ເປີດກິດຈະກຳສື່ມວນຊົນນຳພາທ່ຽວ ຫຼື ລາວທ່ຽວລາວ

          ກິດຈະກຳ ສື່ມວນຊົນນຳທ່ຽວ ຂອງແຂວງບໍລິຄຳໄຊ ເພື່ອສົ່ງເສີມການທ່ອງທ່ຽວ ‘’ ລາວທ່ຽວລາວ’’  ໄດ້ເລີ່ມຂື້ນໃນວັນທີ 20 ມີນາ 2021 ຈຸດເລີ່ມຕົ້ນໄດ້ເລີ່ມຂື້ນທີ່ ວັດພຣະທາດພຣະບາດ – ໂພນສັນ ເມືອງທ່າພະບາດ ໂດຍເປັນກຽດເຂົ້າຮ່ວມຂອງທ່ານ ອຸດອນ ສອນສຸລິນ ກຳມະການພັກແຂວງ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງບໍລິຄຳໄຊ, ມີຫົວໜ້າຫ້ອງການ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງ ພ້ອມດ້ວຍສື່ມວນຊົນສາຂາຕ່າງໆຂອງແຂວງເຂົ້າຮ່ວມ.

          ສື່ມວນຊົນນຳພາທ່ຽວໃນຄັ້ງນີ້ ສື່ມວນຊົນໄດ້ໄປທ່ຽວຊົມ ວັດພຣະທາດພຣະບາດ – ໂພນສັນ ວັດດັ່ງກ່າວເປັນວັດທີ່ໄດ້ຮັບການສ້າງຕັ້ງຂື້ນມາໄດ້ຫຼາຍທົດສະວັດແລ້ວ ແລະ ໄດ້ຖືກຮັບຮອງເປັນມໍລະດົກທາງດ້ານວັດທະນະທຳຂອງແຂວງບໍລິຄຳໄຊ ຕາມການລາຍງານຂອງທ່ານ ເຄນ ສານຸວົງ ຫົວໜ້າຫ້ອງການ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງ ໄດ້ໃຫ້ຮູວ່າ: ປະຊາຊົນໄດ້ຄົ້ນພົບຫີນສີລາລຶກຢູ່ວັດຮ້າງມີທີ່ຕັ້ງຢູ່ພະລານຫີນເຊີ່ງໃນເມືອກ່ອນເອີ້ນວ່າ: ‘’ ໂຄກຈິກວຽງງົວ ‘’ ເດີ່ນວັດພຣະບາດໃນປະຈຸບັນ ໄດ້ຂຽນເລກ 902 ຫຼື ປີ ຄ.ສ 902 ແລະ ໃນບໍລິເວນດັ່ງກ່າວກໍ່ໄດ້ມີທາດນ້ອຍໜ່ວຍໜື່ງຕັ້ງຢູ່ແຕ່ບໍມີໃຜຮູ້ວ່າສ້າງຂື້ນມາແຕ່ເມື່ອໃດ ແລະ ໃຜເປັນຄົນສ້າງ ດັ່ງນັ້ນ, ຫຼາຍຄົນຈື່ງສັນນິຖານວ່າສ້າງຂື້ນໃນປີ ຄສ 902 ຕາມບັນທຶກໄວ້ ໃນຫີນສີລາລຶກນັ້ນ ມາໃນປີ 1974 ໂດຍພະຄູເພົ້າ ກໍ່ໄດ້ມາປະຕິສັງຂອນພະທາດດັ່ງກ່າວຄືນ ແລະ ໄດ້ສ້າງພຣະທາດເຈດີອົງໃຫຍ່ກວມເອົາເຈດີອັນເກົ່ານັ້ນໄວ້ ເຊີ່ງມີຂະໜາດ ຄວາມສູງ 46 ແມັດ, ຕີນກວ້າງ 10 x 10 ແມັດ ເປັນສີລະປະ ແລະ ສະຖາປັດຕະຍະກຳສິນສະໄໝອານາຈັກລ້ານຊ້າງ, ລັກສະນະຄ້າຍຄືພະ ທາດອີງຮັງ ທີ່ ແຂວງສະຫວັນນະເຂດ ແລະ ພະທາດ ເຊີງຊຸມ ທີ່ ແຂວງສະກົນນະຄອນ ປະເທດໄທ ແລະ ຫ່າງຈາກພຣະທາດເຈດີ ປະມານ 20 ແມັດ ກໍ່ໄດ້ມີຮອຍພຣະພຸດທະບາດ ຍາວ 1.20 ແມັດ ແລະ ເລິກ 0.49 ແມັດ, ປາຍນິ້ວຕີນພຽງລຽບສະເໝີກັນ, ພື້ນຮອຍຕີນມີຮູບກົງຈັກ ດອກບົວຢູ່ເຄິ່ງກາງ ແລະ ມີຮູບສັດຢູ່ອ້ອມພື້ນຕີນ 108 ຊະນິດ ນອກນັ້ນ ກໍ່ໄດ້ທ່ຽວຊົມສະຖານທີ່ຕ່າງໆພາຍໃນວັດ

