ຫົວສິງໄຄ ສາມາດຊ່ວຍແກ້ອາການປາກແຫ້ງໄດ້!..

ຫົວສິງໄຄແມ່ນສະໝູນໄພທີ່ມີມາຕັ້ງແຕ່ສະໄໝບູຮານ ມີສັບພະຄຸນໃຊ້ເປັນຢາຮັກສາພະຍາດ ໂດຍສະເພາະແມ່ນໃນສະພາບອາກາດທີ່ໜາວເຢັນ ຖ້າໃຜເລີ່ມມີສົບແຫ້ງ ມື້ນີ້ພວກເຮົາມີວິທີເຮັດນໍ້າຫົວສິງໄຄເພື່ອບັນເທົາອາການດັ່ງ ກ່າວມາຝາກ.

ສຳລັບວິທີການເຮັດນໍ້າຫົວສິງໄຄເພື່ອແກ້ອາການປາກແຫ້ງ ໃຊ້ຕົ້ນຫົວສິງໄຄແກ່ໆ ສົດໆ ປະມານ 1 ກຳມື ທຸບພໍແຫຼກແລ້ວນຳໄປຕົ້ມກັບນໍ້າປະມານ 1 ລິດ ແລະ ຕອງເອົາແຕ່ນໍ້າ ເຊີ່ງສາມາດດື່ມແທນນໍ້າໄດ້ໝົດມື້ ເພາະມີສັບພະຄຸນໃນການແກ້ຮັກສາອາການຮ້ອນໃນ ແລະ ຊ່ວຍຮັກສາຮີມສົບທີ່ແຫ້ງແຕກໄດ້ນຳອີກ ຖ້າຮູ້ແບບນີ້ແລ້ວເວລາທ່ານໄປພົບເຈີ ອາການເຢັນໆ ແລ້ວສົບແຫ້ງແຕກ ລອງນຳວິທີນີ້ໄປເຮັດເບີ່ງ ຮັບຮອງວ່າສົ່ງຜົນດີຕໍ່ສຸຂະພາບແນ່ນອນ.

ສັບພະຄຸນ ຂອງຫົວສິງໄຄເລີ່ມຈາກໃບສົດຈະຊ່ວຍຫຼຸດຄວາມດັນເລືອດສູງ, ຮັກສາໄຂ້ ແລະ ໃຊ້ເປັນຢາແກ້ອາການຫອບຫືດ, ເຈັບທ້ອງ, ແກ້ອາການທ້ອງເບັງ ແລະ ໂລກອະຫິວາ ຫຼື ສາມາດຜະລິດເປັນຢາທາກໍ່ໄດ້ ແລະ ຍັງສາມາດ ນຳໃຊ້ປະສົມກັບສະໝູນໄພຊະນິດອື່ນເພື່ອຮັກສາພະຍາດຕ່າງໆ ເຊັ່ນ: ບຳລຸງທາດຕ່າງໆ ບຳລຸງໃຫ້ກິນເຂົ້າແຊບ ແລະ ສາມາດໄລ່ເຫື່ອ ສ່ວນຫົວເປັນຢາເພື່ອຮັກສາພະຍາດກາກເກື້ອນ, ແກ້ທ້ອງເບັງ, ຮັກສານີ້ວ, ບຳລຸງທາດໄຟ, ຫຼຸດຄວາມດັນສູງ, ອຳມະພາດ, ແກ້ເຈັບເສັ້ນ ແລະ ແກ້ອາການວິນຫົວ ສ່ວນຕົ້ນແມ່ນໃຊ້ເປັນຢາແກ້ຂັບລົມ, ແກ້ເບື່ອອາຫານ, ແກ້ຜົມຫຼົ່ນຜົມ, ຜົມແຕກປາຍ, ຍ່ຽວບໍ່ອອກ, ເປັນນີ້ວ ແລະ ເປັນຢາບຳລຸງທາດໄຟໃຫ້ຂະຫຍາຍໂຕ ສຳລັບຮາກໃຊ້ເປັນຢາບັນເທົາຫຼຸດອາການໄຂ້, ເຈັບທ້ອງ ແລະ ຖອກທ້ອງ.
ຂໍ້ມູນຈາກ: www.medialaos.com

• Facebook
• Twitter
• Line