ມອບໃບຢັ້ງຢືນການຮຽນ-ການສອນພາສາອັງກິດ

ພິທີມອບໃບຢັ້ງຢືນ ການຮຽນ-ການສອນ ພາສາອັງກິດ ໄດ້ຈັດຂຶ້ນໃນວັນທີ 23 ມີນາ 2021 ຢູ່ຫ້ອງປະຊຸມ ວິທະຍາໄລກະສິກໍາ-ປ່າໄມ້ ແຂວງບໍລິຄຳໄຊ, ເປັນກຽດເຂົ້າຮ່ວມໂດຍ ທ່ານ ທະນູວັນ ວົງມະນີ ຮອງເລຂາຄະນະບໍລິຫານງານຊາວໜຸ່ມແຂວງບໍລິຄຳໄຊ, ທ່ານ ນາງ ພູຄໍາ ແສງລະພາ ຮອງເລຂາໜ່ວຍພັກ ວິທະຍາໄລກະສິກໍາ-ປ່າໄມ້ ພ້ອມດ້ວຍນັກສຶກສາ ເຂົ້າຮ່ວມ.

ໃນພິທີ ທ່ານ ຄໍາໄຂ ໂພນນະລາດ ຕາງໜ້າສູນພັດທະນາວິຊາຊີບ ຄະນະຊາວໜຸ່ມແຂວງໄດ້ຂຶ້ນຜ່ານບົດສະຫຼຸບການຮຽນ-ການສອນ ພາສາອັງກິດ ເຊິ່ງກິດຈະກໍາ ການຮຽນ-ການສອນ ພາສາອັງກິດ ຢູ່ວິທະຍາໄລກະສິກໍາ-ປ່າໄມ້ແຂວງ ໄດ້ເລີ່ມເປີດແຕ່ວັນທີ 18 ພະຈິກ 2020 ໂດຍມີພະນັກງານຄູ ຈາກຫ້ອງການ ຄະນະຊາວໜຸ່ມແຂວງ ຈໍານວນ 1 ທ່ານ ມາສອນໃນລະດັບຕົ້ນ, ໃຊ້ເວລາ 90 ຊົ່ວໂມງ ຈົບຫຼັກສູດ ມີຜູ້ເຂົ້າຮຽນທັງໝົດ 13 ທ່ານ, ຍິງ 6 ທ່ານ.

ໂອກາດທີ່ມີຄວາມໝາຍ ຄວາມສໍາຄັນນີ້ ທ່ານ ທະນູວັນ ວົງມະນີ ໄດ້ເປັນກຽດຂຶ້ນມອບໃບຢັ້ງຢືນໃຫ້ນັກສຶກສາທີ່ສໍາເລັດຫຼັກສູດ ການຮຽນ-ການສອນ ລະດັບຕົ້ນ ພ້ອມມີຄໍາເຫັນໂອ້ລົມ ເຊິ່ງ ກ່ອນອື່ນ ທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ນັກສຶກສາທັງໝົດ ທີ່ມີຄວາມຕັດສິນໃຈຍາດເວລາ ເຂົ້າສຶກສາຮໍ່າຮຽນ ພາສາອັງກິດໃນຄັ້ງນີ້ ແລະ ທ່ານໄດ້ເນັ້ນໜັກໃຫ້ທຸກທ່ານ ຈົ່ງນໍາເອົາຄວາມຮູ້ຄວາມສາມາດທີ່ຮຽນມາ ເພື່ອພັດທະນາຕົນເອງ ພ້ອມນໍາໄປໃຊ້ເຂົ້າໃນວຽກງານວິຊາສະຂອງຕົນ ແລະ ພັດທະນາວຽກງານຊາວໜຸ່ມ-ເຍົາວະຊົນ.

• Facebook
• Twitter
• Line