ໃນວັນທີ 17 ມີນາ 2022 ຢູ່ທີ່ຫ້ອງວ່າການ ເມືອງ ທ່າພະບາດ ໄດ້ເປັນກຽດຕ້ອນຮັບທ່ານ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ ເລຂາທີການສູນກາງພັກ ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະ ແລະ ການນຳຂັ້ນແຂວງບໍລິຄຳໄຊ ໂດຍການຮັບຕ້ອນຂອງ ທ່ານ ສົມສົດ ແສງອາພອນ ເຈົ້າເມືອງ ທ່າພະບາດ ພ້ອມດ້ວຍຄະນະ.
ເນື່ອງໃນໂອກາດດັ່ງກ່າວ ທ່ານເຈົ້າເມືອງ ໄດ້ລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດວຽກງານຂອງເມືອງ ເປັນຕົ້ນແມ່ນວຽກງານດ້ານເສດຖະກິດ, ໃນໄລຍະ 1 ປີ ຜ່ານມາ ວ່າ: ຄະນະພັກທຸກຂັ້ນ ໄດ້ສຸມໃສ່ໃນການຊີ້ນຳ – ນຳພາ ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງສູນກາງພັກ, ມະຕິ VII ຂອງອົງຄະນະພັກແຂວງ ແລະ ມະຕິຂອງກອງປະຊຸມໃຫຍ່ ຄັ້ງທີ VI ຂອງອົງຄະນະພັກເມືອງ ທ່າພະບາດ ເຊີ່ງມີທັງຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍຫຼາຍປະການ ເປັນຕົ້ນແມ່ນສະພາບການຂອງໂລກ ແລະ ພາກພື້ນ ທີ່ໄດ້ມີຂໍ້ຂັດແຍ່ງນັບມື້ນັບເພີ່ມຂື້ນ ແລະ ການແຜ່ລະບາດຂອງພະຍາດໂຄວິດ-19 ກໍ່ໄດ້ມີການແຜ່ຂະຫຍາຍຕົວຢ່າງກ້ວາງຂວາງ ເຊີ່ງໄດ້ສົ່ງຜົນກະທົບຕໍ່ກັບການພັດທະນາເສດຖິດ – ສັງຄົມຫຼາຍພໍສົມຄວນ, ດ້ານວຽກງານປ້ອງກັນຊາດປ້ອງກັນຄວາມສະຫງົບ ກໍ່ໄດ້ເອົາໃຈໃສ່ຕ້ານ ແລະ ສະກັດກັ້ນ, ແກ້ໄຂປະກົດການຫຍໍ້ທໍ້ໃນສັງຄົມໃຫ້ຫຼຸດໜ້ອຍຖອຍລົງເທື່ອລະກ້າວ, ດ້ານວຽກງານການນຳພາທາງດ້ານເສດຖະກິດ ກໍ່ໄດ້ເອົາໃຈໃສ່ຊຸກຍູ້ສົ່ງເສີມການຜະລິດເປັນສີນຄ້າຂອງປະຊາຊົນໃຫ້ຫຼາຍຂື້ນ ສ້າງໃຫ້ປະຊາຊົນມີລາຍຮັບຈາກການປູກພືດ, ລ້ຽງສັດ ແລະ ອື່ນໆ ເຊິ່ງໃນ 1 ປີທີ່ຜ່ານມາ ຜະລິດເຂົ້າໄດ້ 17.007,8 ໂຕ່ນ, ປູກພືດລະດູແລ້ງຜົນຜະລິດໄດ້ 6.382 ໂຕ່ນ ພືດລະດູຝົນ ຜົນຜະລິດໄດ້ 3.712,5 ໂຕ່ນ, ການຜະລິດ ຊີ້ນ, ໄຂ່, ປາ ໄດ້ທັງໝົດ 1.819,948 ກິໂລກຣາມ, ສະເລ່ຍບໍລິໂພກໄດ້ 59,30 ກິໂລ / ຄົນ / ປີ, ເກັບລາຍຮັບເຂົ້າງົບປະມານໄດ້ 4 ຕື້ 700 ລ້ານກ່ວາກີບເທົ່າກັບ 112,93% ຂອງແຜນການປີ, ປະຕິບັດລາຍຈ່າຍໄດ້ 20.844.635.538 ກີບ ເທົ່າກັບ 95,90% ຂອງແຜນການປີ, ວຽກງານກໍ່ສ້າງພັກ – ພະນັກງານ ທົ່ວອົງຄະນະພັກເມືອງ ທ່າພະບາດ ມີ 83 ຮາກຖານ, ຊຶ່ງມີ 8 ຄະນະພັກຮາກຖານ, 75 ໜ່ວຍພັກ, ໜ່ວຍພັກຂຶ້ນກັບຄະນະພັກຮາກຖານມີ 38 ໜ່ວຍພັກ, ໜ່ວຍພັກຮາກຖານ 37 ໜ່ວຍ, ມີຄະນະພັກຮາກຖານບ້ານໃຫຍ່ 4 ບ້ານ, ມີສະມາຊິກພັກທັງໝົດ 1.152 ສະຫາຍ, ຍິງ 386 ສະຫາຍ.
