ການນໍາແຂວງ ຮ່ວມກັບກອງທຶນໜຶ່ງດວງໃຈ ບໍລິຄໍາໄຊຊ່ວຍເຫຼື່ອສັງຄົມ ລົງຊຸກຍູ້ 5 ບ້ານ ເມືອງໄຊຈຳພອນ

ເພຶ່ອເປັນການສ້າງຂະບວນການຂ່ຳນັບຮັບຕ້ອນວັນຊາດທີ 2 ທັນວາ ຄົບຮອບ 47 ປີ ທີ່ຈະມາເຖິງ ໃຫ້ມີບັນຍາກາດຟົດຟື້ນມ່ວນຊື່ນ ເຕັມໄປດ້ວຍຄວາມຫມາຍຄວາມສໍາຄັນຢ່າງໜັກແໜ້ນ, ໃນລະຫວ່າງ ວັນທີ 22 – 23 ພະຈິກ 2022 ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ ພ້ອມດ້ວຍຄະນະບໍລິຫານງານພັກແຂວງ ແລະ ກອງທຶນໜຶ່ງດວງໃຈບໍລິຄຳໄຊ ຊ່ວຍເຫຼືອສັງຄົມ ໄດ້ພ້ອມກັນນໍາເອົາເຄື່ອງນຸ່ງຫົ່ມ, ເຂົ້າສານ, ອຸປະກອນການສຶກສາ ແລະ ເຄື່ອງກິລາຈໍານວນໜຶ່ງ ລົງແຈກຍາຍໃຫ້ກັບປະຊາຊົນ 522 ຄອບຄົວ, ຄູ – ອາຈານ ແລະ ນ້ອງນັກຮຽນ ພາຍໃນ 5 ບ້ານ ຂອງເມືອງໄຊຈໍາພອນ ແຂວງບໍລິຄໍາໄຊ ຄື: ບ້ານ ໂພນງາມ, ບ້ານ ສົບຄີ, ບ້ານ ສົບຂອນ, ບ້ານ ເມືອງຈໍາ ແລະ ບ້ານ ໂພນເມືອງ ໂດຍການຮ່ວມພາທາງຂອງທ່ານ ໂກ່ ໄຊສົມບັດ ເຈົ້າເມືອງໄຊຈໍາພອນ.

ດ້ວຍຄວາມເປັນຫ່ວງເປັນໄຍ ຂອງບັນດາທ່ານການນໍາພັກ – ລັດຂັ້ນເທິງ ທີ່ມີຕໍ່ກັບພໍ່ແມ່ປະຊາຊົນບັນດາເຜົ່າ ຈຶ່ງໄດ້ລົງໃກ້ຊິດຕິດແທດ ຢ້ຽມຢາມຖາມຂ່າວ ເກັບກໍາສະພາບຄວາມເປັນຈິງ ຕໍ່ກັບການດໍາລົງຊີວິດປະຈໍາວັນຂອງພໍ່ແມ່ປະຊາຊົນ ເພຶ່ອເຮັດໃຫ້ພໍ່ແມ່ປະຊາຊົນທຸກທົ່ວໜ້າ ມີຄວາມບຸກບືກຫ້າວຫັນ, ຜ່ານຜາອຸປະສັກ, ພັດທະນາເສດຖະກິດ – ສັງຄົມ ແລະ ຄອບຄົວຂອງຕົນ ໃຫ້ມີຄວາມເຕີບໃຫຍ່ເຂັ້ມແຂງ ແລະ ຫຼຸດພົ້ນອອກຈາກຄວາມທຸກຍາກ ຂຶ້ນໄປເປັນກ່າວໆ.

ເນື່ອງຈາກວ່າເມືອງໄຊຈໍາພອນ ເປັນເມືອງໜຶ່ງຂອງແຂວງບໍລິຄໍາໄຊ ທີ່ຍັງບໍ່ທັນພົ້ນທຸກ ການຕັ້ງຖິ່ນຖານເຮືອນຊານ – ບ້ານຊ່ອງຂອງພໍແມ່ປະຊາຊົນ ແມ່ນຍັງມີລັກສະນະກະແຈກກະຈາຍ ເສັ້ນທາງການເຊື່ຶອມຕໍ່ເຂົ້າຫາແຕ່ລະບ້ານແມ່ນມີຄວາມຫຍຸ້ງຍາກ – ທຸລະກັນດານ ຈຶ່ງເຮັດໃຫ້ການເດີນເຂົ້າພົບປະຢ້ຽມຢາມ ລົງມອບເຄື່ອງຂອງຄະນະການນໍາ ໃຫ້ພໍ່ແມ່ປະຊາຊົນໃນຄັ້ງນິ້ ພົບກັບຄວາມຫຍຸ້ງຍາກ ແລະ ໃຊ້ເວລາດົນພໍສົມຄວນ.

• Facebook
• Twitter
• Line