ານ, ພໍ່ແມ່ປະຊາຊົນ ແລະ ແຂກຖືກເຊີນ ເຂົ້າຮ່ວມ.

ທ່ານ ມູນ ຄຸນປະເສີດ ນາຍບ້ານໃຫຍ່ນໍ້າຢ້າງ ໄດ້ຜ່ານບົດສະຫຼຸບໃນການເຄື່ອນໄຫວວຽກງານຂອງບ້ານໄລຍະ 1 ປີຜ່ານມາ ວ່າ: ບ້ານໃຫຍ່ນໍ້າຢ້າງປະກອບມີ 3 ຄຸ້ມບ້ານ ຄື: ຄຸ້ມນໍ້າຢ້າງ, ຄຸ້ມນໍ້າງອມ ແລະ ຄຸ້ມຜາທອງ, ມີ 677 ຫຼັງຄາເຮືອນ, ມີ 811 ຄອບຄົວ, ມີພົນລະເມືອງທັງໝົດ 3.839 ຄົນ, ຍິງ 1.889 ຄົນ, ມີ 3 ຊົນເຜົ່າ: ເຜົ່າລາວລຸ່ມ, ເຜົ່າມົ້ງ ແລະ ເຜົ່າພ້ອງ ຢູ່ຮ່ວມກັນ.

ຜ່ານມາ ຄະນະບ້ານໄດ້ຊີ້ນໍາ-ນໍາພາພໍ່ແມ່ປະຊາຊົນພາຍໃນບ້ານສ້າງສາພັດທະນາສ້າງລາຍຮັບໃຫ້ບ້ານ ແລະ ຄອບຄົວ, ນໍາພາປະຕິບັດຈັດເກັບລາຍຮັບເຂົ້າງົບປະມານຕາມການມອບໝາຍຂອງຫ້ອງການ-ການເງິນເມືອງ ໃນສົກປີ 2020 ໄດ້ຮັບຕົວເລກທັງໝົດ 145,934,000 ກີບ, ເກັບໄດ້ຕົວຈິງ 137,013,389 ກີບ, ທຽບໃສ່ແຜນປີແມ່ນຫຼຸດແຜນ 6,11% ແລະ ໄດ້ພ້ອມກັນຊີ້ນໍາ-ນໍາພາຈັດຕັ້ງປະຕິບັດວຽກງານອື່ນໆຕາມ 5 ໜ່ວຍງານຂອງບ້ານຢ່າງມີຄວາມຮັບຜິດຊອບສູງ ໂດຍສະເພາະແມ່ນວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານສາສະໜາ, ວຽກງານອົງການຈັດຕັ້ງມະຫາຊົນ, ແກ້ໄຂບັນຫາປະກົດການຫຍໍ້ທໍ້ທີ່ເກີດຂຶ້ນພາຍໃນບ້ານ ແລະ ຢູ່ໃນຄວາມຮັບຜິດຊອບຂອງຕົນ.

ກອງປະຊຸມ ຍັງໄດ້ຜ່ານທິດທາງແຜນການ 1 ປີຕໍ່ໜ້າ ເພື່ອເປັນບ່ອນອິງໃນການຈັດຕັ້ງປະຕິບັດໃນຕໍ່ໜ້າ. ຈາກນັ້ນ ບັນດາຜູ້ເຂົ້າຮ່ວມໄດ້ຜັດປ່ຽນກັນປະກອບຄໍາຄິດ-ຄໍາເຫັນໃສ່ບົດສະຫຼຸບຢ່າງກົງໄປກົງມາ ເພື່ອຄວາມເປັນເອກະພາບພ້ອມກັນນໍາໄປຈັດຕັ້ງປະຕິບັດໃຫ້ໄດ້ຮັບຜົນ.

ໃນພິທີ ໄດ້ມອບໃບຍ້ອງຍໍ, ໃບຊົມເຊີຍຈໍານວນໜື່ງ ໃຫ້ແກ່ຜູ້ທີ່ມີຜົນງານດີເດັ່ນ ໃນການຈັດຕັ້ງປະຕິບັດ ແລະ ປະກອບສ່ວນພັດທະນາບ້ານໃນໄລຍະ 1 ປີຜ່ານມາ.

• Facebook
• Twitter
• Line