ທ່າພະບາດ ສ້າງຂະບວນການແຂ່ງຂັນກິລາ ຂໍ່ານັບຮັບຕ້ອນກອງປະຊຸມອົງຄະນະພັກເມືອງກາງສະໄໝ

ໃນວັນທີ 1 ພະຈິກ 2022 ໄດ້ເປີດຂະບວນການແຂ່ງຂັນກິລາບານເຕະມິດຕະພາບ ແລະ ກິລາເປຕັງ ຂຶ້ນ ຢູ່ເດີ່ນກິລາຫ້ອງການສຶກສາທິການ ແລະ ກິລາ ເມືອງທ່າພະບາດ ໂດຍການເຂົ້າຮ່ວມ ຂອງທ່ານ ສົມສົດ ແສງອາພອນ ກໍາມະການພັກແຂວງ ເລຂາພັກເມືອງ ເຈົ້າເມືອງທ່າພະບາດ, ມີການນໍາຂັ້ນເມືອງ ພະນັກງານຫຼັກແຫຼ່ງພາຍໃນເມືອງເຂົ້າຮ່ວມ.

ການແຂ່ງຂັນກິລາໃນຄັ້ງນີ້ ກໍ່ເພື່ອເປັນການຂໍ່ານັບຮັບຕ້ອນກອງປະຊຸມສະຫຼຸບຕີລາຄາການນໍາພາ – ຊີ້ນໍາກາງສະໄໝຂອງກອງປະຊຸມໃຫຍ່ຜູ້ແທນສະໄໝທີ VI ອົງຄະນະພັກເມືອງທ່າພະບາດ ທີ່ໃກ້ຈະມາເຖິງນີ້ໃຫ້ເປັນຂະບວນການຟົດຟື້ນ ແລະ ທັງເປັນການເສີມສ້າງຮັດແໜ້ນຄວາມສາມັກຄີ ລະຫວ່າງ ພະນັກງານຫຼັກແຫຼ່ງພາຍໃນເມືອງ ໃຫ້ມີຄວາມແໜ້ນແຟ້ນຫຼາຍຂຶ້ນກວ່າເກົ່າ

ການແຂ່ງຂັນກິລາບານເຕະມິດຕະພາບ ປະເພດຊາຍ ແຂ່ງຂັນກັນ 1 ຄູ່ ໂດຍການພົບກັນລະຫວ່າງ ທີມຂົງເຂດວັດທະນະທໍາ – ສັງຄົມ ນໍາໂດຍ ທ່ານ ສົມສົດ ແສງອາພອນ ພົບກັບ ທີມຂົງເຂດເສດຖະກິດ ນໍາໂດຍທ່ານ ກອນ ຫຼວງພິທັກ.

ສ່ວນການແຂ່ງຂັນກິລາເປຕັງ ມີທີມຜູ້ເຂົ້າຮ່ວມການແຂ່ງຂັນທັງໝົດ 20 ທີມ ເປັນກິລາປະເພດທີມປະສົມຍິງ – ຊາຍ ເຊິ່ງຕະຫຼອດໄລຍະການແຂ່ງຂັນແມ່ນເຕັມໄປດ້ວຍບັນຍາກາດອັນມ່ວນຊື່ນ.

ສໍາລັບຜົນການແຂ່ງຂັນກິລາບານເຕະມິດຕະພາບ ແມ່ນທີມຂົງເຂດວັດທະນະທໍາ – ສັງຄົມ ສາມາດເອົາຊະນະທີມຂົງເຂດເສດຖະກິດ 2 ຕໍ່ 1 ປະຕູ ແລະ ຜົນການແຂ່ງຂັນຂອງກິລາເປຕັງ ອັນດັັບທີ 1 ແມ່ນທີມຈາກຫ້ອງການສຶກສາທິການ ແລະ ກິລາ ໄດ້ຮັບໂລ້ 1 ໜ່ວຍພ້ອມເງິນສົດ 250.000 ກີບ, ອັນດັບທີ 2 ທີມຫ້ອງການກະສິກໍາ ແລະ ປ່າໄມ້ ໄດ້ຮັບເງິນສົດ 150.000 ກີບ, ໃຫ້ກຽດມອບລັງວັນກິລາເປຕັງໂດຍ ທ່ານ ໄຊຈະເລີນ ໄຊຍະເດດ ວ່າການຫົວໜ້າຫ້ອງການສຶກສາທິການ ແລະ ກິລາ.

• Facebook
• Twitter
• Line