ແລະ ທິດທາງແຜນການ 1 ປີ ຕໍ່ໜ້າ ສຶບຕໍ່ຢຶດໜັ້ນຫຼັກການ ແລະ ທິດນຳ ຕໍ່ວຽກງານ ກໍ່ສ້າງພັກ, ສ້າງພັກໃຫ້ມີຄວາມປອດໃສເຂັ້ມແຂງ ແລະ ໜັກແໜ້ນ ທາງດ້ານການເມືອງ-ແນວຄິດ, ການຈັດຕັ້ງ ແລະ ແບບແຜນວິທີການນຳພາ, ຕິດພັນກັບການກໍ່ສ້າງຮາກຖານເມືອງ ແລະ ວຽກງານ 3 ສ້າງ ຍົກສູງເປັນແບບຢ່າງນຳໜ້າຂອງຄະນະພັກ, ສະມາຊິກພັກ – ເດັດດ່ຽວແກ້ໄຂປະກົດການຫຍໍ້ທໍ້ທີ່ເກີດຂຶ້ນ ຢູ່ໃນກົງຈັກການຈັດຕັ້ງແຕ່ລະຂັ້ນກໍ່ຄືຖັນແຖວສະມາຊິກພັກ – ພະນັກງານ ຢ່າງທັນການ ແລະ ວຽກງານການຂຶ້ນແຜນກຳນົດພະນັກງານການນຳພາ-ຄຸ້ມຄອງແຕ່ລະຂັ້ນ ຕິດພັນກັບການບໍາລຸງສ້າງ ການຄຸ້ມຄອງ ແລະ ການນຳໃຊ້ໃຫ້ມີປະສິດຕິພາບສູງສຸດ, ເອົາໃຈໃສ່ສ້າງພະນັກງານຈາກຂະບວນການຕົວຈິງ ແລະ ສ້າງພະນັກງານເພດ, ເຜົ່າ, ໃຫ້ອັດຕາສູງຂື້ນກ່ວາເກົ່າ
ທ່ານຫົວໜ້າຄະນະຈັດຕັ້ງສູນກາງພັກ ກໍ່ໄດ້ຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນໄລຍະຜ່ານມາ ທ່ານຍັງໄດ້ເນັ້ນໝັກໃຫ້ເອົາໃຈໃສ່ຕໍ່ມະຫາຊົນກ້າວໜ້າ ທີ່ຈະຂະຫຍາຍເຂົ້າພັກ ເປັນຕົ້ນແມ່ນ ປະຫວັດຕົ້ນກຳເນີດ, ການເຄື່ອນໄຫວ, ຄຸນສົມບັດ, ສີນທຳປະຕິວັດ, ວຽກງານກໍ່ສ້າງພັກ ໃຫ້ມີການກວດກາບັນດາເນື້ອໃນບັ້ນດຳເນີນຊີວິດການເມືອງ, ເອົາໃຈໃສ່ປະຊາທີປະໄຕພາຍໃນ ການຕົກລົງເປັນໝູ່ຄະນະ ໃຫ້ມີຄວາມເປັນເອກະພາບສູງ, ວຽກງານກໍ່ສ້າງພະນັກງານ ໃຫ້ສົມທົບກັບສາຍຕັ້ງ ແລະ ພະນັກງານຕ້ອງສຶກສາບັນດາກົດໝາຍ, ນິຕິກຳ, ມະຕິກົມການເມືອງ ໃຫ້ໜັກແໜ້ນ, ການເຂົ້າເປັນພະນັກງານລັດຖະກອນ ກໍ່ຕ້ອງຖືກຕ້ອງຕາມຄວາມຕ້ອງການຂອງບັນດາໜ້າວຽກ ເພື່ອໃຫ້ແທດເໝາະກັບໂຕຈິງ.
ເພື່ອເປັນການຊ່ວຍເຫລືອອົງການປົກຄອງເມືອງ ທ່ານ ຫົວໜ້າຫົວໜ້າຄະນະຈັດຕັ້ງສູນກາງພັກ ໄດ້ມອບເງິນ 50.000.000 ກີບ ເພື່ອປະກອບສ່ວນເຂົ້າໃນການກໍ່ສ້າງກັນເຈື່ອນສີມທີ່ວັດພະບາດທ່າໂພນສັນ ( ນາຄານິມິດ ).
Users Today : 204
Users Yesterday : 487
This Month : 6692
This Year : 44097
Total Users : 430321
Who's Online : 3