ໂຄສະນາເຜີຍແຜ່ປູກຈິດສໍານຶກການອະນຸລັັກສັດປ່າ ແລະ ປ່າໄມ້ ໃນເຂດປ່າສະຫງວນແຫ່ງຊາດນໍ້າກະດິງ

ໃນວັນທີ 27 ມີຖຸນາ – 1 ກໍລະກົດ 2022 ທີມງານຂອງກອງຄຸ້ມຄອງປ່າສະຫງວນແຂວງບໍລິຄໍາໄຊ ໂຄງການຄຸ້ມຄອງລະບົບນິເວດວິທະຍາ ແລະ ສັດປ່າແບບປະສົມປະສານ ໄດ້ລົງໂຄສະນາເຜີຍແຜ່ປູກຈິດສໍານຶກ ກ່ຽວກັບວຽກງານຄຸ້ມຄອງ, ປົກປັກຮັກສາ, ການພັດທະນາ ແລະ ການນໍາໃຊ້ສັດປ່າ ແລະ ປ່າໄມ້ ໃນເຂດປ່າສະຫງວນແຫ່ງຊາດນໍ້າກະດິງ ຢູ່ບ້ານນາຊວງ, ບ້ານນາວັງໄຄ້, ບ້ານ ນໍ້າກ້າງ, ບ້ານຄອນຕ່າວ ແລະ ບ້ານນາໂທ, ເມືອງວຽງທອງ, ແຂວງບໍລິຄໍາໄຊ ໂດຍການນໍາທີມຂອງ ທ່ານ ທອງສະຫວາດ ສີບົວຄໍາ ຮອງຫົວໜ້າກອງຄຸ້ມຄອງປ່າສະຫງວນແຂວງບໍລິຄໍາໄຊ ພ້ອມດ້ວຍທິມງານຈາກແຂວງ-ເມືອງ, ໂດຍມີພໍ່ – ແມ່ປະຊາຊົນ ແລະ ນ້ອງນັກຮຽນ ເຂົ້າຮ່ວມ.

ໃນການລົງໂຄສະນາເຜີຍແຜ່ຄັ້ງນີ້ ທີມງານໄດ້ນໍາເອົາບັນດານິຕິກໍາຕ່າງໆທີ່ກ່ຽວພັນກັບການອະນຸລັກສັດປ່າ ແລະ ປ່າໄມ້ ເປັນຕົ້ນແມ່ນ ກົດໝາຍວ່າດ້ວຍປ່າໄມ້, ລະບຽບການຄຸ້ມຄອງສັດປ່າ ແລະ ປ່າໄມ້ ມາເຜີຍແຜ່, ພ້ອມທັງສາທິດລະຄອນ ແລະ ນໍາພາປະຊາຊົນ, ນັກຮຽນຫຼີ້ນເກມທີ່ກ່ຽວພັນກັບການອະນຸລັກສັດປ່າ ແລະ ປ່າໄມ້, ອະທິບາຍຄຸນປະໂຫຍດຂອງປ່າໄມ້, ສັດປ່າ, ວິທີການນໍາໃຊ້ແບບຖືກຕ້ອງ, ຊີ້ແຈງຜົນກະທົບຈາກການທໍາລາຍປ່າໄມ້, ສັດປ່າ.

ເປົ້າໝາຍຂອງໂຄງການ ກໍ່ເພື່ອເຮັດໃຫ້ພໍ່ແມ່ປະຊາຊົນບັນດາເຜົ່າ ແລະ ນ້ອງນັກຮຽນໄດ້ຮັບຮູ້ເຂົ້າໃຈ ແລ້ວພ້ອມກັນອະນຸລັກປົກປັກຮັກສາສິ່ງແວດລ້ອມ ໃຫ້ມີຄວາມອຸດົມສົມບູນ, ມີການຂະຫຍາຍຕົວທາງດ້ານຊີວະນາໆພັນ ແລະ ມີຄວາມຍືນຍົງຕະຫຼອດໄປ.

• Facebook
• Twitter
• Line