ປກສ ແຂວງ ບໍລິຄຳໄຊ ປະກາດອະໄພຍະໂທດ, ຫຼຸດຜ່ອນໂທດ ແລະ ປ່ອຍຕົວນັກໂທດ

ວັນທີ 19 ມັງກອນ 2023 ຢູ່ຄ້າຍຄຸມຂັງ-ດັດສ້າງ ປກສ ແຂວງບໍລິຄຳໄຊ ໄດ້ຈັດພິທີປະກາດອະໄພຍະໂທດ, ຫຼຸດຜ່ອນໂທດ ແລະ ປ່ອຍຕົວ ໃຫ້ນັກໂທດຜູ້ທີ່ມີມາດຖານ, ເງື່ອນໄຂຄົບຖ້ວນ ຕາມກົດລະບຽບຂອງຄ້າຍຄຸມຂັງ-ດັດສ້າງ ເນື່ອງໃນໂອກາດ ວັນຊາດທີ 02 ທັນວາ ຄົບຮອບ 47 ປີ ( 02 ທັນວາ 1975 – 02 ທັນວາ 2022 ) ເປັນປະທານໂດຍ ທ່ານ ຄຳແຫວນ ປັນຍານຸວົງ ຮອງເຈົ້າແຂວງບໍລິຄຳໄຊ, ປະທານຄະນະກຳມະການຄວບຄຸມ ແລະ ຕ້ານຢາເສບຕິດແຂວງ, ມີຄະນະກອງບັນຊາການປ້ອງກັນຄວາມສະຫງົບ, ຄະນະຄ້າຍຄຸມຂັງ-ດັດສ້າງ, ກຳລັງປ້ອງກັນຊາດ, ສານປະຊາຊົນ ແລະ ພະແນກຍຸຕິທຳ, ພາກສ່ວນກ່ຽວຂ້ອງ ພ້ອມດ້ວຍຍາດພີ່ນ້ອງ ແລະ ນັກໂທດທີ່ໄດ້ຮັບອະໄພຍະໂທດ, ຫຼຸດຜ່ອນໂທດ ແລະ ປ່ອຍຕົວ ເຂົ້າຮ່ວມ.

ໃນພິທີ ໄດ້ຜ່ານບົດສະຫຼຸບຕີລາຄາໂດຍຫຍໍໍ້ວຽກງານ ໃຫ້ອະໄພຍະໂທດ, ຫຼຸດຜ່ອນໂທດ, ລັດຖະດຳລັດຂອງປະທານປະເທດ ວ່າດ້ວຍການໃຫ້ອະໄພຍະໂທດ ພ້ອມທັງໄດ້ປະກາດລາຍຊື່ນັກໂທດ ທີ່ໄດ້ຮັບການອະໄພຍາໂທດ, ຫຼຸດຜ່ອນໂທດ ແລະ ປ່ອຍຕົວ.

ໂດຍອີງຕາມ ລັດຖະບັນຍັດ ຂອງປະທານປະເທດ ສະບັບເລກທີ 001/ປປທ ລົງວັນທີ 20 ມີນາ 2018 ວ່າດ້ວຍການປະຕິບັດນະໂຍບາຍໃຫ້ແກ່ນັກໂທດຜູ້ທີ່ມີຜົນງານດີເດັ່ນ, ປະຕິບັດກົດລະບຽບຂອງຄ້າຍຄຸມຂັງ-ດັດສ້າງ ໄດ້ດີ ແລະ ຄົບຕາມມາດຖານ, ເງື່ອນໄຂ ໃນການສະເໜີໃຫ້ອະໄພຍະໂທດ, ຫຼຸດຜ່ອນໂທດ ແລະ ປ່ອຍຕົວ, ໃຫ້ແກ່ນັກໂທດຜູ້ທີ່ມີຄວາມກ້າວໜ້າໃນຂອບເຂດທົ່ວປະເທດ ເນື່ອງໃນໂອກາດ ວັນຊາດ ທີ 02 ທັນວາ ຄົບຮອບ 47 ປີ ເຊິ່ງມາດຖານເງື່ອນໄຂຂອງຜູ້ທີ່ຈະໄດ້ຮັບການຜ່ອນໂທດແມ່ນຈະຕ້ອງເປັນບຸກຄົນທີ່ມີຄວາມກິນແໜງແຄງໃຈຕໍ່ການກະທໍາຜິດຂອງຕົນ, ມີຄວາມບຸກບືນ, ຫ້າວຫັນໃນການປັບປຸງປ່ຽນແປງຕົນເອງທາງດ້ານແນວຄິດຈິດໃຈ ແລະ ການກະທຳ, ມີຜົນງານທີ່ດີເດັ່ນໃນຂະບວນການອອກແຮງງານ ແລະ ຕັ້ງໜ້າປະຕິບັດໂທດ, ກົດລະບຽບວິໄນຂອງຄ້າຍຄຸມຂັງ-ດັດສ້າງຢ່າງເຂັ້ມງວດ, ເປັນແບບຢ່າງທີ່ດີໃຫ້ແກ່ນັກໂທດດ້ວຍກັນ ຈຶ່ງຈະໄດ້ຮັບການອະໄພຍະໂທດ, ຫຼຸດຜ່ອນໂທດ ແລະ ປ່ອຍຕົວ ຕາມແນວທາງນະໂຍບາຍຂອງພັກ- ລັດ ຂັ້ນເທິງ.

ຜ່ານການຄົ້ນຄວ້າການອະໄພຍະໂທດ, ຫຼຸດຜ່ອນໂທດ ແລະ ປ່ອຍຕົວ ໃຫ້ກັບນັກໂທດ ຜູ້ມີມາດຖານ, ເງື່ອນໄຂ ຢູ່ແຂວງ ບໍລິຄໍາໄຊ ໃນປີ 2022 ມີຈໍານວນ 11 ຄົນ, ຍິງ 01 ຄົນ, ໃນນີ້ສະເໜີໄດ້ຮັບອະໄພຍະໂທດ, ຫຼຸດຜ່ອນໂທດ ຈຳນວນ 10 ຄົນ, ຍິງ 01, ອະໄພຍະໂທດປ່ອຍຕົວ 01 ຄົນ.

• Facebook
• Twitter
• Line