          ຫຼັງຈາກນັ້ນທີມງານສື່ມວນຊົນກໍ່ໄດ້ໄປທ່ຽວຊົມ ວັດນາຄານິມິດໂພນສັນ ຕາມຕຳນານບອກວ່າ : ໃນອາດີດພຸດທະການມີພະຍານາກ, 2 ໂຕ ໄດ້ນິມົນພຣະພຸດທະເຈົ້າສັນເຂົ້າຢູ່ສະຖານທີ່ແຫ່ງນີ້ ແລະ ສະຖານທີ່ແຫ່ງນີ້ກໍ່ກາຍມາເປັນອະນຸສອນສະຖານບ່ອນສັນເຂົ້າຂອງພຣະພຸດທະເຈົ້າ ເຊິ່ງສະເດັດລົງມາໂຜດສັດໂລກທັງຫຼາຍໃນພູມີປະເທດນີ້ເມື່ອ 2540 ກວ່າປີ

           ສຸດທ້າຍກໍ່ໄດ້ສີ້ນສຸດການນຳພາທ່ຽວ ຢູ່ແຫຼ່ງທ່ອງທ່ຽວທຳມະຊາດ ນໍ້າຕົກຕາດຊາຍ – ນ້ຳຕົກຕາດຊາຍ ເປັນສາຍນ້ຳທີ່ໄຫຼຜ່ານແກ້ງຫີນ, ຜ່ານຮ່ອມຜາ ແລະ ໂຕນໂດ່ງກວມຜາຊາຍສູງປະມານ 40 ແມັດ, ໄຫຼເຂົ້າໃສ່ຊ່ອງແຄບຢ່າງປະທັບໃຈໃນທາມກາງປ່າຕຶບໜາຂຽວງາມອຸ່ມທຸ່ມ ເຊິ່ງທ່ານສາມາດຕິດຕາມ ເສັ້ນທາງທີ່ມີເຄື່ອງໝາຍໄປສູ່ອ່າງອາບນ້ຳທີ່ເກີດຈາກທຳມະຊາດ ແລະ ຍ່າງຕາມລະດູແລ້ງໃນສາຍນ້ຳທີ່ມີດິນຊາຍ ຢູ່ໃນຜົ້ງຫ້ວຍຂອງຕາດ, ບໍລິມາດນ້ຳປ່ຽນແປງຕາມລະດູການ ງຽບ ແລະ ສະຫງົບ ນັບແຕ່ເດືອນທັນວາ ຫາ ເດືອນ ພຶດສະພາ ນັກທ່ອງທ່ຽວທັງພາຍໃນແລະຕ່າງປະເທດມາທ່ອງທ່ຽວສະຖານທີ່ແຫ່ງນີ້ຢ່າງຫຼວງຫຼາຍ, ສ່ວນໃນລະດູຝົນກະແສນ້ຳຈະ ໄຫຼແຮງສ້ຽວຂາດໂດຍສະເພາະແຕ່ເດືອນສິງຫາ ຫາ ເດືອນກັນຍາ 

About Bolikhamxay Journalist