ຄຳເກີດ – ວຽງທອງ ລະນຶກວັນສ້າງຕັ້ງກຳລັງປ້ອງກັນຄວາມສະຫງົບຄົບຮອບ 60 ປີ

ໃນວັນທີ 5 ເມສາ 2021 ນີ້ ເວລາ 6 ໂມງເຊົ້າ ການນຳເມືອງ, ກຳລັງປ້ອງກັນຊາດ, ປ້ອງກັນຄວາມສະຫງົບ ແລະບັນດາຂະແໜ່ງການ ໄດ້ເຂົ້າວາງພວງມາລາ ຢູ່ທີ່ສວນອານຸສະຖານ ທ່ານ ປະທານໄກສອນ ພົນວິຫານ ແລະໄດ້ມີການຈັດພິທີປະຖະກະຖາວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນ ຄົບຮອບ 60ປີ ຂຶ້ນຢູ່ທີ່ຫ້ອງປະຊຸມຊັ້ນ 3 ຫ້ອງວ່າການເມືອງ. ໂດຍການເປັນປະທານ ແລະໃຫ້ກຽດເຊື່ອມຊຶມເອກະສານຂອງ ທ່ານ ເພັດສະໃໝ ໄຊຍະທິຈັກ ກຳມະການພັກແຂວງ ເລຂາພັກເມືອງ ເຈົ້າເມືອງຄຳເກີດ, ມີບັນດາແຂກ, ບັນດານາຍ ແລະ ພົນຕຳຫຼວດຕະຫຼອດຮອດກຳລັງປ້ອງກັນຄວາມສະຫງົບທົ່ວເມືອງເຂົ້າຮ່ວມ.

ພິທີ ທ່ານ ປະທານ ໄດ້ເລົ່າຄືນມູນເຊື້ອປະຫວັດຄວາມເປັນມາຂອງກຳລັງປ້ອງກັນຄວາມສະຫງົບປະຊາຊົນ ທີ່ມີມູນເຊື້ອການຕໍ່ສູ້ ແລະ ປ້ອງກັນຄວາມສະຫງົບອັນຍາວນານ , ປົກປັກຮັກສາສິດເສລີພາບ ປະຊາທິປະໄຕ ແລະ ຜົນປະໂຫຍດອັນຊອບທໍາຂອງປະຊາຂົນລາວບັນດາເຜົ່າ ບໍ່ວ່າຈະເປັນໄລຍະຕໍ່ສູ້ປະຕິວັດເພື່ອປົດປ່ອຍຊາດ ກໍ່ຄືໄລຍະແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ກຳລັງປ້ອງກັນຄວາມສະຫງົບ ເວລາໃດກໍ່ມີພາລະບົດບາດ ແລະ ໜ້າທີ່ໃນການປົກປ້ອງສິດຜົນປະໂຫຍດອັນຊອບທຳຂອງປະຊາຊົນ ສົມກັບວ່າ ກຳລັງ ແມ່ນມາຈາກປະຊາຊົນ ແລະ ເພື່ອປະຊາຊົນ.

ໃນພິທີ ໄດ້ມອບຫຼຽນໄຊແຮງງານຊັ້ນ II ໃຫ້ພະນັກງານ 1 ສະຫາຍ, ຫຼຽນໄຊແຮງງານ ຊັ້ນ III ຈຳນວນ 46 ສະຫາຍ, ຫຼຽນກາແຮງງານ ຈຳນວນ 63 ສະຫາຍ, ໃບຍ້ອງຍໍລັດຖະບານ ຈຳນວນ 32 ໃບ, ໃບຍ້ອງຍໍລັດຖະມົນຕີກະຊວງປ້ອງກັນຄວາມສະຫງົບຈຳນວນ 59 ໃບ, ໃບໃບຍ້ອງຍໍກົມໃຫຍ່ການເມືອງ ປກສ ຈຳນວນ 32 ໃບ ມອບໂດຍທ່ານ ເພັດສະໃໝ ໄຊຍະທິຈັກ ເຈົ້າເມືອງຄຳເກີດ ແລະ ມອບຂອງຂັວນໃຫ້ພະນັກງານບຳນານຕື່ມອີກ.

ໃນຕອນເຊົ້າຂອງວັນທີ 6 ເມສາ 2021 ຢູ່ທີ່ຫ້ອງປະຊຸມຊັ້ນ III ຫ້ອງວ່າການປົກຄອງເມືອງວຽງທອງ ແຂວງບໍລິຄຳໄຊ ໄດ້ຈັດພິທີລະນຶກວັນສ້າງຕັ້ງກຳລັງປ້ອງກັນຄວາມສະຫງົບຄົບຮອບ 60ປີ ( 5 ເມສາ 1961 – 5 ເມສາ 2021 ) ເປັນກຽດເຂົ້າຮ່ວມ ແລະ ເລົ່າຄືນວັນດັ່ງກ່າວໂດຍ ທ່ານ ພັອ ຄໍາແພນ ວີລືທໍາ ເຈົ້າເມືອງວຽງທອງ, ມີພະນັກງານນັກຮົບ ປກສ, ປກຊ ແລະ ພະນັກງານຫຼັກແຫຼ່ງເມືອງ ເຂົ້າຮ່ວມ.

 

 

            ກອງປະຊຸມໄດ້ຜ່ານລັດຖະດໍາລັດ ປະທານປະເທດ ເລກທີ 054/ປປທ, ລົງວັນທີ 24 ກຸມພາ 2021 ວ່າດ້ວຍການປະດັບຫຼຽນໄຊແຮງງານ ໃນນັ້ນ ປກສ ເມືອງ ໄດ້ຮັບຫຼຽນໄຊແຮງງານຊັ້ນ II ມີ 1 ສະຫາຍ, ຊັ້ນ III ມີ 8 ສະຫາຍ ແລະ ໄດ້ເລື່ອນຊັ້ນນາຍ ແລະ ພົນຕໍາຫຼວດມີ ດັ່ງນີ້: ພັຕ ຂື້ນ ພັທ 2 ສະຫາຍ, ຮອ ຂື້ນ ພັຕ 1 ສະຫາຍ, ຮທ ຂື້ນ ຮອ 5 ສະຫາຍ ແລະ ຮຕ ຂື້ນ ຮທ 1 ສະຫາຍ, ພ້ອມນີ້ ໃນພິທີ ໄດ້ມອບໃບຍ້ອງຍໍ, ໃບຊົມເຊີຍໃຫ້ກົມກອງ, ບຸກຄົນທີ່ມີຜົນງານດີເດັ່ນທີ່ໄດ້ປະກອບສ່ວນວຽກງານປ້ອງກັນຊາດປ້ອງກັນຄວາມສະຫງົບ.

About Bolikhamxay Journalist