ເປີດກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XI ຂອງແນວລາວສ້າງຊາດ ຢ່າງເປັນທາງການ

ກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XI ຂອງແນວລາວສ້າງຊາດ ຜ່ານລະບົບວີດີໂອຄອນເຟີເຣັ້ນ ໄດ້ຈັດຂຶ້ນໃນຕອນເຊົ້າຂອງວັນທີ 25 ພະຈິກ 2021 ພາຍໃຕ້ການເປັນປະທານຂອງສະຫາຍ ປອ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ເປັນກຽດເຂົ້າຮ່ວມຂອງສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ, ມີຄະນະກົມການເມືອງສູນກາງພັກ, ການນຳພັກ-ລັດ, ອົງການຈັດຕັ້ງມະຊົນຂັ້ນສູນກາງ, ແຂກຖືກເຊີນ ແລະ ຜູ້ແທນກອງປະຊຸມໃຫຍ່ 238 ສະຫາຍ ທີ່ເປັນຕົວແທນໃຫ້ແນວລາວສ້າງຊາດ, ສຳລັບແຂວງບໍລິຄຳໄຊ ເປັນກຽດເຂົ້າຮ່ວມໂດຍ ສະຫາຍ ວັນວິໄລ ແດນພູຫຼວງ ຮອງເລຂາພັກແຂວງ ແລະ ສະຫາຍ ບຸນຄຳ ໄຊເຍ່ຍລໍວື່ ຄະນະປະຈຳພັກແຂວງ ປະທານແນວລາວສ້າງຊາດແຂວງ ພ້ອມດ້ວຍຄະນະ ເຂົ້າຮ່ວມ.

ສະຫາຍ ປອ ສິນລະວົງ ຄຸດໄພທູນ ໄດ້ກ່າວຕໍ່ກອງປະຊຸມວ່າ: ກອງປະຊຸມຜູ້ແທນແນວລາວສ້າງຊາດທົ່ວປະເທດໃນຄັ້ງນີ້ ມີຄວາມສຳຄັນຫຼາຍ ເຊິ່ງຈະໄດ້ພ້ອມກັນທົບທວນຄືນຜົນຂອງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງແນວລາວສ້າງຊາດ ວ່າ ໃນໄລຍະ 5 ປີ ຜ່ານມາໄດ້ມີຈຸດດີ, ຈຸດອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້, ພ້ອມດຽວກັນນັ້ນ ກໍຈະກໍານົດຄາດໝາຍລວມ, ເນື້ອໃນການຫັນປ່ຽນ ແລະ ແຜນວຽກຈຸດສຸມ ທີ່ຈະປະຕິບັດໃນ 5 ປີຕໍ່ໜ້າ, ພ້ອມທັງ ຄົ້ນຄ້ວາ ແລະ ຮັບຮອງເອົາລາຍງານການເມືອງພາຍໃຕ້ຫົວຂໍ້ “ ເສີມຂະຫຍາຍມູນເຊື້ອອັນດີງາມຂອງແນວລາວສ້າງຊາດ, ເພີ່ມທະວີຄວາມສາມັກຄີເປັນປຶກແຜ່ນຂອງປວງຊົນລາວທັງຊາດ, ເຕົ້າໂຮມກໍາລັງແຮງຂອງປະຊາຊົນທຸກຄົນ, ປະກອບສ່ວນຢ່າງແຂງແຮງເຂົ້າໃນພາລະກິດປົກປັກຮັກສາ-ສ້າງສາປະເທດຊາດ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ໃຫ້ບັນລຸຜົນເປັນຈິງ ”. ເຊິ່ງເນື້ອໃນຄໍາຂວັນດັ່ງກ່າວຈະສອດຫ້ອຍຢູ່ໃນທຸກໜ້າທີ່ວຽກງານຂອງແນວລາວສ້າງຊາດ ທຸກຂັ້ນໃນຕະຫຼອດສະໄໝທີ XI.

ກອງປະຊຸມ ຍັງຈະໄດ້ພິຈາລະນາ ແລະ ຮັບຮອງເອົາແຜນພັດທະນາອົງການແນວລາວສ້າງຊາດ 5 ປີ (2021-2025), ກົດລະບຽບແນວລາວສ້າງຊາດ ສະໄໝທີ XI ສະບັບປັບປຸງໃໝ່ , ຜ່ານບົດສໍາຫຼວດການນໍາພາລວມຂອງຄະນະກໍາມະການສູນກາງແນວລາວສ້າງຊາດ ສະໄໝທີ X ແລະ ຮັບຮອງເອົາ ໂຄງປະກອບບຸກຄະລາກອນຄະນະກໍາມະການສູນກາງແນວລາວສ້າງຊາດ, ທັງຜູ້ປະຈໍາການ ແລະ ບໍ່ປະຈໍາການ ສະໄໝທີ XI.

ພິເສດ ກອງປະຊຸມ ຈະໄດ້ຮັບຟັງການໂອ້ລົມຊີ້ນໍາຂອງສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ, ເຊິ່ງຈະເປັນເຂັມຊີ້ທິດເຍືອງທາງໃຫ້ຄະນະກໍາມະການສູນກາງແນວລາວສ້າງຊາດ ໃນການເສີມຂະຫຍາຍບົດບາດ ແລະ ສ້າງການຫັນປ່ຽນໃໝ່ກ້າວຂຶ້ນຢ່າງບໍ່ຢຸດຢັ້ງ. ກອງປະຊຸມຈະໄດ້ດຳເນີນໄປເປັນເວລາ 2 ວັນຈຶ່ງຈະສຳເລັດ.

About Bolikhamxay Journalist