ໜອງອໍ້ ບ້ານຕົວແບບໃນການພັດທະນາ

ບ້ານໜອງອໍ້ ມີຄອບຄົວພົ້ນທຸກ ແລະ ຄອບຄົວພັດທະນາ ກວມ 98% ຂອງຈຳນວນຄອບຄົວພາຍໃນບ້ານ ສະຫາຍ ດາວເພັດ ຫຼວງຊົມພູ ຄະນະໜ່ວຍພັກບ້ານໜອງອໍ້ ເມືອງຄໍາເກີດ ໄດ້ລາຍງານຕໍ່ກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງບໍລິຄຳໄຊ ທີ່ໄດ້ໄຂຂຶ້ນຢ່າງເປັນທາງການ ໃນວັນທີ 24 ກັນຍາ 2020 ຢູ່ສະໂມສອນໃຫຍ່ແຂວງບໍລິຄຳໄຊ.

ບ້ານໜອງອໍ້ ເມືອງຄຳເກີດ ແຂວງບໍລິຄຳໄຊ ສ້າງຕັ້ງຂຶ້ນໃນປີ 1830, ຫ່າງຈາກເທດສະບານຫຼັກ 20 ປະມານ 17 ກິໂລແມັດ, ມີເສັ້ນທາງເລກທີ 8A ຜ່ານ, ມີເນື້ອທີ 2.420 ເຮັກຕາ, ມີພົນລະເມືອງ 884 ຄົນ, ຍິງ 431 ຄົນ ແລະ ມີ 183 ຄອບຄົວ, ປະຊາຊົນສ່ວນຫຼາຍ ແມ່ນມີອາຊີບເຮັດນາເປັນຕົ້ນຕໍ, ຖືເອົາການປູກຝັງ-ລ້ຽງສັດ, ຫັດຖະກໍາຕໍ່າຫູກ ແລະ ຄ້າຂາຍເປັນສໍາຮອງ. ເພື່ອເຮັດສໍາເລັດໜ້າທີ່ການສ້າງບ້ານເປັນຫົວໜ່ວຍພັດທະນາ ຄະນະພັກ-ອົງການປົກຄອງບ້ານ ໄດ້ສຸມໃສ່ປັບປຸງການຈັດຕັ້ງພັກ-ອົງການປົກຄອງບ້ານ ໃຫ້ເຂັ້ມແຂງ, ໜັກແໜ້ນ ຕາມທິດ 3 ສ້າງ, ໄດ້ປັບປຸງລະບົບການຈັດຕັ້ງບ້ານຈາກ 8 ຕໍາແໜ່ງງານ ມາເປັນ 5 ໜ່ວຍງານ, ເຮັດວຽກມີແບບແຜນ ຢຶດໝັ້ນຫຼັກການລວມສູນປະຊາທິປະໄຕ, ນໍາພາເປັນໝູ່ຄະນະ ແລະ ແບ່ງວຽກໃຫ້ບຸກຄົນຮັບຜິດຊອບ, ພ້ອມດຽວກັນຍັງໄດ້ສຸມໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ ເປັນເຈົ້າການສະກັດກັ້ນ ແລະ ແກ້ໄຂປະກົດການຫຍໍ້ທໍ້ພາຍໃນບ້ານ ຫຼຸດລົງເປັນກ້າວໆ, ໄດ້ຖືກຮັບຮອງເປັນບ້ານສະຫະພັນແມ່ຍິງ 3 ດີ ແລະ ບ້ານສາມັກຄີປອງດອງ.

ສຳລັບການພັດທະນາເສດຖະກິດ ແກ້ໄຂຄວາມທຸກຍາກ ກໍ່ຖືເປັນບັນຫາສໍາຄັນ ເພື່ອເຮັດໃຫ້ປະຊາຊົນໄປມາສະດວກດີ ແລະ ສາມາດເຂົ້າເຖິງພື້ນທີ່ການຜະລິດ ໄດ້ສຸມໃສ່ປັບປຸງພື້ນຖານໂຄງລ່າງ, ຍົກລະດັບເສັ້ນທາງດິນແດງມາເປັນທາງເບຕົ່ງ ໄດ້ 1 ເສັ້ນ ມີຄວາມຍາວ 250 ແມັດ, ມູນຄ່າ 103 ລ້ານກີບ, ກໍ່ສ້າງຂົວຂ້າມນໍ້າພາວ 1 ແຫ່ງ ມູນຄ່າ 1,4 ຕື້ກວ່າກີບ ໃນນັ້ນປະຊາຊົນພາຍໃນບ້ານປະກອບສ່ວນທຶນ ຈໍານວນ 700 ລ້ານກວ່າກີບ ແລະ ໃນປີ 2009 ໄດ້ສ້າງຕັ້ງກອງທຶນພັດທະນາບ້ານຂຶ້ນ ສ້າງເງື່ອນໄຂໃຫ້ປະຊາຊົນ ສາມາດເຂົ້າເຖິງແຫຼ່ງທຶນ ເພື່ອກູ້ຢືມເຂົ້າໃນການຜະລິດກະສິກໍາ, ປູກຝັງ-ລ້ຽງສັດສ້າງລາຍຮັບໃຫ້ແກ່ຄອບຄົວ, ມາຮອດປະຈຸບັນ ມີເງິນໝູນວຽນໃນກອງທຶນ 3,6 ຕື້ກວ່າກີບ, ພາຍໃນບ້ານມີຄອບຄົວພົ້ນທຸກ ແລະ ຄອບຄົວພັດທະນາ 180 ຄອບຄົວ, ກວມ 98% ແລະ ບ້ານໜອງອໍ້ໄດ້ຮັບຮອງເປັນບ້ານພັດທະນາ ໃນປີ 2018.

ພ້ອມກັນນັ້ນ ບ້ານໜອງອໍ້ ຍັງມີໂຮງຮຽນ ນັບແຕ່ຊັ້ນປະຖົມມາຮອດຊັ້ນມັດທະຍົມຕອນປາຍ ເຮັດໃຫ້ລູກຫຼານຮອດເກນອາຍຸກໍ່ໄດ້ເຂົ້າໂຮງຮຽນຢ່າງທົ່ວເຖິງ, ມີສຸກສາລາ ແລະ ກອງທຶນຢາປະຈໍາບ້ານ ເພື່ອຮັບປະກັນໃຫ້ປະຊາຊົນ ໄດ້ຮັບການບໍລິການສຸຂະພາບຢ່າງທົ່ວເຖິງ, ແມ່ ແລະ ເດັກ ໄດ້ຮັບການສັກຢາ, ຢອດຢາຄົບຖ້ວນຕາມກໍານົດ ເຮັດໃຫ້ໄດ້ຖືກຮັບຮອງເປັນບ້ານຮຽນຈົບຊັ້ນມັດທະຍົມຕົ້ນບໍາລຸງ, ບ້ານຢຸດຕິການຖ່າຍຊະຊາຍ ໃນປີ 2017 ແລະ ບ້ານໜອງອໍ້ ຍັງໄດ້ຖືກຮັບຮອງເປັນບ້ານວັດທະນະທໍາ ເພາະໄດ້ເອົາໃຈໃສ່ການອະນຸລັກ, ປົກປັກຮັກສາ ແລະ ເສີມຂະຫຍາຍ ມູນເຊື້ອວັດທະນະທໍາ-ຮີດຄອງປະເພນີ ອັນດີງາມຂອງຊາດ-ຂອງເຜົ່າ ໄດ້ດີຕະຫລອດມາ.

About admins14 admins14